Овој центар нуди нова, современа и специјализирана социјална услуга, наменета за индивидуална работа со деца и млади со различни развојни и интелектуални тешкотии, специфични тешкотии во учењето и говорно-јазични потешкотии. Центарот ќе нуди секојдневна поддршка, преку логопедски и дефектолошки третмани. Услугата е целосно бесплатна, а ќе ја добиваат децата кои поседуваат соодветна медицинска документација, согласно Меѓународната класификација на функционирање, попреченост и здравје (МКФ).

На отворањето присуствуваа градоначалничката на Општина Кисела Вода, Бети Стаменкоска Трајкоска, заменикот-министер за социјална политика, демографија и млади, Ѓоко Велковски, и претседателот на Здружението за дислексија „Ајнштајн“, Дамјан Николовски. Новата социјална услуга е воспоставена токму преку соработката на Општина Кисела Вода и здружението „Ајнштајн“ како грантисти, а во рамки на Проектот за подобрување на социјалните услуги на министерството за социјална политика, демографија и млади , поддржан од Светската банка.

Градоначалничката Бети Стаменкоска Трајкоска истакна дека со ова се решава голем проблем за семејствата кои имаат потреба од ваков тип на стручна помош, а притоа се потпиша и важен меморандум за наставниот кадар во општината.

- Денес, тука, во населбата Црниче го отвораме Едукативно-терапевтскиот центар „Ајнштајн“, со што обезбедуваме нова, специјализирана социјална услуга во нашата општина. Овој центар е резултат на проект за кој Општина Кисела Вода и Здружението за дислексија „Ајнштајн“ заеднички аплицираа, во рамки на програмата за подобрување на социјалните услуги на ресорното министерство, финансирана од Светската банка. Центарот ќе нуди секојдневна поддршка, логопедски и дефектолошки третмани за деца со развојни, интелектуални и говорни тешкотии. Исклучително важно е што овие стручни третмани ќе бидат бесплатни и целосно достапни за децата од социјално ранливите семејства, кои вообичаено немаат можност за приватни услуги.

Истовремено, со здружението „Ајнштајн“ денес потпишавме и Меморандум за соработка за имплементација на Еразмус+ проектот „DysAcademy“. Со оваа соработка, во директно партнерство со нашите основни училишта, обезбедуваме бесплатен пристап до оваа регионална онлајн едукативна платформа за наставниот кадар од сите училишта на територијата на Кисела Вода. На овој начин, покрај бесплатните третмани за учениците, ние системски им овозможуваме на наставниците и стручните соработници конкретни алатки и обуки за препознавање и работа со деца кои се соочуваат со дислексија, дисграфија или ADHD.

Овие чекори овозможуваат конкретна поддршка на локално ниво и за децата и за образовниот систем. Му благодарам на заменик-министерот Велковски за поддршката од министерството, на Здружението „Ајнштајн“ му го честитам отворањето, а на стручниот тим му посакувам успешна работа.изјави Стаменкоска Трајкоска.

Заменикот-министер за социјална политика, демографија и млади, Ѓоко Велковски, потсети дека ова е веќе втор ваков наменски дневен центар што се отвора на територијата на Кисела Вода во текот на само една недела.

-Така треба и да продолжиме, со заедничка соработка на општинската и централната власт. Министерството обезбедува поддршка за вкупно 98 управни договори кои оваа година се склучени токму за ваква намена- дневен престој за дечиња, поддршка на асистенти, лични асистенти за стари лица и дневен престој за стари лица. Ова се проекти што директно се финансирани од страна на Министерството како услуги што ги даваме и како продолжена рака на овие луѓе кои навистина знаат како на современ, модерен начин да ги згрижат дечињата и тоа е навистина успех за сите нас во државата. Овие дечиња навистина заслужуваат шанса својот потенцијал да го изразат на најдобар начин токму тука- истакна Велковски.

Претседателот на Здружението за дислексија „Ајнштајн“, Дамјан Николовски, нагласи дека паралелно со третманите за децата, неопходно е и континуирано вложување во стручните лица во образовниот систем.

- Овој Центар во соработка, со Општина Кисела Вода преку поддршка од Министерството за социјална политика, демографија и млади и Светска Банка, ќе обезбеди индивидуализирани логопедски и дефектолошки третмани, професионална поддршка за децата и родителите, како и соработка со училиштата и институциите. Особено ни е важно што услугите ќе бидат бесплатно достапни и за деца од социјално ранливи семејства, затоа што поддршката не смее да зависи од финансиската состојба на семејството.

Дополнително, преку денешниот Меморандум за соработка со Општина Кисела Вода и имплементацијата на Erasmus+ проектот DysAcademy, правиме уште еден важен чекор- вложуваме и во наставниците. Затоа што без обучени наставници и стручни соработници, инклузијата останува само формална заложба на хартија- изјави Дамјан Николовски , Претседател на Здружението за дислексија "Ајнштајн".

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.