Во земјите членки на ЕУ починале 534.000 луѓе повеќе отколку во 2019 година (+11 проценти). Бројот на починати се зголемил од 4,7 на 5,2 милиони. Таа бројка ги одразува ефектите на пандемијата, според Евростат. Портпаролката прецизирала дека ова е најголем број на смртни случаи во една година од 1961 година, првата година откако статистиката е достапна за сите тие земји.
Бројот на починати се зголемил во сите земји-членки на ЕУ за време на тој период, особено во Италија (+111.700, +18 проценти), Шпанија (+75.500, +18 проценти) и Полска (+67.600, +17 проценти), според Евростат. Ова зголемување на смртноста придонело за благ пад на бројот на населението во ЕУ во 2020 година, од 447,3 на 447 милиони (-312 000).
Бројот на раѓањата продолжува да опаѓа. Природниот прираст, разликата помеѓу бројот на раѓања и смртни случаи, е негативен од 2012 година (освен 2014 година, кога бил нула).
Од 2001 година до крајот на 2019 година, населението се зголемило за 4 проценти, што се должи пред се на имиграција на мигрантите. Во 2020 година, бројот на мигранти опаднал, исто така, поради пандемија. Главниот елемент што го објаснува падот на популацијата е влијанието на пандемијата врз морталитетот, рече експертот на Евростат, Џампаоло Ланзиери, на Интернет презентацијата на податоците.
Населението најмногу опаднало во Италија (-384.000, -0,6 отсто од населението), следена од Романија (-143.000, -0,7 отсто) и Полска (-118.000, -0,3 отсто). Вкупно девет од 27 земји-членки забележале пад на популацијата во 2020 година, а во 18 се зголемика, како што е Франција (+119.000, +0,2 проценти), каде што бројот на раѓања бил поголем од бројот на смртни случаи.