Во Египет е откриен „Златен град“, стар над 3.000 години (ВИДЕО) - Канал 5

Во Египет е откриен „Златен град“, стар над 3.000 години (ВИДЕО)

Познатиот египтолог Захи Хавас вчера го објави откривањето на „изгубениот златен град“ во близина на Луксор.

Во Египет е откриен „Златен град“, стар над 3.000 години (ВИДЕО)

Американскиот египетолог Бетси Брајан од универзитетот Џон Хопкинс изјави дека откритието на 3.000 години стариот град, што досега бил покриен со песок, е едно од најважните археолошки наоди по гробот на Тутанкамон.

Станува збор за Атен, најголемиот древен град досега откриен во Египет, пишува Би-Би-Си. Ископувањето на ова место започнало во септември 2020 година. Градот потекнува од времето на владеењето на Аменхотеп III, еден од најмоќните египетски фараони, кој владеел од 1391 до 1353 година п.н.е.

Потоа градот го користеле фараоните Аи и Тутанкамон, чијшто речиси недопрен гроб бил откриен во 1922 година од британскиот археолог Хауард Картер.

YouTube video

„Откривањето на овој изгубен град е второто најважно археолошко откритие по гробот на Тутанкамон“, рече Бетси Брајан, додавајќи дека Атен „ќе обезбеди редок увид во животот на древните Египќани“ од периодот кога империјата била најбогата.

YouTube video

Досега се пронајдени голем број вредни археолошки наоди, како накит, обоена керамика, амајлии од скарабеи и тули од кал со печатите на Аменхотеп III.

Археолозите започнале со ископувања во септември 2020 година на западниот брег на Луксор близу долината на кралевите, околу 500 км јужно од Каиро.

„Наскоро откривме добро сочуван голем град, со скоро целосни sидови и простории исполнети со прибор за секојдневен живот“, рече Хавас.

Седум месеци откако започнале ископувањата, биле откриени неколку делови од градот, вклучувајќи пекара, административен дел и станбени населби.

Хавас рече дека многу „странски истражувачи го барале овој град и никогаш не го пронашле“. Тој додаде дека неговиот тим верува дека за време на понатамошните ископувања ќе откријат недопрени гробници исполнети со богатство.

Аменхотеп III. ја наследил империјата која се протегала од Еуфрат во денешен Ирак до Сирија и Судан. Починал околу 1354 година п.н.е.

Тој владеел скоро четири децении и бил познат по грандиозните згради и споменици, вклучувајќи ги и колосите на Мнемон, две џиновски монолитни фигури на тронот што ги претставуваа него и неговата сопруга.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Француски специјалци пресретнаа „нарко-подморница“ во Атлантикот – првпат во историјата (ВИДЕО)

На 12 ноември, француската морнарица пресретна полуподморница без ознаки во Атлантскиот Океан, кое превезувало неколку тони кокаин, пренесува специјализираниот портал „Naval News“. 

 Француски специјалци пресретнаа „нарко-подморница“ во Атлантикот – првпат во историјата (ВИДЕО)

Ова е првпат во историјата француската морнарица да пресретне таканаречена „нарко-подморница“.

Француската морнарица објави снимки од операцијата.

Специјалните сили пресретнаа и влегоа во полуподморницата, шверцерите намерно го потонале пловниот објект

Според соопштението на француското Министерство за вооружени сили и ветерани, објавено на 15 ноември, француска фрегата го пресретнала пловилото – кое не истакнувало никакво знаме – со поддршка од хеликоптер што се наоѓал на фрегатата, како и од американски поморски патролен авион кој дејствувал под команда на Заедничката меѓуагенциска оперативна група – Југ (JIATF-S). Пресретнувањето е извршено во согласност со правната рамка на Конвенцијата на Обединетите нации за правото на морето (UNCLOS).

Додека тимот од фрегатата се приближувал кон полуподморницата, тројца од четворицата поединци што се наоѓале внатре скокнале во океанот. Француските морнари се качиле на пловилото и го извлекле четвртиот член на екипажот, кој во меѓувреме веќе го активирал системот за намерно потонување на пловниот објект. Полуодморницата потонала за помалку од три минути.

Шверцерите и 146 кг кокаин се извлечени од морето

Француските пловила ги извлекле сите четворица осомничени од морето, а потоа собрале остатоци што пловеле на површината, како и четири пакети – со вкупна тежина од 146 килограми – за кои со тестирање е потврдено дека содржат кокаин. Останатиот дел од нелегалниот товар, со тежина од неколку тони, потонал заедно со полуподморницата.

Коментирајќи ја операцијата на социјалната мрежа „X“, француската министерка за вооружени сили и ветерани, Катрин Вотрен, ги пофали вклучените екипажи за нивниот професионализам и одлучност за време на оваа операција на отворено море.

Извор: Индекс.хр

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Министерот Клековски ги прими новоименуваните директори на три универзитетски клиники

Министерот за здравство Сашо Клековски, денес ги прими новоименуваните директори на три јавни здравствени установи.

Министерот Клековски ги прими новоименуваните директори на три универзитетски клиники

Министерот за здравство Сашо Клековски, денес ги прими новоименуваните директори на три јавни здравствени установи — Универзитетската клиника за гастроентерохепатологија, Универзитетската клиника за дигестивна хирургија и Универзитетската клиника за пластична и реконструктивна хирургија.

За директор на ЈЗУ Универзитетска клиника за гастроентерохепатологија е именуван вонр. проф. д-р Владимир Андреевски, специјалист интернист и супспецијалист гастроентерохепатолог, раководител на одделот за ендоскопија при Клиниката и генерален секретар на Македонското здружение за гастроентерохепатологија. Автор е на над 120 рецензирани труда во домашни и меѓународни списанија, со експертиза во интервентната ендоскопија и ЕРЦП.

За директор на ЈЗУ Универзитетска клиника за дигестивна хирургија е именуван асс. д-р Панче Караѓозов, специјалист по дигестивна хирургија, со стручно усовршување по лапароскопска хирургија во Виена и Истанбул и активно учество на меѓународни конгреси од областа на колопроктологијата и хепатобилијарната хирургија.

За директор на ЈЗУ Универзитетска клиника за пластична и реконструктивна хирургија е именуван асс. д-р Благоја Србов, специјалист по пластична и реконструктивна хирургија, асистент на Катедрата по хирургија при Медицинскиот факултет во Скопје и еден од основачите на Македонската асоцијација за реконструктивна микрохирургија (MARM).

Министерот Клековски им честиташе на именуваните и им посака успешна работа, нагласувајќи ја очекуваната одговорност во водењето на трите клиники — стабилно и предвидливо работење, воведување нови методи и постапки, скратување на листите на чекање и зголемена доверба на пациентите.

Претходно денес министерот Клековски ги прими и досегашните директорки — проф. д-р Мери Трајковска и прим. д-р Јасмина Ѓорѓиевска-Павловска, на кои лично им се заблагодари за соработката и за постигнувањата во водењето на клиниките. Благодарност упати и до досегашниот директор на Клиниката за дигестивна хирургија, проф. д-р Огнен Костовски. Проф. д-р Костовски и прим. д-р Ѓорѓиевска-Павловска со своите тимови беа на првата линија во справувањето со последиците од трагедијата во Кочани, а под раководство на проф. д-р Трајковска на Клиниката за гастроентерохепатологија беа воведени четири нови методи на лекување.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Јавна расправа за Законот за семејството – нови решенија за пристап до податоците за посвојување

Со јавната расправа претседаваше членката на Комисијата, Олга Лозановска.

Јавна расправа за Законот за семејството – нови решенија за пристап до податоците за посвојување

Комисијата за социјална политика, демографија и млади, во рамките на денешната 26. Седница, одржа Јавна расправа по Предлогот на закон за изменување и дополнување на Законот за семејството, поднесен од пратениците Весна Бендевска, Даниела Белимова, Павле Арсоски, Бобан Карапејовски и Даниел Стојчевски.

Со јавната расправа претседаваше членката на Комисијата, Олга Лозановска, а Предлог-законот го образложи потпретседателката на Собранието, Весна Бендевска, во име на предлагачите. Во дискусијата учествуваа експерти од областа, претставници на здруженија, граѓански организации и институции, како и претставници на Министерството за социјална политика, демографија и млади, кои изнесоа свои мислења, забелешки и предлози во однос на предложеното законско решение.

Со Законот за семејството се уредува посвојувањето како и правата и обврските кои произлегуваат од него. Согласно постојното законско решение, податоците за посвојувањата претставуваат службена тајна. Целта на Предлог-законот е уредување на пристапот до податоците и списите на предметите за посвојување, преку воспоставување механизам за остварување на правото на полнолетниот посвоеник на увид во списите на предметот за неговото посвојување. Се уредуваат и постапувањето и одлучувањето по барањата за пристап, пристапот до податоци од медицински причини поврзани со здравјето на малолетниот посвоеник, како и пристапот на крвните сродници на полнолетниот посвоеник под условите утврдени со закон.

Потребата од законските измени произлегува и од пресудата на Европскиот суд за човекови права во предметот „Митревска против Северна Македонија“, со која е утврдена повреда на членот 8 од Европската конвенција за човекови права. Судот констатирал дека при одлучувањето по барањето на посвоеникот за пристап до информации за неговото потекло не била воспоставена соодветна рамнотежа меѓу различните интереси. Посочена е и потребата од предвидување исклучоци од начелото на тајност на податоците, особено во случаи кога пристапот до одредени информации е неопходен од медицински причини.

Во широка дискусија беше истакната сложеноста и чувствителноста на прашањето, како и потребата предложените решенија внимателно да се разгледаат од правен и практичен аспект. Учесниците посочија дека конечните законски решенија треба да бидат јасни и применливи, со прецизно утврдени правила и критериуми, кои ќе овозможат соодветно постапување и одлучување во зависност од околностите на секој конкретен случај.

Терминот за продолжување на оваа јавна расправа ќе биде дополнително утврден.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер