Додека во јавноста се шпекулира дека можело да дојде до судир на две фракции, од кои едната би побарала смена на Мицкоски по драматичните случувања во Собранието.
А, другиот табор предводен од лидерот на партијата дека сакал да расчисти со поранешните високи функционери.
Има ли всушност реален судир и е фрлање прав во очите на јавноста. Пратеникот Илија Димовски во писмена изјава вели дека не сака да биде дел од внатрепартиска фингирана пресметка.
-За жал, сега веќе е видливо, дека партијата се движи кон изолација, и спрема надвор, и спрема сите други политички фактори во државата, но и спрема сите свои членови кои за едни, други или трети теми имаат различно мислење од претходното и од сегашното раководство, вели Димовски.
По шпекулациите во јавноста дека екс директорот на УБК, Мијалков наводно придонел за двотретинското мнозинство во Собранието, во интервју за Прес 24 тој категорично ги негира информациите.
-На денот на мојата оставка од сите партиски функции минатата година, немам учество во какво било својство и форма во работењето на политичката партија во која сум поминал децении. Оттука, отфрлам било какви шпекулации за мое влијание врз претседателот на партијата, органите на партијата, пратениците или која било друга организациска структура во нејзин состав, вели Мијалков во интервју за Прес 24.
Во меѓувреме, пак, на социјалните мрежи се огласија неколкумина пратеници, меѓу и екс спикерот Велјановски со поддршка на лидерот Мицкоски.
За политичките аналитичари вечерашниот централен Комитет ќе даде појасна слика во кој правец ќе се насочи ВМРО-ДПМНЕ.
Извори од ВМРО-ДПМНЕ ја оставаат отворена можноста и вечерва, да има нови разрешувања од партиските структури. На претходниот Извршен комитет партијата го исклучи заменик генералниот секретар Богојески.