Македонската филхармонија ќе настапи под водство на енергичниот и харизматичен бугарски диригент, Мартин Пантелеев, а во улогата на солист ќе се појави еден од најистакнатите унгарски виолончелисти, Ласло Фењо, победник на престижниот меѓународен натпревар за виолончелисти „Пабло Касалс“.

Ласло Фењо, кој свири на виолончело изработено од Матео Гофрилер во 1695 година, ќе го отсвири брилијантниот Концертот за виолончело и оркестар од Антонин Дворжак, а под водство на маестро Пантелеев оркестарот ќе ја исполни Фантастичнаta симфонија на Хектор Берлиоз. Оваа симфонија со програмска содржина се смета за едно од ремек делата на романтичниот период и инволвира голем изведувачки апарат, чии интерпретативни можности се искористуваат до максимум за добивање неверојатни асоцијации и слики.

Биографии:

Унгарскиот виолончелист Ласло Фењо е роден во 1975 година и публиката на светските концертни сцени го запознава по победата на Меѓународниот натпревар „Пабло Касалс“ во Кронберг, Германија. Во последните години, тој настапува на најистакнатите светски концертни сали вклучувајќи ги амстердамскиот Концертгебау, Вигмор хол во Лондон, Гајстаг во Минхен и др. Како солист настапува со симфониските оркестари на Сингапур и на Кореја, Симфонискиот оркестар на Франкфуртското радио, оркестарот „Бетовен“ од Бон, Филхармонискиот оркестар на Дуисбург, камерниот оркестар „Франц Лист“, и остварува многу настапи низ Холандија, САД, Кореја, Русија и Шпанија. Ласло Фењо го започнува образованието во Унгарија и веќе на 13 години се запишува на Академијата „Франц Лист“ во класата на проф. Ласло Мезо. Подоцна го продолжува образованието во класата на проф. Давид Герингас во Либек и во следните години станува добитник на бројни награди и признанија на меѓународни натпревари, меѓу кои: Меѓународниот музички натпревар во Женева, натпреварот „Ростропович“ во Париз итн. По завршувањето на студиите, тој ги проширува своите музички хоризонти учејќи со Бернард Гринхаус. Ласло Фењо држи мајсторки курсеви низ целиот свет, а исто така предава на Академијата за музика и убави уметности во Франкфурт од 2009 година, а од април 2012 година е професор на Високата школа за музика во Карлсруе. Од 2001 година тој е водач на секцијата виолончела во Симфонискиот оркестар на Франкфуртското радио.
Неговата дискографија вклучува камерна музика со пијанистот Олег Пољански, концертите за виолончело и оркестар на Јозеф Хајдн и Дмитри Шостакович заедно со Симфонискиот оркестар на Франкфуртското радио под водство на Грант Левелин и др.
Ласло Фењо свири на виолончело изработено од Матео Гофрилер во 1695 година.

Бугарскиот виолинист, диригент и композитор Мартин Пантелеев е роден во 1976 година во Софија, во семејство на музичари. Почнува да учи виолина на четиригодишна возраст. Дипломира на Националната aкадемија за музика „Панчо Владигеров“ во класата на проф. Радионов, а подоцна магистрира кај Захар Брон во Хамбург и Ифра Нојман во Мајнц и Лондон. Во исто време, Пантелеев работи и со еминентниот бугарски композитор и диригент Васил Казанџиев во Софија. Во 1999 година станува диригент на „Филхармонија на нациите“ основана од Леонард Бернштајн и Јустус Франц. Со овој оркестар има бројни настапи низ САД, Кина, Русија и Германија.
Во август 2001 година, Пантелеев настапува како солист со виолинските концерти на Сибелиус и Брух на фестивалот „Рајнгау“ и МДР музичко лето во Германија, а следната година го основа фестивалот „Денови на камерна музика“ во Барт, Германија.
Дебито на Пантелеев во 2004 година како диригент со Софиската филхармонија е високо оценето од страна на критиката и музичката јавност, по што од 2006 година тој е редовен гостин-диригент на овој оркестар, а од сезоната 2011/2012 е назначен за негов шеф-диригент. Мартин Пантелеев соработувал како диригент со Берлинската филхармонија, Камерниот оркестар на „Концертгебау“, симфонискиот оркестар „Шлезвиг-Холштајн“, Холандскиот симфониски оркестар, Украинскиот национален симфониски оркестар и др.
На турнеи во САД настапува со Софискиот фестивалски оркестар и со Филхармонискиот оркестар на Кејптаун, кој воедно е и првиот африкански оркестар кој настапил во Америка. Мартин Пантелеев е главен гостин-диригент на овој оркестар. Пантелеев е исто така мошне истакнат композитор и неговите дела се изведувани во Германија, Кина, Јужна Африка, Бугарија и во Македонија. За неговите композиции и концертна активност низ светот, во 2005 година му е доделена специјалната награда на Министерството за култура на Бугарија и Сојузот на бугарски композитори.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.