Македонија

В недела втор круг од локалните избори во 44 општини

В недела втор круг од локалните избори во 44 општини, прв круг ќе се прегласува на по едно избирачко место во Дебар и Шуто Оризари.

Во вториот круг од Локалните избори, што ќе се одржи в недела на 31 октомври 2021 година, ќе се гласа во вкупно 44 општини. Право на глас имаат 1 353 990 избирачи на 2481 избирачко место. Повторување на гласањето за градоначалник и за совет ќе има на едно избирачко место (0543) во Дебар, а ќе се прегласува и на избирачко место 2957/1 во Шуто Оризари за членови на совет. Управниот суд го поништи гласањето на овие две избирачки места за гласањето од првиот круг на изборите на 17 октомври.

Во недела нема да има гласање за градоначалник во Маврово-Ростуше и Центар Жупа бидејќи не беше исполнет законскиот цензус на гласање во првиот круг од изборите да излезат најмалку една третина од запишаните гласачи во Избирачкиот список. За овие две општини ДИК ќе ја извести Владата, а потоа во Маврово-Ростуше и Центар Жупа ќе се организира повторување на гласањето за градоначалник согласно Законот за локална самоуправа. Членови на советот се избрани бидејќи за нив не е потребен цензус.

Гласањето почнува во сабота кога се изјаснуваат болните и немоќните, лицата со Ковид-19 и во самоизолација, и според податоците на ДИК и 1409 затвореници, 266 лица во 13 старски домови и шест внатрешно раселени лица.

Првпат на локалните избори се применуваат терминали за биометриска идентификација на гласачите, а ќе се применуваат и општите мерки за заштита од Ковид-19.

Во вториот круг од Локалните избори на 31 октомври 2021 година ќе се гласа за следните кандидати за градоначалници во општините:

Арачиново: Ридван Ибраими од ДУИ и Меликије Халими од СДСМ

Битола: Тони Коњановски од ВМРО-ДПМНЕ и СДСМ Христо Кондовски

Боговиње: Бесник Емши од ДУИ и Аљбон Џемаили од Алијанса и Алтернатива

Брвеница: Јовица Илиевски од ВМРО-ДПМНЕ и Енвер Пајазити – независен

Василево: Славе Андонов од ВМРО-ДПМНЕ и Марјан Јанев од СДСМ

Вевчани: Спасе Кочовски од ВМРО-ДПМНЕ и Сашо Јанкоски СДСМ

Врапчиште: Неби Реџепи од ДУИ и Исен Шабани од Алијанса и Алтернатива

Гевгелија: Андон Сарамандов од ВМРО-ДПМНЕ и Сашо Поцков од СДСМ

Гостивар: Невзат Бејта од ДУИ и Арбен Таравари од Алијанса и Алтернатива

Дебарца: Игор Крцовски од СДСМ и Зоран Ногачевски – независен

Демир Капија: Андон Донев од ВМРО-ДПМНЕ и Лазар Петров од СДСМ

Демир Хисар: Никола Најдовски од ВМРО-ДПМНЕ и Стевче Митревски од СДСМ

Долнени: Урим Ибески од ДУИ и Аднан Џафероски од СДСМ

Желино: Фатмир Изаири од ДУИ и Блејерим Сејдини од Беса

Зелениово: Коста Маневски од ВМРО-ДПМНЕ и Борче Гиевски од СДСМ

Карпош: Стевчо Јакимовски ГРОМ и Душко Весковски од СДСМ

Кичево: Фатмир Дехари од ДУИ и Александар Јовановски од ВМРО-ДПМНЕ

Конче: Златко Ристов од ВМРО-ДПМНЕ и Благој Илиев од СДСМ

Кочани: Љупчо Папазов од ВМРО-ДПМНЕ и Николчо Илијев од СДСМ

Кратово: Тодорче Николовски од ВМРО-ДПМНЕ и Влатко Бојковски од СДСМ

Куманово: Оливер Илиевски од СДСМ и Максим Димитриевски – независен

Лозово: Бошко Цветковски од ВМРО-ДПМНЕ и Ацо Велковски од СДСМ

Македонска Каменица: Димчо Атанасовски од ВМРО-ДПМНЕ и Соња Стаменкова од СДСМ

Македонски Брод: Жарко Ристевски од ВМРО-ДПМНЕ и Ацо Новески – независен

Ново Село: Ѓорге Божинов од ВМРО-ДПМНЕ и Звонко Ангелов од СДСМ

Охрид: Кирил Пецаков од ВМРО-ДПМНЕ и Константин Георгиевски од СДСМ

Пехчево: Александар Китановски од ВМРО-ДПМНЕ и Славко Пандурски од СДСМ

Пробиштип: Марјан Миленковски од ВМРО-ДПМНЕ и Драган Анастанов од СДСМ

Радовиш: Ацо Ристов од ВМРО-ДПМНЕ и Коле Чаракчиев од СДСМ

Ранковце: Борче Спасовски од ВМРО-ДПМНЕ и Даниел Крстевски од СДСМ

Ресен: Јован Терзиевски од ВМРО-ДПМНЕ и Живко Гошаревски од СДСМ

Росоман: Тихомир Николов од ВМРО-ДПМНЕ и Стојан Николов од СДСМ

Старо Нагоричане: Жаклина Јовановска од СДСМ и Власте Димковиќ од ТМРО

Струга: Рамиз Мерко од ДУИ и Идри Истрефи од Алијанса и Алтернатива

Студеничани: Ејуп Абази од ДУИ и Азен Садики од ДПА

Теарце: Нухи Незири од ДУИ и Назим Таити од Алијанса и Алтернатива

Тетово: Теута Арифи од ДУИ и Билал Касами од Беса

Центар: Наташа Котлар-Трајкова од ВМРО-ДПМНЕ и Горан Герасимовски од СДСМ

Чаир: ДУИ Висар Ганиу и Беким Сали од Алијанса и Алтернатива

Чашка: Суат Шаќиров од ДУИ и Горан Стојановски од СДСМ

Чешиново-Облешево: Далибор Ангелов од ВМРО-ДПМНЕ и Горанчо Крстев од СДСМ

Чучер Сандево: Сашко Комненовиќ од СДСМ и Јован Пејковски – независен

Шуто Оризари: Курто Дудиш од ДОМ/ЛДП и Ферат Асани од СДСМ

Град Скопје: Петре Шилегов од ВМРО-ДПМНЕ и Данела Арсовска, независна, поддржана од ВМРО-ДПМНЕ

Во првиот круг од гласањето, од коалицијата предводена од ВМРО-ДПМНЕ, градоначалници беа избрани во: Аеродром – Тимчо Муцунски, Босилово – Ристо Манчев, Бутел – Дарко Костовски, Велес – Марко Колев, Виница – Миле Петков, Гази Баба – Бобан Стефковски, Ѓорче Петров – Александар Стојковски, Градско – Киро Нацков, Зрновци – Борчо Коцев, Илинден – Александар Ѓоргиевски, Јегуновце – Димитар Костадиновски, Кавадарци – Митко Јанчев, Карбинци – Виктор Паунов, Могила – Драганчо Сабатковски, Неготино – Горан Стојанов, Новаци – Стевче Стевановски, Петровец – Борче Митевски, Прилеп – Борче Јовчевски, Свети Николе – Дејан Владев, Сопиште – Стевче Трпковски, Штип – Иван Јорданов.

Од СДСМ и коалицијата „Најдоброто за мојата општина" избрани градоначалници има во општините Берово – Звонко Пекевски, Богданци – Блаже Шапов, Валандово – Перо Костадинов, Делчево – Горан Трајковски, Дојран – Анго Ангов, Крива Паланка – Сашко Митовски, Кривогаштани – Николче Мицковски, Крушево – Томе Христовски, Струмица – Констадин Костадинов, во Липково и Сарај во првиот круг има избрано двајца градоначалници од ДУИ, тоа се Еркан Арифи, односно Блерим Беџети.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Новите украински ракети можат да стигнат до Москва

-Новите украински ракети можат да стигнат до Москва: „Напредуваме многу брзо, погодуваме важни цели во Русија“!

Украина би можела да ги изведе првите напади врз Москва уште оваа есен, користејќи балистички ракети од домашно производство, изјави Денис Штилерман, сопственик и главен конструктор на одбранбената компанија „Фајр поинт“ (Fire Point).

Штилерман наведе дека компанијата е во завршна фаза на тестирање на новиот ракетен систем и дека, штом ќе завршат пробните лансирања, ракетите би можеле да почнат да се користат против цели во внатрешноста на Русија.

„Армијата ќе одлучи каде да удри, но верувам дека тоа веднаш ќе бидат значајни цели“, рече Штилерман.

Штилерман додава дека временската рамка за распоредување на ракетите зависи од резултатите од тестирањата на моторот, вклучително и од финалното испитување на перформансите на моторот на пробната платформа.

„Ќе го поставиме моторот на платформата, ќе спроведеме пробно пуштање во работа и ќе видиме како се однесува. Доколку се појават какви било проблеми, ќе ги отстраниме. Но, напредуваме многу брзо“, рече тој. Овие најнови изјави уследија по претходното интервју со Штилерман, во кое тој наведе дека компанијата „Фајр Поинт“ (Fire Point) се подготвува за сериско производство паралелно со процесот на тестирање.

Имено, компанијата планира да произведе меѓу 10 и 20 ракети за пробни лансирања, при што обемот на производство би можел да се зголеми на десетици единици откако ова оружје ќе добие официјална кодификација и одобрение за набавка.

Живот

Рускиот енергетски гигант „Гаспром“во првата половина од 2026 заработил милијарда долари

Рускиот енергетски гигант „Гаспром“ објави нето-добивка од 78,4 милијарди рубљи – што е приближно една милијарда долари – за првата половина на 2026 година.

Ова претставува значителен пресврт во споредба со истиот период минатата година, кога компанијата забележа загуба. Во првите шест месеци од минатата година, „Гаспром“ книжеше загуба од 10,76 милијарди рубљи, односно 137 милиони долари. Оваа година, приходите на компанијата пораснаа за 2,9 отсто на годишно ниво, а бруто-добивката за 15 отсто, додека добивката пред оданочување остана стабилна.

„Гаспром“ и понатаму е еден од најголемите светски производители на природен гас, но изгуби значителен дел од европскиот пазар по руската инвазија врз Украина. Европа брзо ја намали својата зависност од рускиот гас што се испорачува преку гасоводи, а ЕУ планира целосно да го укине увозот на руски гас до 2027 година.

Пред инвазијата, во 2021 година, Европа набавуваше околу 50 отсто од својот природен гас од Русија, главно преку гасоводи. Истовремено, приходите на Русија од енергенти не се целосно прекинати. Во првата половина на 2026 година, Европа увезе рекордни количества течен природен гас (LNG) од рускиот погон „Јамал ЛНГ“, со кој управува „Новатек“, а не „Гаспром“. Според податоците на „Кплер“ (Kpler), увозот од „Јамал“ достигна 9,89 милиони тони, што претставува зголемување од 18 отсто во споредба со истиот период минатата година. Во последните месеци, Русија исто така најави планови за пренасочување на испораките на гас од европскиот пазар кон Азија.

Балкан

Романија поради ниско ниво на Дунав, исклучува реактор во нуклеарна централа

Нивото на водата на најдолгата европска река Дунав е најниско во последните 30 години.

Романија го исклучува реакторот во нуклеарната централа.

Романската државна компанија „Нуклеарелектрика“ (Nuclearelectrica) денес исклучи еден реактор во нуклеарната централа „Чернавода“ како мерка на претпазливост поради рекордно ниското ниво на водата во Дунав; Министерството за енергетика соопшти дека овој потег има за цел да го заштити системот за ладење.

Реакторот е привремено исклучен за да се спречи евентуално оштетување на системот за ладење, кој зависи од водата од Дунав, истакнаа од министерството.

Нивото на водата во романскиот дел на Дунав минатата недела падна на најниско ниво во последните три децении, што ги натера властите да ја ограничат употребата на речната вода за наводнување, според „Романија инсајдер“ (Romania Insider).

„Нуклеарелектрика“ денес изјави дека реакторот во „Чернавода“ е исклучен во согласност со контролираните процедури за постапување при екстремно ниско ниво на реката, додавајќи дека мерката има за цел да обезбеди нуклеарна безбедност и сигурност во работата на централата.

Компанијата наведува дека одлуката се заснова на најновите прогнози на Романскиот национален институт за хидрологија и управување со води, при што нагласува дека состојбата на Дунав внимателно се следи.

Доколку нивото на водата дополнително опадне, компанијата може привремено да го исклучи и вториот реактор.

Недостатокот ќе се надомести преку увоз. Според податоците на Светската нуклеарна асоцијација, нуклеарната централа „Чернавода“ располага со два реактора базирани на канадската технологија CANDU, секој со капацитет од 706 мегавати, и обезбедува приближно една петтина од потрошувачката на електрична енергија во Романија.