Од МВР потврдија дека по насоки на ОЈО Кочани се преземаат активности на неколку локации низ државата, и повеќе детали најавуваат по завршувањето. Според информациите помеѓу уапсените се службеници и раководители од УЈП во Штип, Струмица и Кочани. Државниот обвинител Љупчо Коцевски не откри повеќе детали освен дека се сомничат за злоупотреба на службената положба и овластување и примање и давање мито.

„Се водеше предистражна постапка за лица од УЈП поврзани со предметот за Кочани. Во текот на вчерашниот ден и денеска се преземаат дејствија. Приведени се околу 10 лица и се вршат претреси на одредени локации, според првичните сознанија се за кривични дела злоупотреба на службена положба и овластување и примање и давање мито.“

Според неофицијални информации, помеѓу уапсените се инспекторите кои имале комуникација со Михаил Јованов, синот на газдата на Пулс Дејан Јованов Деко, која во септември ја објави ИРЛ. Еден од нив е инспекторот од УЈП Драган Паунов кој инаку е брат на в.д претседателката на Кривичен, Даниела Димовска. Коцевски потврди дека и овие коимуникации се опфатени од предистрагата а ккви злоупотреби се правеле, рече обвинителството ќе соопшти откако ќе биде отворена официјална истрага.

Овој предмет не може да се спои со другиот предмет затоа што нема поврзаност со штетната последица односно смрт. Но другиот предмет веќе влезе во судска постапка и првото рочиште се одржа вчера. Во воведните зборови обвинителот Борче Јанев посочи и на законските изигрувања околу функционирањето на дискотеката Пулс кои ги правеле обвинетиот сопственик нс Пулс Дејан Јованов и неговиот син Михаил Јованов.

„Се што посакал тоа и го добивал, таму каде што знаел дека не можел да пробие и да го изигра законот, не се ни обраќал, немало потреба, сите документи кои морал да ги има, не ги обезбедувал, затоа што никој не му ги барал. Таму каде што требало да добие заштита и да ги прикрие криминалните потфати тоа и го имал, консултанти, доушници, логистичари. Во најтесна закрила до него ги подредил неговиот кум, неговиот брат па дури и сопственото дете, сите впрегнати да работат и да кршат закони по негова замисла.“

Денеска приведените лица од УЈП и ДПИ се во полициска станица и за нив како што кажа Коцевски кочанското обвинителство ќе бара мерки за обезбедување.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.