Откако е прогласен Бајден за победник пред две недели, Трамп покрена тужби против неколку земји клучни за претседателските избори во САД во обид да го промени резултатот и започна силна кампања на притисок за да се спречат државите да ги потврдат изборните резултати.

Судовите во Џорџија, Мичиген и Аризона ги отфрлија неговите обиди да го запрат процесот за потврда на изборните резултати.

Вчера федералниот судија Метју Бран, републиканец номиниран за оваа функција од поранешниот претседател Барак Обама, отфрли сличен обид во Пенсилванија, пишувајќи дека пред него имал поднесок со „развлечени правни аргументи без основа и многу сомнителни обвинувања“.

Тимот на Трамп се обидел да го запре процесот за потврдување на резултатите во Пенсилванија, тврдејќи дека има неправилности во ракувањето со гласачките ливчиња испратени по пошта, а Бран одговори дека „тој нема овластување да го лиши некого од правото на глас, а камоли на милиони граѓани“.

За да има какви било шанси да остане во Белата куќа, Трамп мора да ја поништи предноста на Бајден во Пенсилванија од 81.000 гласови. Државата утре треба да започне со процесот за потврда на изборните резултати.

Адвокатскиот тим на Трамп објави дека веднаш ќе ја обжали одлуката на судијата Бран до Окружниот суд во Филаделфија, кој во најголем дел е составен од судии номинирани од републикански претседатели, но од другата страна изјавија дека времето му е истечено.

Републиканскиот сенатор Пат Томи по пресудата на Бран рече дека се исклучува каква било можност за законска победа на тимот на Трамп во Пенсилванија и го повика Трамп да го признае поразот.

Членот на раководството на Републиканците во Претставничкиот дом, пратеничката Лиз Чејни, го повика Трамп да ја почитува „светоста на изборниот процес“ доколку не успее на суд.

Вчера на обидите на Трамп се придружи и републиканецот од Пенсилванија, Мајк Кели, кој побара од судот да поништи најмалку 2,6 милиони гласови во таа сојузна држава, односно сите гласачки ливчиња добиени по пошта, тврдејќи дека законот за поштенско гласање, изгласан од Претставничкиот дом на Пенсилванија е неуставен. Затоа, тој побара од судот да ги поништи сите поштенски гласови или, алтернативно, да ги поништи сите гласови во таа сојузна држава и да нареди интервенција на бранителот при изборот на победникот во таа сојузна држава.

Правните експерти оценија дека е малку веројатно дека судот ќе поништи толку голем број гласови.

Бајден освои шест милиони гласови повеќе од Трамп на претседателските избори во САД на 3 ноември и има 306 изборни гласови , наспроти 232-те на Трамп.

Пребројувањето на гласовите во Џорџија, една од неколкуте клучни држави, потврди дека Бајден победил. После тоа, тимот на Трамп објави дека ќе побара пребројување на гласовите, што им следува со закон, бидејќи разликата помеѓу двајцата кандидати е помала од 0,5 проценти.

Гувернерот Брајан Кемп и државниот секретар Бред Рафенспергер, двајцата републиканци, во петокот ги потврдија резултатите од изборите на кои Бајден победил со разлика од 12.000 гласови.

Во Висконсин, изборните власти ги критикуваат волонтерите на Трамп за бавно пребројување на гласовите при делумното пребројување на гласовите. Во таа држава, не се очекува пребројувањето да ја загрози победата на Бајден.

Со неуспеси во судот и во пребројување на гласовите, Трамп се сврте кон новата стратегија за притисок врз републиканските пратеници во одделните државни парламенти да ги отфрлат изборните резултати и да го прогласат за победник.

,,Со надеж дека судовите и законодавците ќе имаат храброст да сторат се што е потребно за да се зачува интегритетот на нашите избори и на самите Соединетите држави“, објави на Твитер Трамп по одлуката на судијата Бран.

Трамп во петокот повика двајца водечки републиканци од Претставничкиот дом на Мичиген во Белата куќа и тие по состанокот објавија дека не гледаат докази што би се барале од нив за да интервенираат во изборните резултати во таа сојузна држава, една од шесте клучни. Бајден го предводи Мичиген пред Трамп со 154.000 гласови.

Претставници на изборната комисија низ целата земја потврдија дека нема докази за широко распространета изборна измама, како што тврдат Трамп и неговиот тим и дека на сите избори се забележани грешки кои не влијаат на резултатите од изборите.

Според анкетите, половина од републиканците веруваат дека е украдена победата на Трамп на претседателските избори во САД.