Свет

Трамп откри дека има план и за трет мандат: Имам најголем рејтинг во последните 100 години

Американскиот претседател Доналд Трамп вчера наутро одби да ја отфрли можноста да бара уставно забранет трет мандат.

Американскиот претседател Доналд Трамп вчера наутро одби да ја отфрли можноста да бара уставно забранет трет мандат, велејќи ѝ на Кристен Велкер од NBC News во телефонски разговор дека „постојат методи“ за тоа, пишува Politico.

„Треба да започнете со фактот дека имам најголем рејтинг меѓу републиканците во последните 100 години“, рече Трамп. „Ние сме над 70 отсто во многу анкети, во вистинските анкети, и го гледате тоа. И, знаете, ние сме многу популарни. И, знаете, многу луѓе би сакале да го сторам тоа.“

Секој обид на Трамп или неговите сојузници да го доведат во Овалната соба во трет мандат би бил директно кршење на 22-от амандман на Уставот на САД, кој вели дека „ниту едно лице не смее да биде избрано за претседател повеќе од двапати“ и не прави исклучоци за претседатели како Трамп кои добиваат посебни мандати. Овој амандман беше донесен во 1951 година, главно на инсистирање на републиканците незадоволни од четирикратниот реизбор на претседателот Френклин Д. Рузвелт.

„Американците огромно го поддржуваат претседателот Трамп и неговата политика „Америка на прво место“. Како што рече претседателот, прерано е да се размислува за тоа и тој е фокусиран на враќање на сета штета што Бајден ја направи и да ја направи Америка повторно голема“, рече директорот за комуникации на Белата куќа, Стивен Чунг во соопштението.

Неговиот близок сојузник Стив Банон, кој редовно ги собира најтврдокорните поддржувачи на МАГА во неговиот подкаст Воена соба, предложи во декември дека Трамп може легитимно да бара уште еден мандат во 2028 година. Тој продолжи да ја промовира таа идеја во месеците што следеа.

Трамп исто така ја поддржа идејата.

„Па, има планови“, ѝ рече тој на Велкер во неделата. „Постојат - не планови. Постојат методи со кои тоа може да се направи, како што знаете.“

Во еден момент за време на телефонскиот разговор, Велкер го праша Трамп дали ја разгледал можноста потпретседателот Џ.Д. Венс да победи на изборите во 2028 година, за потоа да му ја предаде претседателската функција.

„Па, тоа е една опција“, рече Трамп. „Но има и други. Има и други“.

Тагови: Доналд Трамп мандат

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Девет лица загинаа во руски напади во Украина, десетици се ранети

Бројот на цивилните жртви во Украина нагло се зголеми во последните два месеца.

Најмалку девет лица загинаа, а десетици се ранети во серијата жестоки руски воздушни напади врз неколку украински области, во кои се оштетени станбени згради и критична инфраструктура, додека украинскиот претседател Володимир Зеленски соопшти дека Русија загрижувачки ја пренесува војната кон економијата со истрелување на речиси 500 дронови од раните утрински часови.

Бројот на цивилните жртви во Украина нагло се зголеми во последните два месеца поради засилените руски напади врз електроцентралите и другата инфраструктура. Од своја страна, украина изведува напади врз енергетски објекти и магацини во оддалечените области на Русија, а двете страни напаѓаат и бродски пловни објекти.

„Москва ја пренесува војната од фронтот, каде што не постигнува успех, кон економијата, уништувајќи објекти што му помагаат на населението да се справи со воените услови. Русија сака да ја уништи украинската економија и да го скрши нашиот отпор“, изјави Зеленски на Телеграм.

Тагови: украина

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Македонија без активни пожари

Центарот за управување со кризи денеска за првпат после подолго време информира дека нема активни пожари и пожари под контрола.

Во изминатото деноноќие имало вкупно 21 пожар и сите се изгаснати.

На ден 12/13.09.2026 година, до 08:00 часот, регистрирани се вкупно 21 пожар на отворен простор, од кои нема активни пожари, нема пожари под контрола, а изгаснати се 21 пожар, се вели во информацијата од ЦУК.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

Поранешен истражувач алармираше дека вештачката интелигенција е закана за човештвото

Шефовите на водечките компании за вештачка интелигенција сè погласно предупредуваат на ризиците од трката во развојот на сè помоќни AI системи.

Дел од нив отворено повикуваат на поголема претпазливост и безбедносни механизми, додека политичари и експерти бараат и построга регулација. Дарио Амодеи, извршниот директор на Anthropic, директно повикува да се забави темпото на развојот.

-Мојата прва загриженост е што, од приближно летово, вештачката интелигенција напредува драматично побрзо, пред сè поради сè поголемата способност на AI да ја гради следната генерација на AI. Ако не се контролира, овој процес би можел да ја надмине нашата способност да ги разбереме и контролираме овие системи. Затоа, со него мора да се постапува исклучително внимателно — доколку воопшто продолжи.

На ризиците од брзиот развој претходно предупредуваа и други влијателни имиња од технолошкиот сектор, меѓу нив и Сем Алтман, извршниот директор на OpenAI, како и Илон Маск, кој со години предупредува дека напредната вештачка интелигенција може да носи сериозни ризици доколку не биде соодветно контролирана.

Предупредувањата не доаѓаат само од технолошкиот сектор. Американскиот сенатор Берни Сандерс бара уште порадикален чекор – пауза во развојот на напредната вештачка интелигенција, додека не се воспостават јасни безбедносни правила.

-Ако лидерите на големите АИ компании признаваат дека губат контрола над нивната екстремно оасна технологија, според мене е неодговорно за општеството да им дозволи да продолжат д аги прават овие продукти дури многу понапредни и многу поопасни. Неопходно е да се стави на „пауза“ овој напреден развој и трајна забрана на супер-разузнавањето и вештачките умови попаметни од секој човек способен да работи независно надвор од нашата контрола. – Берни Сандерс

Поранешниот американски претседател Барак Обама повикува на јавна регулација и надзор, за AI да не биде во корист само на неколку богати корпорации, туку на луѓето пошироко.

-Важно е да постои јавна регулација која ќе го насочува развојот на оваа технологија, за таа да не им користи само на неколку богати корпорации, туку на луѓето пошироко. Тоа ќе помогне и да се спречат негативните последици од вештачката интелигенција, како дезинформациите и дипфејк-содржините. - Барак Обама – Поранешен претседател на САД

Во меѓувреме, трката продолжува. OpenAI, Anthropic, Google и другите технолошки гиганти инвестираат милијарди во развој на нови и помоќни модели, додека истовремено расте притисокот врз владите да воспостават правила за нивна безбедна употреба.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.