Смртта кај детето ја констатирале лекарите на ургентното одделение во болницата, а најверојатно настанала од задушување. Но што се случувало зад затворената врата на станот и дали некој кривично ќе одговара? Прашањето се поставува по застрашувачките сознанија на лекарите дека детето додека беснеел пожарот било врзано со ланец на нозете. Одговорот ќе треба да го даде истрагата на гостиварското обвинителство.
-Првичните сознанија на лекарскиот тим на лице место упатуваат на тоа дека детето за време на пожарот било врзано со ланец на нозете. Според исказот на семејството, причина за врзувањето било што детето било агресивно. Обвинителството ги презема сите дејствија за утврдување на евентуална кривична одговорност.,- ОЈО Гостивар.
Родителите со своите четири деца живеле на третиот кат од зградата во чиј стан избувнал пожарот.
-Утрово околу 8 часот во СВР Тетово е пријавено дека во стан во станбена зграда на улица „Кеј Вардар“ во Гостивар избувнал пожар. Како последица на пожарот две лица кои живееле во станот се пренесени во гостиварската општа болница „Ферид Мурад“, каде кај едното малолетно лице е констатирана смрт, а другото е пуштено дома, велат од СВР Тетово.
Пожарникарските екипи интервенирале со две возила и за половина час пожарот бил локализиран.
Пожарот беше пријавен во 8 часот утрово, а пожарникарите пристигнале за десетина минути... Брзо го локализирале, но за жал не успеале навреме да го евакуираат детото.