„Во огласите на МВР се наведуваат основните законски услови, а не од која политичка партија треба да бидат апликантите“ – порача министерот за внатрешни работи Панче Тошковски по обвинувањата од СДСМ дека се „мести“ тендерот за возачките испити во Битола, Ресен и Прилеп. Според него, претходно со истиот полигон договор имала фирма на семејство блиско до СДСМ, која сега не ги исполнила законските услови, па праша, врз основа на кои критеруми го добиле тогашниот тендер.

-Ако им е толку многу битно, кој од која политичка партија е, дали токму фамилијата од СДСМ, и те како моќна фамилија во рамки на реонот Преспа, е онаа фамилија која што одлучила кој ќе го добие тендерот. Дали е точно дека токму фамилијата и во минатото и денеска била доста значајна, а е од редовите на СДСМ е сопственик на полигонот, кој што пак бил клучен компанијата која го добила огласот, да го добие огласот. – Панче Тошковски – Министер за внатрешни работи

Од СДСМ и денеска обвинуваат дека МВР е во функција на партиски бизниси, односно дека милионскиот тендер за организирање на возачки испити во пелагонискиот регион е дадена на фирма која е регистрирана пред три месеци, а е во сопственост на советникот од ВМРО-ДПМНЕ во општина Кичево – Филип Митрески. Од СДСМ побараа институциите да постапат, односно ДКСК да отвори предмет и да го испита целиот процес, а ОЈО да покрене постапка по допрен глас

-Станува збор за сериозни индиции дека тендерот бил однапред наместен, дека целата процедура е креирана за да се обезбеди профит за партиски блиски структури. Ваков модел на доделување на јавни услуги – на нови фирми без искуство, контролирани од партиски кадри, претставува класичен партиски грабеж. – СДСМ

Обвинувањата од СДСМ следуваат откако медиумите во јавноста пред две недели отворија сомнежи за фирмата која го добила тендерот. Освен МВР тогаш и сопственикот Митревски во пишана изјава порача дека, иако фирмата постои од лани, тимот кој работи е професионален со долгогодишно искуство во возачките обуки и организирање на испити. Што се однесува до партиските поврзувања, Митревски посочи дека без разлика на политичките убедувања, секој има право да основа и води фирма, доколку ги исполнува законските услови, односно дека професионалноста треба да биде мерило, а не личната политичка определба.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.