Македонија

Топ Билд: Асфалтната база во Визбегово промовира индустриски еколошки напредок

„Асфалтната база во Визбегово промовира индустриски еколошки напредок во заштитата на животната средина со највисоки светски стандарди!“

Не се сите бази исти!

Искрено жалиме што како општество кое секојдневно исклучиво претендираме за приклучок кон развиениот Запад треба да се бавиме со реакции на валкани кампањи. Наместо како општествено одговорни да промовираме индустриско еколошки напредок во заштитата на животната средина со примена и имплементирање на најсовремени технологии како во случајов за рециклирање на отпаден и дотраен асфалт.

Ние браниме наместо да промовираме еколошки најсовремен проект кој влијае на унапредување на заштитата на животната средина на начин кој неколкукратно во еден исти процес ја заштитува животната средина, како и при повторната употреба на отпаден материјал како суровина за производство на нов производ наместо да се создава отпад, така и при намалената потреба за користење на друг материјал произведен со експлоатација на минералните суровини. Постројката која веќе ја прибавивме и увезовме во државата е произведена од реномиран Европски производител согласно Европските директиви и регулативи за заштита на животната средина како и најважното согласно нашето законодавство. Како за пример вакви постројки (Асфалтни Бази) се инсталирани во централни густо населени подрачја во западните метрополи Париз, Болоња, Милано, Њујорк и други.

Производителот е сериозно загрижен како за имиџот така и за владеење на правото. Невистина е дека бројките во елаборатот кој е одобрен со решение од Министерството за животна средина се фингирани, напротив тие се согласно сертификатот за екологија изготвен од реномираниот производител во кој се наведени отстапки по неколку пати помали од кај нас законски предвидените, додека едно од испитувањата при работењето на една ваква постројка во Швајцарија покажува за многу пати помали отстапки од кај нас дозволените со закон. Исто така невистина е дека во Г2 лесна преработувачка и помалку загадувачка индустрија не е дозволено да се гради асфалтна база, затоа што доколку секој заинтересиран го отвори правилникот за урбанистичко планирање ќе се увери дека токму тоа е предвидено во намената за градба. Предметнота локација е со намена Г2 согласно урбанистичката документација уште неколку години пред ние да го купиме земјиштето, кое беше објавено во јавна понуда во порталите за недвижнини кое како такво го привлече нашиот интерес.

Проектот е подржан од Европска комерцијална банка која подржува исклучиво зелени проекти согласно Европската програма за заштита на животната средина.

Ние најодговорно тврдиме пред целата јавност дека прибавивме правосилно одобрение за градба во целосно законита и пролонгирана постапка од причина што истата страна изразуваше сомнеж за намерата и вршеше притисок како кон нас како домашен инвеститор така и кон институциите кои не подлегнаа кон истиот затоа што беа соочени со барања за селективна примена односно непримена на законите. До денес истиот притисок континуирано продолжува и нанесува огромни штети по работењето на компанијата.

Овој проект е подржан од Европска комерцијална банка која подржува исклучиво зелени проекти согласно Европската програма за заштита на животната средина.

Овие луѓе очигледно се изманипулирани од одреден извор кој поради некаков интерес има намера да ни нанесе штета со што ја довел оваа група во тешка заблуда за да се истата чуствува загрижена за личното здравје и живот и под страв за истото прибегнува кон кршење на законите и бара истите да се применуваат селективно. Не е прв пат група луѓе да се изманипулирани и како такви доведени во заблуда за нарушени човечки права и да протестираат кршејќи закони со барања до институции за селективна примена на закони. Чести се примерите во градот реномирани домашни инвеститори и институции да се изложени на притисок преку испровоцирани валкани активности.

Сите чинители во случајот се одговорни да не создадат непотребна пракса по кој пример ќе се охрабрат локалните заедници на кои не им се по вкус одредени градби и истите по овој преседан бесконечно да ги блокираат со што ќе навлеземе во еден хаос од кој тешко ќе движиме напред.

Овие луѓе кои кршејќи ги законите ни ги оневозможуваат основните човекови права и ни нанесуваат ненадоместливи штети веќе подолг временски период и самите се жртви и заложници на таа црна кампања која и ним им е подметната од на нив познат извор од кој самите ќе мораат да се ослободат и да го повикаат на одговорност.

Не е грев човек да се најде доведен во заблуда, но грев и крајно неодговорно е да не се отстапи по воочување на аргументите и фактите кои се единствено мерило за вистината, по што очекуваме извинување за јавно нарушениот имиџ.

Веруваме во правната држава и институциите на државата и ќе продолжиме да бараме остварување на нашите права со сите расположливи правни лекови и никако поинаку.

Непотребна е грижата на заедницата во Визбегово затоа што во нас добиваат општествено одговорен сосед и силен партнер во борбата за унапредување на инфраструктурата и заштитата на животната средина.

Со почит,

Топ Билд Скопје

Македонија

Средба Муцунски - Филипиду: Натамошно унапредување на билатералните односи

Министерот за надворешни работи и надворешна трговија, Тимчо Муцунски оствари средба со амбасадорката на Грција, Софија Филипиду.

На средбата, Муцунски изрази уверување дека земјава е силно посветена на натамошно унапредување на билатералната, регионалната и мултилатералната соработка со Грција, пред сѐ како НАТО партнери и сојузници.

Воедно, министерот Муцунски истакна дека наш интерес е градење добрососедски односи во функција на безбедност, стабилност и просперитет на Регионот. Земјава останува определена кон натамошно унапредување на билатералните односи, преку отворен дијалог за сите прашања од заемен интерес, а во функција на нејзино збогатување со нови содржини и во полза на просперитетот и благосостојбата на граѓаните од двете земји.

Соговорниците, воедно, го реафирмираа интересот за интензивирање на економската соработка, дотолку повеќе што Грција е меѓу петте земји со кои Македонија оствари најголем обем на трговска размена во изминатата година, соопшти МНР.

Македонија

Кисела Вода: Бесплатни ранчиња за првачињата и летен спортски камп за спортистите

Бесплатни ранчиња за првачињата и летен спортски камп за спортистите и социјално загрозeните деца.

И оваа година Општина Кисела Вода излегува со сет мерки за поддршка на основците и нивните семејства. Сите запишани првачиња ќе добијат бесплатен ранец со тетратки и прибор, а за младите спортисти и децата од социјален ризик, е обезбеден летен спортско едукативен камп.

-Грижата за нашите деца е секогаш поставена највисоко во листата приоритети што во овој тригодишен период сме го покажале преку многубројни проекти. Сакам да упатам апел до родителите кои годинава имаат провоодделенец да не купуваат чанти и ранци, прибор и тетратки, бидејќи тие им се обезбедени бесплатно преку нашиот проект “Ранче за секое прваче”. Сметам дека ова е значајна поддршка која на сите нив ќе им овозможи безгрижно и со радост да го дочекаат први септември. Воедно, сакам да информирам дека групите сочинети од спортисти од спортските клубови од општината со младински категории и основците од социјален ризик кон средината на август заминуваат бесплатно во Охрид. На брегот на езерото, цела седмица тие сите заедно ќе се рекреираат, ќе спортуваат и дружат во рамки на летниот спортско едукативен камп. На овој начин покрај промовирање на спортот и здравиот начин на живот, ги промовираме и еднаквите можности за сите деца без разлика на нивната финансиска состојба. Сетот мерки за поддршка не завршува тука. Преку бројни проекти ќе продолжиме да ги унапредуваме условите, што е наша обврска, но и големо задоволство-изјави градоначалникот Орце Ѓорѓиевски.

Регион

Бошњачките партии на Косово се жалат дека се под притисок за бугарска асимилација

Бугарија се обидува да креира бугарска заедница на Косово, обвинуваат тамошните бошњачки партии кои тврдат дека се прави асимилација преку нивното малцинство.

Им се нудело да се потпишат на документи дека се Бугари, па на тој начин им се отворал патот до студии и стипендии во Бугарија. Во истражување на Радио Слободна Европа, повикувајќи се на сведоштва од припадници на бошњачката заедница на Косово, пишува дека документите со променети податоци ги добивале од локалци, а комуникација со бугарските власти за пријавување на студенти од Косово на Универзитетите во Бугарија постоела уште од пред многу години.

Во Косово нема бугарска заедница и тоа ќе го покажат резултатите од пописот, тврди за Канал 5 косовската вицепремиерка Емилија Реџепи, која е дел од бошњачката Нова демократска партија.

За бугарски обиди за асимилација сведочат и други политички партии на Бошњаците.

„ Во Бугарија, во моментов, студираат 189 студенти, на сметка на Бугарија. Секој што се чувствува Бугарин ќе дојде во нашата канцеларија и само ќе каже дека е Бугарин. Ние нема да издаваме никаков сертификат. Денес сум Бугарин, утре пак ќе бидам Босанец. “, изјавил Адеми за РСЕ.

На пописот на населението на Косово кој заврши на 24 мај, имаше опција граѓаните да се изјаснуваат за графата „друга етничка припадност“ и да наведат конкретно која, а колку се изјасниле како Бугари се најавува дека ќе биде појасно на средината на овој месец.

Досега бугарските власти експлицитно бараа прифакање на заедницата од косовските институции, но од нив нема одговор ниту реакција на случувањата со документите кои водат до студентски привилегии во Бугарија.

За бугарска асимилација која се спроведува и официјално преку пописот на населението, обвинуваат и Македонците во Албанија, кадешто нашинците уверуваат дека во изминатиот период се нуделе пасоши, работа и други привилегии во Бугарија како земја-членка на Европската Унија. Инаку, на пописот во соседна Албанија бројот на Македонците е драстично намален, а на Бугарите од нула пред 10тина години сега е над 7.000.