Тик-ток анестезиологот Ваљон Дервиши кој пред три години стана познат во јавноста поради тоа што во живо снимаше и емитуваше пациентки од операциона сала на Гинекологија, по што беше уапсен и привремено остана без лиценцата за работа, сега ќе може да се врати и пак да работи како лекар во Клиниката во Тетово. Ова го овозможува судот кој откако призна вина при повторена постапка пресуди затворската казна од 15 да му ја намали на три месеци, а дел од делата „несовесно работење “ и „неовластено снимање“ биле преквалификувани. Од тетовската болница за Канал 5 посочија дека анестезиологот се уште не е вратен на работа, а Министерот Азир Алиу на прес-конференција кажа дека не е запознаен со случајот.

Ставот на тетовската клиника е дека анестезиологот не треба да се врати на работното место, но сепак, од нивната правна служба велат дека ќе мора да постапат по одлуката на судот.

„Не сме задоволни од донесената судска одлука и сметаме дека во конкретниот случај судовите не ги ценеле во доволна мера специфичноста на здравствената дејност, заштитата на правата на пациентите и јавниот интерес. Во однос на евентуално враќање на работникот на работа, установата ќе постапува исклучиво согласно закон, судските одлуки и важечките прописи.“

И од Лекарската комора од каде можат да му ја одземат лиценцата се повикуваат на судот кој не одлучил да му се забрани вршење на професијата. Оттаму тврдат дека поради ова немаат правна основа да му оневозможат да работи. Во однос на претходната одлука од пред три години да му се одземе лиценцата на седум години од Комората за Канал 5 велат дека таа никогаш не станала правосилна.

„Бидејќи со правосилна судска одлука на докторот не му е изречена мерка - забрана за вршење професија, а постапката за повредата на Кодексот на медицинска деонтологија што ја води Лекарската комора не е правосилно завршена, Комората во моментов нема правен основ за да ја одземе лиценцата за работа на д-р Дервиши.“

Во судските постапки ниту колегите, ниту сниманите пациентки не се приклучиле на кривичниот прогон, потврдува адвокатот на Клиниката во Тетово, Дарко Котески кој посочи дека последната надеж за преиспитување на институционалниот исход клиниката Тетово ја гледа во ревизија пред Врховниот суд кој засега се уште не постапил.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.