Од Алијансата за Канал 5 тврдат дека премиерот Албанец е предизборен трик на ДУИ, а-Алијансата како што вели генералниот секретар Арбен Таравари не би седнала ниту во иста влада со ДУИ.
Интегративците и натаму тврдат дека од ДУИ зависи кој ќе седне во идната влада, и оти останува условот за премиер Албанец. Насер Зибери вели тој е ставот на Ахмети, а Мала Речица е отворена за разговори со сите.
Иако официјално се молчи, зад сцената партиите веќе се во меѓусебни комуникации.
Социјалдемократите најавија дека преговорите ќе почнат веднаш по втори август, и дека мандатарот е Заев.
Доколку ДУИ не попушта од тврдите позиции засега во оптек се повеќе опции околу формирањето на владиното мнозинство и без ДУИ, во кои би можело евентуално да се смета и на гласовите на Левица. Апасиев досега беше дециден дека целта на партијата не е владата, но и дека тој не би колидирал со СДСМ, заклучно со синоќешната збунувачка објава на Фејсбук за таканаречена скопска платформа во која не се партиите на Албанците.
Ниту од ВМРО-ДПМНЕ не откриваат кои се нивните адути но по најавата дека влегуваат во процесот на преговори за идната влада од партијата и денеска повторија дека ќе разговараат со сите, но не и со СДСМ како што најави Мицкоски.
Засега и покрај оптимизмот и на СДСМ и на ВМРО-ДПМНЕ дека ќе ја формираат идната влада, не се исклучува ниту можноста од политичка криза , широка влада но и нови избори догодина во пакет со локалните.