Поранешниот претседател на Србија, сега лидер на опозициската Социјалдемократска партија (СДС), Борис Тадиќ, ја опиша состојбата на демократијата во Србија како катастрофална, предупредувајќи дека некои европски лидери им дозволиле на српските власти да ги уништат сите демократски институции во Србија, објави Ел Паис.

„И ако нема демократија во Србија, ова е проблем во целиот регион“, предупреди Тадиќ во интервју за шпанскиот „Ел Паис“, додавајќи дека тој не го разбира пристапот на Европската Унија кон Србија.

Коментирајќи ги протести што со месеци се одржуваа во Србија и бојкотот на претстојните избори најавени од дел од опозицијата, Тадиќ рече дека демократијата се распаѓа во Србија веќе седум години и дека единствениот начин за комуникација „со преостанатите демократски сили е да се земе предвид реалноста дека апсолутист, демагог денес владее популистички во Србија.“, осврнувајќи се на српскиот претседател Александар Вучиќ.

"Ние сме изложени на лажни вести 24 часа дневно , секој ден , и во вакви околности граѓаните не можат да имаат слободен избор. Во исто време, ако ги бојкотираме изборите, таквата сила ќе има уште повеќе пратеници. Од друга страна, давањето легитимност на овој процес е уште попроблематично", рече Тадиќ, чија проценка за Ел Паис ја објавија само неколку медиуми во Србија.

Тадиќ исто така предупреди дека Србија стана земја во која доминира само едно прашање - Косово.

"Признавањето на Косово ја отвора вратата на други региони во Европа за еднострана сецесија. Моите меѓународни соговорници често не ја разбраа темата за Косово и го игнорираа овој потенцијално домино ефект, и покрај тоа што ги молев сериозно да го сфатат ова прашање. Тие секогаш го игнорираа", рече Тадиќ, додавајќи дека тие „строго и цврсто“ ја продолжиле програмата за независно Косово.

Но, тие сега се шокирани кога се соочија со случаите на Крим, Јужна Осетија и Абхазија, изјави поранешниот српски претседател.

„Европа е полна со зони каде што може да се активира овој домино ефект, како Каталонија и Шкотска, но има слични чувствителни зони низ целиот свет. Сепак, меѓународните кругови продолжуваат да зборуваат дека Косово е поинаков случај“, рече Тадиќ.

Коментирајќи ја ситуацијата во рамките на ЕУ, Тадиќ рече дека зголемувањето на влијанието на Русија, Турција и Кина на Балканот е резултат на филозофијата на ЕУ дека без сопствена стратегија за консолидација, нема понатамошно проширување и тие не ја дефинирале таа стратегија веќе една деценија.

„Кина е поприсутна сега на Балканот отколку ЕУ. Во времето кога јас бев студент, во тогашна Југославија сонувавме за демократија и ЕУ. Се плашам дека тие соништа се распрснаа“, нагласи Тадиќ.