Кошарка

Светскиот шампион Шпанија прв противник на кошаркарите на Македонија во квалификациите за СП

Кошаркарската репрезентација на Македонија вечерва на домашен паркет во СЦ „Јане Сандански“ против бранителот на тронот Шпанија ги започнува квалификациите за Светското првенство 2023 година.

Дуелот во Јане Сандански стартува во 19 часот и 30 минути. Нашата подмладена селекција, во националниот тим ќе ги нема повредените Војдан Стојановски, Димитриевиќ, Ѓуровски, Младеновски, и искусниот Бојан Трајковски, по кратките подготовки во Скопје е подготвена за надигрување со големиот ривал кој во Скопје допатува без ѕвездите од Евролигата и од НБА тимовите.

Црвената фурија предводена од легендарниот стратег Скариоло во Скопје сепак ќе има силен тим предводен од играчи кои подолго време настапуваат во европските клупски натпреварување.

Македонските кошаркари и покрај суперквалитетниот противник велат дека сепак не размислуваат на предавање туку сметаат дека со поддршка од трибините ќе се обидат да го изненадат големиот фаворит, бранителот на светската круна Шпанија.

„Мислам дека секој натпревар мора да е посебна приказна за себе. Почнуваме со актуелниот светски првак, самото по себе, тоа говори за каква квалитетна репрезентација станува збор. Мора да бидеме најдобри доколку сакаме позитивен резултат на тој натпревар. Шпанија си е Шпанија, со кој состав и да дојде има квалитетни играчи.Како што напоменав, мора да сме максимално спремни и фокусирани во текот на целите 40 минути од натпреварот. Во спортот никогаш не се знае што ќе биде и што тој ќе ти донесе, така што ние ќе се бориме максимално и ако ни се даде можност и шанса да бидеме победници на овој натпревар“ изјави репрезентативецот Дамјан Стојановски за официјалниот сајт на федерацијата.

Денешниот натпревар во Скопје ќе биде првиот натпревар меѓу Македонија и Шпанија , на домашен паркет.

Инаку покрај супер квалитетната Шпанија противници на црвено жолтите во квалификациите за Светскиот шампионат се и репрезентациите на Украина и Грузија. Од нашата група само првите три селекции ќе обезбедан учество на Првенството во 2023.

Регион

Во Брисел продолжува дијалогот меѓу Белград и Приштина за употребата на динарот во Косово

Во Брисел денеска ќе продолжат разговорите во рамки на дијалогот меѓу Белград и Приштина, а се очекува повторно главна тема да биде одлуката на Централна банка на Косово да ја забрани употребата на динарот во Косово.

Тоа е петтата рунда од дијалогот за оваа одлука на официјална Приштина.

„Одиме со надеж дека ќе најдеме решение за динарот, иако не сум оптимист, имајќи ја предвид неподготвеноста на Приштина да бара решенија преку компромис“, рече Петар Петковиќ, директор на српската владина Канцеларија за Косово и Метохија.

Специјалниот пратеник на Европската Унија за дијалог меѓу Белград и Приштина, Мирослав Лајчак, во понеделникот изјави дека ќе биде домаќин на главните преговарачи на Белград и Приштина подоцна оваа недела за нова рунда разговори, со цел да се најде привремено решение за луѓето засегнати од одлуката на Централната банка на Косово да го укине динарот.

Свет

Американскиот Конгрес на 20 април ќе гласа за помошта за Украина и Израел

Претставничкиот дом на САД на 20 април ќе го одржи долгоочекуваното гласање за помош на Украина, Израел и Индо-Пацификот, изјави претседавачот Мајк Џонсон.

Гласањето е по повеќе од два месеци откако пакетот беше одобрен во Сенатот.

Надлежниот комитет претстави закон што ќе обезбеди 60,84 милијарди долари за Украина и регионалните партнери, од кои 23,2 милијарди долари ќе бидат искористени за обнова на резервите американско оружје и објектите.

Поддршката за Израел изнесува вкупно 26,38 милијарди долари, вклучително и средства за покривање на трошоците за американските воени операции како одговор на неодамнешните напади.

Средствата наменети за Индо-пацификот изнесуваат 8,12 милијарди долари.

Култура

Бесплатен влез во музеите и на локалитетите по повод Светскиот ден на спомениците и локалитети

По повод 18 Април, Светскиот ден на спомениците и археолошките локалитети, денеска е овозможен слободен влез во сите национални установи од областа на заштитата на културното наследство,.

По повод 18 Април, Светскиот ден на спомениците и археолошките локалитети, денеска е овозможен слободен влез во сите национални установи од областа на заштитата на културното наследство, кои ќе бидат отворени во текот на целиот ден, со што граѓаните ќе имаат можност да се запознаат со археолошките локалитети и спомениците низ државава.

Од Министерството за култура соопштија дека птворени ќе бидат вратите на националните установи: заводи и музеи во Битола, Штип, Охрид, Прилеп и во Струмица; Стоби и Хераклеја; Спомен-куќа на Тоше Проески; Археолошки музеј; Национална галерија со сите свои објекти; Музеј на современата уметност; Музеј на македонската борба; Историски музеј во Крушево; Музеј на албанската азбука; Уметничка галерија во Тетово; „Д-р Никола Незлобински“ во Струга; Музеј на Западна Македонија во НОВ – Кичево; Музеј на тетовскиот крај; Природонаучен музеј; Музеј на Северна Македонија; музеите во Куманово и во Гевгелија.

Меѓународниот совет за споменици и локалитети (ИКОМОС) во 1982 година го прогласи 18 Април за Светски ден на културното наследство, а ИКОМОС секоја година препорачува тема за прославата и активностите на тој ден организирани од страна на националните и меѓународните научни комитети.

Секоја година темите се актуелни, и се однесуваат на подигнување на свеста на јавноста за значењето на светското културно наследство, за заштитата, чувањето и афирмацијата на непроценливото богатство откриено преку археологијата.

Годинашна тема за Меѓународниот ден на спомениците и локалитетите, се додава во соопштението, е „Катастрофи и конфликти низ призмата на Венецијанската повелба“.

На тригодишното генерално собрание на ИКОМОС во 2023 година во Синдеј, темата „Наследство отпорно на катастрофи и конфликти – подготвеност, одговор и закрепнување“ беше избрана како тема за Тригодишниот научен план 2024 – 2027 година. За таа цел, ИКОМОС Македонија во текот на април го разгледува скопскиот земјотрес во 1963 година и неговиот ефект врз културното наследство низ призмата на годинашната тема.