Живот

Свети Никола без големи прослави, ама да помогне за здравје

За многу години да е Свети Никола, заштитникот на Прилеп и многу здравје. Сега ни е потребно како никогаш досега.

Ова е благословот што го разменуваат прилепчани за празникот свети Никола. Овој 19 декември, оваа 2020 година. Благослов за заштитникот на градот, за светецот познат по безграничната заштита на децата, на болните, сиромашните, на морепловците. И за неофицијалниот „Дедо мраз".

Петнаесет години официјално Прилеп го има како заштитник. Неофицијално, е вековит голем празник. И не случајно од памтивека е изреката: половина прилепчани го слават свети Никола како куќна слава, а другата половина им оди на гости. И не случајно – прилепските домаќинки надалеку се познати со уникатното приготвување на малите посни сарми. Колку ноктот од прстот. Колку помали, толку побисерни, повкусни, повпечатливи, поголем доказ за домаќинлакот. Пред 10-ина години тие влегоа и во Гинисовата книга на рекорди.

Но, годинава сѐ е поинаку, како никогаш досега. Пандемијата ни ги промени, во многу нешта, животот и начинот на живеење, секојдневието, функционирањето. Посебно празнувањето.

Лилјана Ѓорѓиоска е претседателка на здружението на жени „Преродба". Со години ги одржуваат, потсетуваат, на традиционалните обичаи за сите празници. Вели, традицијата на одржала низ вековите, ама во неволја, а времињата се такви, уште повеќе. Пред еден месец ја помина голготата со корона-вирусот. Не беше во лоша форма, ама поради другите заболувања и астмата, поминала тешки денови и премрежја. Ама сега, фала му на Бога, вели, здрава сум. Со носталгија се сеќава на, до лани, сите адети за приготвувањето на 60, 70, па и 80 000 мали посни сарми. За сите прилепчани, за адет. Голема беше софрата среде град; сите да каснат посен грав, мали сармички, риба, за благослов. Празникот свети Никола е за дарување.

– Се чувствувам добро. И здраво, колку може. Тоа е најбитно. Ама носталгијата, традицијата, адетите, ме влечат. Годинава сѐ е поинаку. Прво здравјето, па сѐ друго. Досега сфаќавме „здраво за готово". Ама не е ни малку шега, напротив, крајно немилосрден е вирусот. Сега се чувствувам здраво, па да побараме заштита и во традицијата, адетите, но и во, најголема мера, претпазливоста. Пред очи ми се сликите на заедничката светиниколска посна трпеза, на радоста, заедништвото. Ми недостасуваат. Но, и тоа ќе го има. Ама сега, прво, здравјето. Здравје, па традиција, па… кој знае. Дај Боже да сме на нога, здрави, живи и умот да не крепи, вели Ѓорѓиеска.

Градските власти и секоја година – кумовите за прославата на свети Никола, веќе кажаа – нема заеднички ручек. Ќе има благословување на погачата во црквата „Свето Благовештение" и пред Параклисот во центарот на градот, ама собирање и групирање – нема.

-Ќе бидеме дел од литургијата во најпознатата прилепска црква, „Свето Благовештение". Адетите ќе бидат и пред параклисот во центарот на градот. Ама, нема заеднички ручек за сите во центарот, на булеварот, туку, секој дома, со семејството да прослави. Мора да го чуваме здравјето. Се надеваме до година пак ќе биде како досега, вели прилепскиот градоначалник Илија Јованоски.

И домаќинот, прилепската фирма „Футура" ќе си го чува кумството за догодина. Сите надежи се дека ќе бидат заедно, со посен ручек за свети Никола и заеднички благослови.

Здружението „Преродба", кое заедно со другите и со здружението „Мајка традиција" беа главни – за приготвувањето на малите посни сарми, за домаќинските препораки како да се слави свети Никола, сега со пораки и аманети. Оти, ги нема собирањата на 30-ината жени од здружението, два-три дена со песни и благослови, да ги виткаат малите посни сарми. Но, традицијата ќе продолжи.

– Поради приликите и заштитата на здравјето, по две-три жени во домашна атмосфера ќе ги свиткаме малите посни сарми. Ќе запееме за радост, за здравје. Тоа многу ни значи во ова време-невреме. Ни го одржува духот, психолошки помага да се намали притисокот. И секако, ги упатуваме сите пораки за добро здравје, вели Лилјана Ѓорѓиеска од здружението на жени „Преродба.

Прилепчани остануваат со адетите. Со месеци се порачките во рибарниците, се приготвија посните сарми, се свари посното гравче. Секој во домашна атмосфера, во кругот на семејството.

– За свети Никола, само најблиските. И да сме еден или двајца на трпезата, за слвата – секако ќе има посна сарма, грав, риба. Тоа е и благословот. Прво здравје, сите да сме на број, па бериќет и подобра година. Оваа што поскоро да замине, порачуваат прилепчани.

Скромно и со одговорно празнување, прилепчани остануваат со традициите и адетите. За свети Никола, во кругот на семејството. Најбитно е семејството да е здраво, живо, на број. Прославите ќе ни стигнат, Дајбоже, догодина.

За прилепчани во ова време-невреме не мора да има собири. Ама, ќе остане традицијата која ги одржала низ вековите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Малиот булдог Каси им го спаси животот на своите сопственици- загина во борба со разбеснета мечка

Омилениот француски булдог на една двојка умре обидувајќи се да ги спаси своите сопственици од разбеснета мечка откако дивото животно ги нападна во дворот на нивниот дом во руралните делови на Северна Калифорнија.

Џеф и Мелори Вилсон биле во нивниот дом во округот Тринити кога нивното куче Каси само еднаш лаело. Доцна ноќното лаење го натера Џеф да излезе надвор и да го провери дворот, објави Њујорк Пост.

Само што ја отвори вратата, Каси слезе од терасата, а зад мебелот од градината се појави мечка . Мечката потоа го нападна Џеф и го собори на подот.

Несвесен за фаталниот напад, Мелори се разбудил од вревата и излегол надвор да провери што се случува. Мечката потоа ја нападна и неа, нанесувајќи и тешки повреди на лицето и телото.

Во еден момент од нападот, мечката со устата го фатила Каси и почнала да бега. Мелори фрли стол кон мечката, поради што ја испушти Каси. Џеф потоа ја турнал грејачот на градината кон мечката, по што животното конечно побегнало.

Двојката верува дека мечката испаничила откако била закачена меѓу мала ограда околу куќата и отворена порта.

„Мислам дека мечката беше изненадена од нас исто како и ние од неа“, рече Џеф.

Двојката итно ја однела Каси на операција за да ѝ ги санира повеќекратните рани од каснување и длабоките исеченици по должината на 'рбетот. Кога по два дена сама почнала да оди и да пие вода, почувствувале наплив на надеж дека ќе закрепне. Трагично, таа починала следното утро.

California couple brutally mauled by bear before their tiny French Bulldog Cassie dies saving them https://t.co/VSUiuF7i6i https://t.co/JWzDiCsfDD
— New York Post (@nypost) September 24, 2026

Според страницата GoFundMe што ја започнала Рејчел Москоне, пријателка на парот веќе 20 години, Џеф се здобил со две скршени ребра, како и бројни рани од каснување и канџи, додека Мелори претрпела тешки повреди на главата и лицето, скршена рака и дополнителни рани од каснување и убоди.

„Каси се фрли меѓу Џеф и мечката во обид да го заштити“, рече Москон.

Таа додаде дека 7,5-годишната женка француски булдог била сакана членка на семејството Вилсон и „кога на Џеф му била најпотребна, ова мало куче храбро застанало меѓу него и мечката“.

„Таа никогаш не требаше да биде херој, таа не беше наш чувар.

Двојката одлучила да живее во рурална Северна Калифорнија за да биде поблиску до природата и нејзиниот див свет и биле уништени од нападот.

„Ова беше неиспровоциран и крајно необичен состанок што никој од нас не можеше да го предвиди. Можеме да тагуваме за Каси и да бидеме скршени од она што се случи, додека сè уште го почитуваме дивиот свет што припаѓа на овие места“, рече парот.

Тагови: булдог мечка

Шоу биз

Сите гледаа во Дакота Џонсон- на премиера во Лондон се појави во прѕирен фустан (ФОТО)

Дакота Џонсон вчера вечер се појави на лондонската премиера на „Verity“ во проѕирен фустан од чипка под кој се гледаше долната облека.

Актерката избра беж фустан направен од нежна чипка од дизајнерката Колин Ален за црвениот тепих. Креацијата имаше длабоко деколте со јака слична на шал и крој без ракави. Под проѕирниот фустан, 36-годишната Џонсон носеше контрастна црна долна облека од Fleur du Mal.

Изгледот го комплетираше со нејзината препознатлива права кафеава коса, црн маникир и златен ѓердан, нараквица и неколку прстени.

На премиерата, таа позираше и со Џош Хартнет, со кого глуми во нов психолошки трилер. Во филмот глуми и Ен Хатавеј. За настанот, Хартнет избра црно одело без вратоврска, широки панталони и модерна кроена јакна.

Проѕирните фустани станаа нејзин заштитен знак

Џонсон е веќе позната по изборот на транспарентни материјали за формални настани. На премиерата на филмот „Madame Web“ во Лос Анџелес во 2024 година, таа носеше мрежест фустан од Гучи украсен со кристали, под кој носеше долна облека во боја на кожа.

Во текот на септември 2025 година, таа двапати носеше транспарентни креации. Прво, таа избра црн фустан од чипка со цветен вез за вечерата „Грижа за жените“ на Фондацијата Керинг, а потоа светло виолетов фустан од Гучи на Филмскиот фестивал во Цирих.

На Меѓународниот филмски фестивал Црвено Море во декември 2025 година, таа носеше бел фустан од чипка со длабоко деколте од Клое.

„Се чувствувам убаво во нив, затоа ги носам“

Кога во октомври 2025 година германскиот Вог ја праша дали се грижи дека нејзините фустани се „премногу секси“, Џонсон одговори дека „едноставно не е загрижена“.

„Имав можност да носам некои од најубавите фустани и се чувствувам убаво во нив, затоа ги носам“, изјави таа за списанието.

Тагови: Дакота Џонсон

Европа

Паника во Берлин: Маж почина, повеќе лица се затруени со гумени бонбони

Повеќе луѓе во Берлин биле сериозно отруени, а еден 42-годишен маж почина откако консумирал гумени бомбони за кои се верува дека содржат THC.

Берлинската здравствена служба издаде итно предупредување за опасните слатки. Властите истражуваат три поврзани случаи и се сомневаат дека сите жртви претходно јаделе THC бомбони, пишува БИЛД.

Најлошиот регистриран случај се случил на 22 септември во берлинскиот округ Нојкелн. На Киницер Штрасе, службите за итни случаи пронашле 42-годишен маж со срцев удар во 10:26 часот наутро. „Беше извршена реанимација, но за жал не беше успешна. Телото на починатиот беше предадено на берлинската полиција“, изјави портпарол на надлежната служба за БИЛД. Постојат индикации дека овој маж ги консумирал и спорните гумени бомбони пред неговата смрт.

Четири дена претходно, на 18 септември, беа пријавени два случаи на истата адреса во округот Фридрихшајн во Берлин. Пожарникарите прво интервенирале на Миленштрасе во 10:43 часот наутро поради 30-годишна жена со тешко нарушување на свеста. Според првичните информации, и таа јадела бомбони со THC. Малку повеќе од еден час подоцна, брзата помош пронашла 40-годишен маж со идентични симптоми на истата адреса.

Двајца биле успешно третирани

Двајцата биле пренесени во болница. Сите инциденти биле пријавени во Берлинската здравствена служба. Неговата портпаролка Дерте Арнолд потврдила за БИЛД дека се регистрирани неколку случаи во кои луѓето по консумирање на гумени бонбони со THC имале „различни степени на интоксикација со клиничка слика на опиоиден токсидром“.

Симптомите се во согласност со труење со опиоиди како што се фентанил, хероин, морфиум, оксикодон или метадон. Типични знаци вклучуваат конфузија или губење на свеста, бавно и плитко дишење и зеници со големина на глава на шпенадла. Во најтешките случаи, може да се случи прекин на дишењето и смрт.

Арнолд додаде дека Здравствената служба веднаш ги предупредила градските окрузи, клиниките и советувалиштата за опасностите од ваквите производи. Сè уште не е прецизно утврдено за која супстанца станува збор. Според информациите од BILD, двајца преживеани пациенти биле успешно третирани со налоксон. Станува збор за лек кој ги поништува ефектите на опиоидите и може брзо да ја запре респираторната депресија што е опасна по живот.

Тагови: Берлин гумени бонбони