Култура

Свечено отворање на 58. издание на Фестивалот „Охридско лето“

Охрид од вечерва се до 20 август ќе ги живее своите 40 дена возбуда што ги носи Фестивалот „Охридско лето“.

Повеќе од 800 уметници од 27 земји од целиот свет по 58-ми пат наредните месец и половина ќе музицираат, глумат, творат на неколкуте фестивалски сцени во Охрид...

Во текот на престојните фестивалски вечери, „Охридско лето“ ќе донесе совршен спој на музиката, театрот и воопшто на уметноста. Ќе настапат звучни имиња од светот на музиката, но и најдобрите театарски продукции со извонредни драмски проекти. Предвидени се и три изложби, ликовна, изложба на фотографии и на современ накит.

Свеченото отворање на нашата најзначајна музичко-сценска манифестација традиционално започнува на големата сцена на Античкиот театар. Овојпат сцената на Антички резервирана за големите оперски ѕвезди, сопранистката Елена Мошуц и тенорот Калин Братеску, под диригентската палка на Николае Молдовеану и во придружба на оркестарот на Македонската филхармонија.

Фестивалот за отворен ќе го прогласи покровителот на манифестацијата, претседателот на државата Ѓорге Иванов, а обраќање пред публиката на отворањето ќе има и министерот за култура на Република Македонија, Асаф Адеми. Уметничката порака годинава ќе ја пренесе познатиот македонски актер Никола Ристановски.

Уметниците Мошуц, Братеску и Молдовеану кои се веќе тука најавија масимално вложување и незаборавно искуство и концерт за паметење вечерва на Антички.

Оперската певица Елена Мошуц, која важи за еден од најразновидните и најекспресивните сопрани во светот, во обраќањето пред медиумите и јавноста во Македонија рече дека е благодарна што ќе биде дел од фестивал со долгогодишна традиција на кој настапувале светски познати уметнички имиња.

- Природата тука и луѓето се прекрасни, со нетрпение го очекуваме утрешниот концерт. Програмата ја избравме заеднички со колегата Братеску. Поради временските ограничувања односно должината на концертот од еден час, избравме оперски дела за поширока публика така што очекуваме добар прием кај публиката, рече таа.

Маестро Николае Молдовеану кој веќе имаше проби со уметниците од Македонската филхармонија, рече дека за отворањето на „Охридско лето“ е избрана програма во чиј репертоар се најубавите италијански и француски арии за сопран, тенор и дуо.

- Секој концерт на отворено не е само уметнички настан, туку културен феномен што остава можности за дополнително поврзување на уметниците со публиката. Во време на политички тензии на континентот, концертите на отворено носат радост и чувство на слобода како за публиката така и за нас уметниците. Благодарни сме што ни е дадена таа привилегија да бидеме тука за вас и со задоволство ве очекуваме, истакна Молдовеану, изразувајќи уверување дека и временските услови ќе придонесат за незаборавен концерт и неповторливо искуство.

Шефот на оркестарот на Македонската филхармонија, Горан Муратовски, изрази задоволство, но додаде дека е и голема чест што Македонската филхармонија е традиционален гостин на фестивалот „Охридско лето“.

- Оваа година ја имаме честа да го отвориме фестивалот. Задоволство е да се соработува со уметници од ваков калибар, со извонредниот диригент маестро Молдовеану, со оперската дива Мошуц и тенорот Братеску. На свечното отворање на Антички театар очекуваме голем спектакл, рече Муратовски.

Градоначалникот на Општина Охрид, Јован Стојаноски, вчера на прес-конференцијата по повод отворањето на „Охридско лето“ најави дека општината и натаму ќе ја дава безрезервната поддршка на фестивалот како голем македонски и европски културен бренд.

- На сите уметници коишто ќе присуствуваат во Охрид им посакувам топло добредојде, да си поминат убаво во нашиот град, и да придонесат за уште едно успешно издание на фестивалот „Охридско лето“. Како Локална самоуправа отсекогаш сме го поддржувале овој фестивал, а тоа ќе продолжи и понатаму заради тоа што НУ „Охридско лето“ е најпознатиот бренд којшто го претставува и го зацртува Охрид како културна дестинација во светот, рече охридскиот градоначалник Јован Стојаноски.

Како посебни доживувања на 58-то фестивалско издание се очекуваат концертите на пијанистот Николај Лугански, челистот Александар Књазев, виолинистот Сергеј Крилов, потоа пијанистот Александар Маџар, виртуозот на усна хармоника Антонио Серано, акапела-секстетот „Д’Квин Сикс“ од Велика Британија, како и неколку концерти што ќе се реализираат во соработка со амбасадите во Македонија. Традиционалната Полска вечер на фестивалот ќе донесе концерт на барокниот ансамбл „Вроцлав“, во рамки на Француската вечер ќе настапат светски познатиот пијанист Мишел Бурдонкле и неговиот син Николас, а во соработка со Амбасадата на Шпанија во Скопје ќе настапи сопранистката Еугенија Боикс и пијанистката Ана Ферер.

Драмската програма започнува еден ден по свеченото отворање, а ќе понуди театарски креации од домашните театарски куќи, како и гостувања на театри од Србија, Хрватска и Словенија.

По традиција, во рамки на „Охридско лето“ ќе настапат и голем број домашни уметници од Македонската филхармонија, Македонската опера и балет и Музичката младина на Македонија.

Според в.д. директорката на „Охридско лето“ Сузана Вренцовска, сите сцени и простори каде што годинава ќе се одржуваат музичко-сценските настани на фестивалот се оспособени за уметниците, како и за посетителите кои секоја година ги има во голем број, а како што најави, од следната година е планирана изградба на монтажно гледалиште кое ќе може да се поставува насекаде, со што ќе можат да се одржуваат настани на секое соодветно место во градот.

Фестивалот „Охридско лето“ се одржува со финансиска поддршка на Министерството закултура на Република Македонија, а помогнат од Општина Охрид, како и од бројни спонзори.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

МВР: И ти си дел од безбедноста!

Безбедноста во сообраќајот е заедничка одговорност. Не е доволно само да очекуваме другите да внимаваат – мора да внимаваме и самите.

Телефонот, слушалките, невнимателното преминување на улицата или намалената видливост можат да бидат ризик кога сме пешаци.

Во рамки на глобалната кампања ROADPOL „Денови на безбедноста“ (16–22 септември), потсетуваме:

Како пешак, одговорноста за твојата безбедност не е само на возачите.

И ТВОЈА Е!

Погледни. Слушни. Внимавај.

Секој учесник во сообраќајот има улога во создавањето побезбедни патишта, соопштуваат од МВР.

Македонија

Лефков: ВМРО-ДПМНЕ ја креира иднината на Македонија, а СДС шири хистерија и за дата центрите

Миле Лефков, член на ИК на ВМРО-ДПМНЕ и пратеник, во вечерашното гостување во „Вести Плус“ на Канал 5 Телевизија, изјави дека јавноста е запознаена со концептот на постоење на дата центри.

Миле Лефков, член на ИК на ВМРО-ДПМНЕ и пратеник, во вечерашното гостување во „Вести Плус“ на Канал 5 Телевизија, изјави дека јавноста е запознаена со концептот на постоење на дата центри и дека истите претставуваат дел од она што се нарекува дигитална инфраструктура и претставуваат иднина. Истовремено, Лефков посочи дека „ВМРО-ДПМНЕ и Владата на ВМРО-ДПМНЕ не се плаши од иднината, напротив ја планира и ја предвидува и ја води Македонија да биде една современа држава во секој облик“.

Пратеникот Лефков истакна дека дата центрите како дел од дигиталната инфраструктура се значајни од повеќе аспекти: од создавање на високо платени работни места, трансфер на знаење и технологии, како и изградба на една квалитетна дигитална инфраструктура, додека опозицијата пласира тези од пред неколку декади ширејќи хистерии во јавноста.

„За жал СДС предводен од Венко Филипче одбра уште еднаш да шири хистерии за оваа тема, обидувајќи се да скандализира и притоа користејќи тези коишто датираат од пред неколку декади, зборува за електрична енергија, за тоа дека ќе биде експлоатирана водата, напротив Владата на ВМРО-ДПМНЕ одговорно пристапува кон овие проекти и нема да бидат направени на штета на животната средина, на ниту еден начин“, рече Лефков.

Лефков ја потенцираше разликата којашто треба да се прави помеѓу дата центрите како приватни инвестиции и дата центрите како национална обврска, кои впрочем се дел од Реформската агенда, и обврска на Република Македонија е изградба на Национален дата центар, додека хистеријата и стравот околу овие дата центри конструирани од опозицијата има за цел спречување на, како што вели Лефков, растот и развојот на Македонија во оваа насока.

„Во Македонија веќе постојат, ако погледнете и ако пребарувате, ќе видите дека постојат 4 до 5 дата центри, самите дата центри се разликуваат, дали се за чување на податоци, дали се за некои други намени, меѓутоа станува збор за искривување на тезите и обид за ширење на хистерија“, кажа Лефков и додаде:

„Ако станува збор за национални дата центри, тој Национален дата центар којшто треба и е дел од Реформската Агенда има само една цел, а тоа е да го олесни пристапот на граѓаните кон услугите на државата.“

Пратеникот Лефков потсети дека за време на владеењето на СДС, јавноста сведочеше на хакерски и сајбер напади и на ФЗО и на Министерството за земјоделие, при што граѓаните не можеа да ги остварат нивните уставни и законски загарантирани права, додека пак изградбата на квалитетни дата центри има за цел да биде и поддршка при давањето на услугите што ги нуди државата.

„Во нивно време кога имаше хакерски и сајбер напади и на ФЗО и на Министерството за земјоделие, граѓаните не можеа да ги остварат основните права, дали за субвенции кај Министерството за земјоделие, дали станува збор за одредени права од ФЗО. Со изградба на квалитетни дата центри коишто ќе бидат поддршка на овие услуги кои ги нуди државата, користа и бенефитот ќе ги видат граѓаните, а тоа е целта и на Европската агенда, на тој начин се усогласуваме со законодавството и со стандардот на ЕУ, со нудење на квалитетни услуги, транспарентни услуги, со подобро менаџирање на јавните финансии итн.“, заврши Лефков.

Свет

Бројот на жртвите на границата меѓу Непал и Кина се зголеми на 919, околу 4.800 се исчезнати

Бројот на жртви од катастрофалните поплави и лизгања на земјиштето по должината на непалско-кинеската граница се искачи на најмалку 919, а речиси 4.800 лица се уште се водат како исчезнати.

Бројот на жртви од катастрофалните поплави и лизгања на земјиштето по должината на непалско-кинеската граница се искачи на најмалку 919, а речиси 4.800 лица се уште се водат како исчезнати, вклучувајќи 853 странци, шест дена по катастрофата, соопштија властите денес.

Непалскиот орган за намалување и управување со ризици од катастрофи соопшти дека во земјата се потврдени 903 смртни случаи, додека 4.247 лица, вклучувајќи 592 странци, се уште се водат како исчезнати.

Операциите за пребарување и спасување продолжуваат во погодените области, додека властите се обидуваат да стигнат до работниците заробени во неколку хидроенергетски проекти.

Меѓу исчезнатите на непалската страна се 25 припадници на непалската полиција, 45 припадници на армијата, 13 припадници на непалските вооружени полициски сили, 14 царински службеници на Непал и тројца службеници за имиграција. 933 лица се исто така водат како исчезнати во бројни хидроенергетски проекти во Непал.

Додадено е дека меѓу исчезнатите се 127 непалски патници, објави Анадолу.

Од кинеска страна, потврдени се 16 смртни случаи, додека 546 лица сè уште се водат како исчезнати во округот Џиронг во автономниот регион Сизанг во југозападна Кина, објави државната новинска агенција Синхуа.

Меѓу исчезнатите има 261 странски државјани.

Според консолидираните податоци, бројот на жртви изнесува 919, додека 4.793 лица се водат како исчезнати, вклучувајќи 853 странски државјани.

Кина распореди повеќе од 2.100 луѓе во операциите за пребарување и спасување, заедно со стотици возила и илјадници парчиња опрема за спасување.

Катастрофата се случи на 26 август кога глечер на планината Лангтанг Лирунг во Непал, на надморска височина од околу 5.200 метри, пукна, предизвикувајќи лавина од мраз и карпи што се претвори во огромен пороен тек од остатоци и се прошири низ долините по должината на границата. Огромниот воден бран, проследен со лизгање на земјиштето, ги опустоши непалските области Расува, Нувакот, Дадинг и Кавре, како и долината Катманду, додека од кинеска страна граничната област Џиронг беше затрупана.

Тагови: Непал