Македонија

Студентарија реагира: Повторно стотици студенти неосновано го изгубија правото на субвенциониран студентски оброк

Овој месец, на стотици студенти во државата неосновано им беше прекинато правото на субвенциониран студентски оброк, при што најголем дел од погодените студенти овој пат се од Факултетот за безбедност при Универзитетот „Св. Климент Охридски“-Битола..

Во известувањата што студентите ги добиле како причина за прекинот е наведено дека „не се редовни студенти“, иако тие уредно го имаат овој статус и ги исполнуваат законските услови за користење на правото. Според информациите со кои располагаме, причината за настанатиот проблем е тоа што факултетот не доставил навремено ажурирани податоци за редовните студенти до Министерството за образование и наука - обврска која високообразовните установи ја имаат секој месец.

Како последица на тоа, на студентите автоматски им е прекинато правото на субвенциониран студентски оброк. Дополнително загрижува фактот што, и покрај тоа што факултетот подоцна доставил ажурирани листи со студенти кои ги исполнуваат условите, Министерството не прифаќа ажурирање на податоците за тековниот месец. Со тоа, студентите остануваат без финансиски средства кои законски им следуваат, без притоа да имаат каква било вина за настанатата состојба.

На секој од засегнатите студенти овој месец му се одземени по 3.640 денари (26 дена по 140 денари) – средства кои за многу од нив претставуваат значајна поддршка за покривање на секојдневните трошоци за исхрана. Ова не е првпат студентите да го изгубат правото на субвенциониран студентски оброк поради административни пропусти.

Речиси секој месец од почетокот на академската година, студенти од различни факултети се соочуваат со истата ситуација - факултетите не ги доставуваат податоците навреме, а Министерството не дозволува нивно дополнително ажурирање. На крајот, последиците секогаш ги трпат студентите.

Наместо системот да ги заштити оние на кои им следува ова право, студентите остануваат без финансиска поддршка поради административни пропусти врз кои немаат никакво влијание. Го повикуваме Министерството за образование и наука итно да ја преиспита одлуката за прекин на правото на субвенциониран студентски оброк и да изнајде начин за исплата на средствата на студентите од Факултетот за безбедност кои ги исполнуваат законските услови за користење на ова право.

Сметаме дека студентите не смеат да бидат оштетени поради пропусти за кои не сносат никаква одговорност. Во текот на оваа академска година, поради ваквите случаи, на студентите им беа одземени милиони денари кои останаа во државниот буџет, иако станува збор за средства кои законски им следуваат на младите.

Поради тоа, повикуваме и Министерството за образование и наука и високообразовните установи итно да изнајдат соодветно системско решение кое ќе овозможи навремена размена и корекција на податоците, со цел од почетокот на следната академска година да се спречат вакви ситуации.

Студентите не смеат да бидат казнувани за административни пропусти на институциите. Правото на субвенциониран студентски оброк мора да биде гарантирано за сите студенти кои ги исполнуваат законските услови, без исклучок и без ризик да го изгубат поради туѓи грешки.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Манасиевски: Со што е уценет Филипче за да направи ново предавство на Македонија?

Гледајќи низ призмата на историјата, најголемите предавства ги има направено СДС.

Од менување на име, знаме, Устав, за денес повторно СДС да се спремни за ново предавство на чело со Филипче.

Овој пат не било какво предавство туку најстрашното за македонскиот народ, а тоа е редефинирање на историјата, негирање на јазикот и идентитетот.

Се она што сме го учеле и пренесувале од колено на колено, Филипче и СДС се спремни да го променат.

Филипче и СДС утре би потпишале дека постоиме од 1945 година.

И без разлика на тоа што конечно ЕУ не гледа како достоинствена држава, со напредна економија, која е сериозна во намерите да успее во реформите и да биде пример во регионот, Румен Радев, Венко Филипче и СДС повикуваат на уставни измени.

За Радев ни е јасно, меѓутоа со што е уценет Филипче за да води таква политика?

Наместо да застане во одбрана на македонските интереси, тој ги распродава.

Почитувани граѓани, добро е да се потсетиме зошто СДС и Филипче се во опозиција. Затоа што одат по стапките на Заев. Затоа рејтингот им е колку една шака и ќе бидат декласирани на следни избори.

Валентин Манасиевски, портпарол на ВМРО-ДПМНЕ

Со почит,

Центар за комуникации на ВМРО-ДПМНЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

РКЕ: Бензините поевтинуваат за 2 денари, дизелот поскап за 1,5 денари

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 0,46% .

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 0,46% во однос на одлуката од 1.6.2026 година.

Референтните цени на нафтените деривати на светскиот пазар во споредба со претходната пресметка бележат намалување и тоа во просек: кај бензините за 3,175%, кај дизелот има зголемување за 3,367%, кај екстра лесното масло има зголемување за 2,386% и кај мазутот има намалување за 1,488 %.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,1617%.

Од 9.6.2026 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС - 95 86,00 (денари/литар)

Моторен бензин ЕУРОСУПЕР БС - 98 88,00 (денари/литар)

Дизел гориво ЕУРОДИЗЕЛ БС (Д-Е V) 87,00 (денари/литар)

Масло за горење Екстра лесно 1 (ЕЛ-1) 89,00 (денари/литар)

Мазут М-1 НС 47,297 (денари/килограм)

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 2,00 ден/лит.

Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,50 ден/лит.

Малопродажната цена на Мазутот М-1 НС се намалува за 0,609 ден/кг и сега ќе изнесува 47,297 ден/кг.

Напоменуваме дека ова се максималните цени на нафтените деривати од 00:01 часот на 9.6.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Тагови: бензините

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Кузеска: „Скопската иницијатива“ и платформа „Твоја држава, твоја шанса“ - СДСМ отвори ново поглавје за иднината на Македонија

Со „Скопската иницијатива“ и платформата „Твоја држава, твоја шанса“ СДСМ започнува нова етапа на политичко дејствување.

Етапа заснована на вредностите на социјалдемократијата, борбата за подобар животен стандард, борба против корупцијата и за европска иднина за Македонија.

Програмската платформа „Твоја држава, твоја шанса“ во конечната форма е јавно достапна и објавена. Тоа е визијата на СДСМ за модерна, праведна и европска држава во која институциите работат за граѓаните, трудот е вреднуван, а младите имаат причина да останат и да ја градат својата иднина дома.

Во време кога илјадници млади луѓе ја напуштаат државата во потрага по подобри можности, платформата нуди конкретни политики за нивна поддршка: пристап до достоинствено вработување, повисоки плати, достапно домување, квалитетно образование, модерни студентски стандарди и еднакви можности за развој без партиски книшки и врски.

СДСМ смета дека најголемиот предизвик за младите денес не е само економската несигурност, туку чувството дека системот не е праведен. Токму затоа централно место во платформата има борбата против корупцијата и воспоставувањето систем во кој институциите функционираат без политичко влијание а законот важи еднакво за сите.

Нов антикорупциски закон, темелен ветинг на сите избрани и именувани функционери, целосна проверка на потеклото на имотот, нови институциите за борба против корупцијата, дигитализација на услугите и воспоставување механизми што ќе спречат партизација и злоупотреба.

Платформата нуди решенија за економските предизвици со кои се соочуваат граѓаните: поголеми плати и пензии, заштита на работничките права, фер и правично оданочување, поддршка на домашното производство, подобра социјална заштита, образование, поддршка на земјоделците.

Преку „Скопската иницијатива“, СДСМ ја потврди својата улога како обединувачки фактор на поширокото прогресивно движење во регионот и Европа, кое се спротивставува на корупцијата, авторитарноста и антиевропските политики.

Европа не е апстрактна политичка цел, туку подобар живот дома, повисоки плати, владеење на правото и повеќе шанси за секој човек.

Македонија не смее да остане заглавена во национализам, популизам и политички манипулации кои ја оддалечуваат од европската иднина.

Наместо поделби, СДСМ нуди визија за обединување околу државните интереси, економски развој и европски вредности преку поширок Фронт за вистина и правда.

Фронтот за вистина и правда не е партиски проект туку широко надпартиско - општествено движење отворено за сите граѓани, организации, интелектуалци, професионалци, синдикати и општествени чинители.

Прес конференција на СДСМ, Богданка Кузеска – портпаролка и членка на Извшрниот одбор

Скопје, 08.06.2026

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.