Стратешко партнерство и формирање на Европска економска зона, наместо членство за Западен Балкан – ова според европската иницијатива за стабилност е идејата за која во Брисел се размислува, како на компромис за да се надминат разликите во ЕУ, по блокадата на Макрон за Македонија и Албанија.Учество на заедничкиот европски пазар веќе користат Исланд и Норвешка, а членството во оваа група, според европската иницијатива за стабилност, не значи и идно членство во Унијата.
,,ЕУ треба да им понуди на сите шест држави на Западен Балкан можност за пристапување во единствениот пазар, како Норвешка и Исланд. Тоа значи дека треба радикално да се реформира методологијата за проценка на напредокот. Овој однос не гарантира идно пристапување кон Унијата – во денешно време и ништо не може да го гарантира тоа. Но, ги прави сите идни дебати за членство кредибилни, кога ќе дојде време за тоа. – се вели во предлогот на Европската иницијатива за стабилност.
Од таму додаваат дека ваквата економска зона ги опфаќа сите клучни области важни за потенцијални инвеститори, слободен проток на луѓе, добра и идеи, а со тоа би се испратила порака до граѓаните во земјите од регионот дека границите и изолацијата можат да се надминат. Предлогот според нив би се комбинирал и со финансиски награди за државите кои напредуваат во сите сектори.
,,Земјите што ги кршат основните човекови права или им се закануваат на нивните соседи може да бидат исклучени или суспендирани – што треба да одговори на барањето за реверзибилноста кое го постави Макрон. Овој процес треба да се стави на маса на самитот во Загреб во мај 2020 на кои ќе бидат шесте земји од Западен Балкан.
Премиерот Заев пак вели дека за да има таква понуда, таа треба да е формализирана од ЕУ, во делот од понудата за земјава. Изрази надеж дека дебатата за новата методологија за членство ќе биде набрзо утврдена во ЕК.
Во текстот од Европската иницијата за стабилност се додава и дека не доделувањето на датумот за Македонија е неправедно кон земјава, но тоа според нив може да биде шанса за нешто поверодостојно, по фер и трансформативно.