Македонија

Стоилковиќ се обрати на панел-дискусијата „Ги градиме темелите на промените. За твоето време кое доаѓа“

Обраќање на вицепремиерот и министер за односи меѓу заедниците Иван Стоилковиќ на панел-дискусијата „Ги градиме темелите на промените. За твоето време кое доаѓа“.

На денешната панел-дискусија „Ги градиме темелите на промените. За твоето време кое доаѓа“ одржана по повод една година Влада, вицепремиерот и министер за односи меѓу заедниците Иван Стоилковиќ зборуваше за затекнатите проблеми при стапувањето на функцијата во МОЗ, но и за тоа што сѐ е направено во изминатиот период.

Обраќањето ви го испраќаме во целост:

- Кога ќе го слушнете премиерот како зборува дека затекнавме држава со разрушени темели, тоа најдобро може да се отслика во состојбата која ја затекнав во Министерството за односи меѓу заедниците. Од проста причина што таму не постоеше ниту програма за работа ниту документи за внатрешна работа. Едноставно работата се одвивала, да не речам, надвор од правилата и прописите, надвор од законите и Уставот на нашата држава.

Така, она што прво успеавме и што видовме дека треба да се направи беше да усвоиме Стратешки план за работа. Стратешкиот план за работа предвидува активности на Министерството во однос на стабилизација на меѓунационалните односи, од една страна, и воспоставување на политичка стабилност на државата како неопходен услов за економски развој. Кога го завршивме тој процес и кога ги воспоставивме и внатрешните документи за работа и донесовме и програма, работите почнаа полека да се одвиваат. Она што би требало посебно да се истакне, тука доаѓам до делот од работењето на Министерството, е дека од времето на претходниот министер до денеска, односно до Буџетот со кој јас управувам, трошоците се намалени за 60 %, значи сите непродуктивни трошоци се укинати и сѐ што на некој начин било резултат на претходно неодговорно работење повеќе не постои. Тоа се огледа не само во тоа што е дел од мојата обврска, туку и делот од внатрешните реформи во Министерството.

Трета работа која сметам дека, исто така, е многу битна е дека навлеговме потполно во реализација на програмата нема седење дома, а примање плата на Советот за реформа на јавната администрација. Така, од 296 вработени кои ги затекнав во Министерството по различни основи веќе 112 не се вработени во Министерството на различни начини, по различни основи. Да не бидам сфатен погрешно, тие 112 луѓе не се во Министерството на законски начин, зашто МОЗ сѐ уште нема добиено ниту една поплака, ниту жалба, ниту тужба во однос на одлуките кои ги донело. Од тој аспект ни останаа уште 79 такви лица, а тие процеси се во тек и се надеваме дека до крајот на годината ќе можеме да го затвориме и тоа поглавје од работата на Министерството и тоа да остане со некаде 80-90 вработени што сметам дека е некоја рационална бројка за едно Министерството со таква одговорност.

Успеавме да донесеме нова програма за одбележување на деновите на националните заедници и мислам дека веќе кај припадниците на помалите етнички заедници се чувствува промената и таа е мошне сериозна. И тука ќе продолжиме со активности. Имавме пречки на почетокот, меѓутоа полека но сигурно како поминува времето ги отстрануваме истите и се надеваме дека тие активности ќе земаат замав во добра насока.

И последната работа за која би сакал да зборувам, тоа е конкурсот за финансирање здруженија и невладини организации затоа што во еден дел имаше реакции во јавноста зошто средствата се распределни на тој начин. Веќе одговорив на некој начин, но сметам дека на македонската јавност треба уште еднаш да ѝ се каже - бидејќи е време на реформи, бидејќи е време на комплетни промени и она што беше повеќе не треба да биде така, и дека суштината на Министерството е сосема променета и освен за припадниците на помалите етнички заедници мораме да се погрижиме и за некои темелни определби на државата како што е борбата против корупцијата и сл., што мораат да бидат дел од тие програмски определби.

И она што е најбитно, сите сметаат дека министерот носи интерни одлуки за распределба на средствата, што во овој момент не е случај, себеси намерно се исклучив од процесот на донесување одлука и одлуката ја препуштив на комисија која се состои од седум члена, претставници на скоро сите министерства. Од моето Министерство претставник беше припадник на бошњачката заедница, имаше еден припадник на влашката заедница, двајца Албанци и тројца Македонци, тоа е сѐ што се однесува до транспарентноста и до тоа дека водиме грижа за тоа како ќе се распределат средствата за да се избегнат сите коментари дека како и во претходниот период министерот ги користел своите овластувања, па спротивно на препораките си ги менувал одлуките за доделување средства како што ќе си посакал. Во изминатиот период имавме доделување средства на 33 организации од една национална заедница што е сосема неприфатливо, па од тој аспект разликата е огромна и многу видлива.

И на крајот, она што би сакал да го потенцирам, е дека толку сме го напреднале функционирањето на Министерството што секој кој се појави после мене на тоа место мислам дека ќе навлезе во една добро уредена куќа, со солидни темели каде ќе може да продолжи да живее непречено и да си ја врши својата работа.

Благодарам.

Тагови: Стоилковиќ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Филипче: 3% не е доволно зголемување - пензионерите немаат за да го преживеат месецот

Зголемувањето на пензиите од околу 3% не е доволно зголемување за пензионерите да го преживеат месецот и да имаат достоинствен живот, нагласи претседателот на СДСМ, д-р Венко Филипче, по средбата со пензионери во скопската општина Карпош.

Филипче посочи дека во услови на огромен раст на цените и сите трошоци за живот, пензионерите се соочуваат со сериозен удар врз нивниот стандард, а власта не носи никакви мерки за да им помогне.

„Пензионерите никако не може да го почувствуваат зголемувањето, имајќи предвид дека зголемување од под 3%, не е доволно да се преживее месецот на толкав голем раст на сите цени, на толкав голем раст на горивата. На ваков удар на стандардот кој што се случува изминатите месеци, на пензионерите навистина има потребна поголема поддршка“, рече Филипче.

Тој посочи дека загриженоста кај пензионерите не се однесува само на пензиите, туку и на севкупните состојби во државата и политиките на власта кои директно влијаат врз животниот стандард.

„Меѓутоа и како наша најстара категорија на граѓани, тие се загрижени и за многу други работи, загрижени се за севкупните случувања во земјата, загрижени се за тоа што е загрозен европски пат, загрижени се за тоа што земјава е презадолжена, загрижени се за сите други лоши политики во однос на стандардот, економијата, финансiите, свесни се дека и нивните деца, навистина, лошо и тешко живеат, загрижени се затоа што огромен број од нив бараат излез и спас надвор од државата“, рече Филипче.

Скопје, 29.09.2026

СДСМ

Култура

Концерт за незаборав: „Вечното ехо на Бадев“ ги оживува безвременските македонски мелоди

Музичко патување исполнето со емоции, традиција и длабока почит кон македонскиот музички идентитет ја очекува публиката на претстојниот концерт со наслов „Вечното ехо на Бадев“.

Овој посебен музички настап е посветен на ликот и делото на еден од најголемите бардови на македонската народна песна-Никола Бадев. Неговите песни, кои децении го пренесуваат духот на македонскиот народ, оваа вечер ќе заживеат преку современи и автентични интерпретации, потсетувајќи не зашто неговиот глас останува вечно врежан во нашата културна меморија.

На сцената ќе настапат хорот и солистите на ансамбл „Танец“ и врвни домашни музички и вокални изведувач, придружувани од оркестарот на ансамбл „Танец“, ќе ги изведат најпознатите бисери од неговиот богат опус.

Датум: 16.10.2026 година

Локација: Македонски народен театар

Време: 19:30 часот

Влезници: kupikarta.com

Европа

Единствената земја-членка на ЕУ со нуклеарно оружје изведе симулација на нуклеарен напад

Француските воздухопловни и вселенски сили изведоа симулација на нуклеарен напад како дел од воената вежба „Покер“.

Операцијата започна од воздухопловните бази Сен-Дизје и Таверни, кои играат клучна улога во француските нуклеарни сили. Сен-Дизје ја поддржува воздушната компонента на нуклеарното одвраќање, додека во Таверни се сместени командните и оперативните центри на стратешките сили.

Во вежбата учествуваа борбени авиони „Рафал“.

„Користиме вистинска опрема и следиме реални процедури во многу сложени услови, со околу 50 летала во воздух. Единственото ограничување е тоа што не летаме со вистински нуклеарни боеви глави под крилјата“, изјавија припадници на француската војска.

Наместо вистински нуклеарни ракети „ASMP-A“, авионите „Рафал“ носеа инертни макети што одговараа на тежината и димензиите на вистинското оружје. Овие макети можат безбедно да се отфрлат доколку е потребно. Ракетата има максимален дострел од приближно 500 километри и носи нуклеарна боева глава „TNA“ со јачина од 300 килотони.

Сценарио и цели на вежбата

Во симулацијата учествуваа два тима: тимот „Црвени“ го претставуваше непријателот, додека тимот „Сини“ дејствуваше против нив. „Целта е да се осигураме дека ќе останеме способни да извршиме таква мисија во иднина, дури и додека технологијата се развива со сè поголема брзина“, објаснија претставници на француската војска.

Екипажите имаа задача да ја пробијат непријателската одбрана и да ги испорачаат ракетите на прецизни локации во одреден временски рок. За време на ноќниот лет, кој траеше меѓу шест и осум часа, секој екипаж на „Рафал“ неколку пати се полнеше со гориво од еден од 15-те авиони-цистерни. Притоа, пилотот на борбениот авион мора да маневрира при многу големи брзини и на мали височини.

„Целта е одвраќање“

„Целта на нашата мисија е да се спречи војна, а со тоа и употреба на нуклеарно оружје. ’Покер’ е демонстрација на сила, осмислена токму за да се осигура дека тоа нема да се случи“, објасни командантот Жан-Батист, кој ја стекна потребната квалификација преку учеството во вежбата. Тој додаде дека секој пилот мора да учествува во најмалку една таква операција секоја година.

Франција располага со три воздухопловни бази со нуклеарна намена: Сен-Дизје, Истр и Авор. Исто така, планира наскоро повторно да ја активира базата Ликсеј за идните авиони „Рафал Ф5“. Наредбите до базите пристигнуваат од далечина – поточно, од бункер во базата Таверни, која се наоѓа на околу 200 километри од Сен-Дизје. Во тој бункер е сместен команден центар каде што постојано се стационирани околу четириесет припадници на воениот персонал. Франција моментално е единствената држава со нуклеарно оружје во Европската Унија, а во неколку наврати се разговараше за можноста нејзината нуклеарна заштита да се прошири на целиот блок. Франција воспостави систем на „проширена“ нуклеарна одвраќачка моќ, кон кој веќе се приклучија голем број држави.

Извор: Индекс.хр

Тагови: ЕУ нуклеарен напад Франција