Ја спорат одлуката за забрана на основање на јавно претпријатие за улично осветлување која треба да стапи на сила деновиве, откако ќе биде објавена во Службен весник. Таков е случајот со градоначалниците на Аеродром, Кисела вода и на Тетово. Муцунски вели дека одлуката е спротивна на три закони, па иако во изјава за Канал 5 не прецизираше дали ќе ја почитува и како ќе постапи со јавното претпијатие кое општината веќе го формирала, тврди дека не се правеле злоупотреби, туку со него, за еден месец се заштедиле два милиона денари.

И градоначалникот на Кисела вода Орце Ѓеорѓиевски вели дека вака се штеди, па во одговор за Канал 5 посочува дека „единствениот закон кој ќе го почитува во однос на јавното осветлување е Законот за Енергетика“.

-Не гледам зошто, ако Законот за енергетика ни овозможува заштеда на парични средства, ние да постапуваме по некаков друг закон донесен од страна на Владата – вели - Орце Ѓеорѓиевски – Градоначалник на Кисела вода.

Во иста насока се ставовите на тетовскиот градоначалник Биљал Касами кој посочи оти нема да дозволи владините одлуки да им наштетат на граѓаните, па правда ќе бара и на суд.

-Доколку локалната самоуправа биде спречена ќе барам заштитата од судските власти.Поднесовме барање до Централен регистар, претходно се консултиравме во ЗЕЛС и ги следевме препораките на надлежното регулаторно тело. Нема да дозволиме со неразумните одлуки на владата граѓаните да бидат оштетени, рече Касами.

Од Владата пак се децидни, одлуката е донесена во кризна состојба заради спречување на злоупотреби и манипулации при обезбедување на универзална услуга на пазарот на електрична енергија. Општините кои имаат основано јавни претпријатија откако одлуката ќе стапи на сила ќе имаат рок од осум дена за да ги избришат од Централниот регистар.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.