Најголем дел од нив, како што велат, се вселиле пред 4 години. Иако во нивните преддоговори било експлицитно наведено дека имотните листови ќе ги добијат веднаш штом им биде предаден станот, тоа се уште не се случило. Станарите велат дека проблемот е поради немањето употребна дозвола и технички прием на објектот.

Она што дополнително ги загрижува била безбедноста во самиот објект – како на пример за 400 станари во 120 станови има само еден влез и еден лифт.

-Имотните листови се први и најважни да ги имаме затоа што без имотни листови ние немаме никаква документација, никој од нас не може да си ги оствари правата за докоментација, за патна исправа, за лична карта за возачка дозвола. Некој може сака да го продаде станот, не му се живее тука ништо од тоа не може да оствариме. Ние немаме никаков противпожарен систем ниту за дојава, ниту црева, ниту хидранти ништо немаме буквално. Не дај боже да се запали нешто ќе гледате страшна трагедија,- Слободан Стојков.

-Јас точно го платив станот 28 декември 2016 година. Денеска сме 25 година април месец јас немам никаков имотен лист. Освен имотните листови нас втор приоритет ни е безбедноста во зградата. Ние фактички фунционираме со едни скали 400 лица, имаме еден лифт за кој што се уште не сме ни сигурни дали има некаква техничка употребна дозвола,- Бранкица Анѓелевска.

Станарите се пожалија и дека од самото вселување во зградата затекнале хаотична состојба, неостранети градежни материјали, недовршени инсталации, проблеми со подрумските бунари за вода кои самите делумно ги санирале, а за кое велат, вложиле иљадници евра.

За случајот во тек се 15 тина судски спорови кои се во тек. Според застапникот на станарите Јанаки Митровски изведувачот со години на различни начини се обидувал да ги избегне своите законски обврски.

-Истиот е цело време со оправдување дека не е можно да ги заврши што од недостиг на средства, што од други причини, а има средства за 15 постапки да ангажира адвокатска канцеларија и воедно се служи со едни перфидни и евтини штосови, а тоа е да отвара пред стечајна постапка. Јанаки Митровски.

Изведувачот на објектот Мулти Офис ДООЕЛ категорично ги негира наводите на станарите, а уписот во Катастар бил пролонгиран поради некомплетирани согласности од банките. Тврди дека за зградата поседуваат целосна градежно-техничка документација.

-Се работи за зграда со станови на кои има станбени кредити и извшитeли од банка под стечај. Од триесетина станари останати се уште неколку кои се во процес на рефинансирање на нивните кредити во други банки, а ние сме во постојан контакт со нив. Напоменуваме за да може една зграда да се впише во Катастар, треба да има согласност од сите банки даватели на станбени кредити и не смее да има постапки пред извршител. Од страна на нашата фирма во тој влез поставивме противпожарни средства според проект, меѓутоа истите за многу кратко време се украдени. Сметаме дека судот е тој што треба да ја подели правдата, а никако не изјавите на станарите кои напоменувам дека се во потполност неточни. – соопштија за Канал 5 од Мулти ОФИС ДООЕЛ.

Станарите велат дека по дописот до сега одговор добиле од ЗЕЛС. Оттаму им било посочено дека за случајот е известен Управниот инспекторат, но инспектори на терен се уште немало. Токму од ЗЕЛС по пожарот во Кочани, најавија засилени вонредни инспекциски контроли и проверка на противпожарните средства во стамбените објекти во земјава.

Само во о.Карпош, досегашната контрола покажа дека 1 од 800 згради ги исполнувала законските прописи за безбедност.