Сопственик на ресторани се откажал од својата плата и им донирал 5 милиони долари на вработените

Кент Тејлор, сопственик и основач на ланецот за брза храна Texas Roadhouse, се откажа од својата годишна плата и бонуси и донира уште 5 милиони долари за да им помогне на своите вработени за да ја преживеат пандемијата.

Тој обезбедил маски, нараквици и заштита на очите за вработените во сите негови ресторани, од кои има скоро 600. Се откажа од својата годишна плата и бонус од 800.000 американски долари и плати дополнителни 5 милиони долари во фондот за итни случаи, кој го основал пред 18 години за да им помогне на своите вработени.

Неговата донација им помогна на сите вработени да ги задржат своите работни места и целосна плата за време на пандемијата на коронавирус.

"Јас бев израснат на тој начин. Го направив она што чувствував дека треба. Во моменти како овие, мора да бидете упорни, да размислувате поинаку, да се грижите за оние што се со вас, да им го кренете моралот на сите и да напредувате", изјави Тилор за магазинот People.

Тој, исто така, објасни зошто основал фонд за помош, пред 18 години.

„Го сторивме ова за да се грижиме за нашите луѓе кои можеби изгубиле некој близок и им требаат пари за погреб или да платат за операција. Луѓето повремено плаќале донации за да им помогнат на оние кои се во криза“, рече тој. .

Во последните месеци, Кент забележал дека фондот започнал да се празни, па решил да го преполни.

"Јас имам 64 години. Сметам дека сите под 55 години се деца. Кога имате 70.000 деца, сакате да се грижите за нив. Ги сметам за мое семејство и сакам да се грижам за моето семејство. Така ги гледам", рече тој.

Тој потсети колку му било тешко во раните 90-ти кога само што започнал бизнисот и морал да се потпира на родителите со кои живеел за финансиска поддршка.

"Кога ви е тешко, ви останува во вашата глава. Многу луѓе мислат дека заборават, но тоа секогаш останува во вашата глава. Подоцна во животот, сакате да му вратите нешто на општеството", заклучил тој.

Затворени гласачките места

Во  21 часот се затворени избирачките места на кои граѓаните на Македонија можеа да гласаат на предвремените парламентрани избори. 

По затворањето на избирачките места ќе можат да гласаат само лицата кои во тој момент се затекнале во објектот каде што се гласа.

На денешните десети парламентарни избори, а петти предвремени избори право на глас имаа 1.814.263 граѓани, кои гласаа на 3.480 избирачки места. Овие избори се издвојуваат од досега одржаните во земјата бидејќи се организираат во состојба на пандемија на коронавирусот, гласањето за различни категории граѓани е три дена, а денешниот изборен ден трае два часа повеќе од вообичаеното и е прогласен за неработен.

Избирачките места во шесте изборни единици беа отворени во 7:00 часот, а гласањето заврши во 21 часот. Се гласаше за 15 политички партии и коалиции кои вкупно имаат 1.578 кандидати. Од нив, според статистиката на ДИК, 675 (42,78 отсто) се жени, а 903 (57,22 отсто) се мажи.

Денешниот изборен ден, според претседателот на Државната изборна комисија (ДИК) Оливер Дерковски помина мирно, со мали, спорадични инциденти, без нарушувања на изборниот процес.

До 19 часот на гласање излегле 830.370 граѓани со право на глас односно одѕивот е 45,77 проценти.

Сите вклучени во процесот и граѓаните кои одеа на гласање задолжително мораа да ги почитуваат превентивните мерки за заштита од ширење на коронавирусот, а тоа се носење маска, држење растојание од метар до метар и половина, дезинфекција на раце при влез и при изле од гласачкото место.

Освен спецификата поврзана со коронавирусот, на овие избори првпат е дозволено да гласаат и лицата кои до 15 јули наполниле 18 години и се со важечки документи и не се организира гласање во дијаспората бидејќи немаше доволен број пријавени македонски државјани за гласање. Сепак, овие лица доколку беа во земјата денеска можеа да гласаат на избирачките места на адресата на која што се пријавени.

Вчера гласаа болните, немоќните и хронично болните лица, затворениците, лицата во домашен притвор и во старските домови. Според податоците од ДИК, вчера вкупно 7.861 болни и немоќни лица го оствариле правото на глас. Што се однесува до лицата кои се наоѓаат во домови за вонсемејна грижа, од вкупно 357 пријавени избирачи во оваа категорија, гласале 234, а во казнено поправни установи 1.235 лица.

Гласањето за овие избори почна во понеделникот, кога гласаа лицата со Ковид-19 и во самоизолација. Правото на глас го искористиле 723 лица заболени од Ковид-19 и во самоизолација.

Од гласањето во понеделникот и вчера ДИК не објавува резултати, туку само бројка на излезност. Ливчињата остануваат запечатени во пликоата кои се наоѓаат во гласачките кутии до денот на изборите, односно до завршување на гласањето.

Првичните резултати од гласањето ДИК ги објавува во рок од 12 часа, а конечните 24 часа по завршувањето на гласањето.

Предвремените парламентарни избори во Македонија беа закажани за 12 април, но поради пандемијата со коронавируот и вонредната состојба беа одложени со Уредба со законска сила и одлука на ДИК. Потоа во договор меѓу политичките партии беше избран датумот 15 јули.

Изборите се одржуваат во ситуацијата кога во земјата недели наназад има троцифрени бројки на позитивни со коронавирусот. Но, Македонија е без Парламент од февруари година, а ја предводи техничка влада чија првенствена задача, според Пржинскиот договор, требаше да биде организирање фер и демократски избори.

Денешните предвремени парламентарни избори во Македонија ги следеа 2.709 домашни и странски набљудувачи. За изборите известуваа 57 странски новинари од 15 медиумски куќи, акредитирани од ДИК./МИА

Продолжува и утре сослушувањето на Тачи во Хаг

Трет ден по ред ,претседателот на Косово, Хашим Тачи е сослушуван во Специјалното обвинителство во Хаг, пренесува „Косово онлајн“.

По сослушувањето, кое траело скоро седум часа, Тачи не разговарал со новинарите.

Тачи утре ќе се појави во Специјалното јавно обвинителство во Хаг, каде ќе продолжи интервјуто со него, јавува приштинската телевизија Клан Косово.

Тачи од понеделник е на распит во Хаг во врска со обвинението за воени злосторства и злосторства против човештвото извршени на Косово.

Специјалното обвинителство на Косово, со седиште во Хаг, поднесе обвинение по десет точки, на 24-ти јуни, во кое се обвинети Тачи, лидерот на Демократската партија на Косово, Кадри Весељи и други, за голем број злосторства против човештвото и воени злосторства, вклучително и убиства, присилно исчезнување, прогон и мачење.

Во обвинението се тврди дека Тачи, Весељи и другите осомничени во обвинението се кривично одговорни за скоро 100 убиства.

Тачи мина повеќе од 12 часа во понеделникот и вторникот во зградата на судот во Хаг, заедно со неговите адвокати.

На првиот ден по сослушувањето, тој изјави дека цело време ги слушал техничките прашања поставени од претставниците на обвинителството и неговиот законски застапник, додека тој вчера не се обратил до новинарите.

Специјалното обвинителство сè уште не се огласи за престојот на Тачи во Хаг.

притисни ентер