Со длабока тага ја примив веста за страшната трагедија, Владата е целосно мобилизирана и ќе стори се што потребно за да се справи со последиците и да се утврдат причините за тоа што се случи – напиша премиерот Христијан Мицкоски за кобната вечер во Кочани, кој изрази длабоко сочувство до семејствата на загинатите. Најави дека откако ќе ги согледа околностите од институциите ќе се обрати на јавноста со повеќе детали за чекорите кои се преземени.

-Ова е тежок и многу тажен ден за Македонија! Загубата на толку многу млади животи е ненадоместлива, а болката на семејствата, на најблиските и пријателите е неизмерна. Во овие моменти на длабока тага, нашите мисли се со оние што ги загубија своите сакани. На повредените им посакувам брзо закрепнување, а на семејствата на загинатите – сила да ја издржат оваа незамислива загуба. Народот и Владата ќе направат сè што е во нивна можност барем малку да ја ублажат нивната болка и да им помогнат во овие најтешки мигови, стои во објавата на премиерот на социјалните мрежи премиерот. Воедно повика на заедништво, сплотеност, хуманост и одговорност, а упати повик и до сите надлежни институции да преземат итни мерки секаде каде што е потребно.

На обединување повика и претседателот на опозициската Венко Филипче, кој се понуди како лекар да помогне за повредените од пожарот.

-Во овој момент на длабока тага, сакам да изразам најискрено сочувство до семејствата кои изгубија најблиски и да им посакам брзо закрепнување на повредените. Во вакви моменти, единствено што е важно е солидарноста и поддршката. Како лекар, стојам на располагање за секој вид помош што можам да ја дадам во оваа тешка ситуација. Сега не е време за поделби, туку за обединување во тагата и во напорите да помогнеме, напиша Филипче.

Сочувство упати и американската амбасадорка во земјава Анџела Агелер.

„ Срцето утрово ми се кине за многуте жртви во синоќешниот пожар во ноќен клуб во Кочани. Нашето најдлабоко сочувство оди до жртвите и нивните најблиски во ова страшно време, а на повредените им посакуваме брзо закрепнување. Загубата на толку многу млади животи во една заедница е страшна трагедија. Му понудив секаква помош и целосни ресурси на Амбасадата на САД на премиерот, како и нашите молитви за сите оние кои страдаат денес. “

Се огласија и неколку политички партии – ЛДП и Демократски сојуз бараат уште веднаш длабока истрага и одговорност за сите кои придонеле да се случи ваква голема трагедија. Градоначалници пак ги ставаат на располагање сите нивни општински ресурси за помош.