Илјадници демонстранти во Тирана бараат оставка од премиерот Еди Рама и прекин на сите работи, велејќи под слоганот „Албанија не е на продажба“ дека нема да се откажат додека не се исполнат нивните барања, пренесува Анадолу.

Протестниот марш во главниот град започна од плоштадот Скендербег кон Булеварот на националните херои и застана пред канцеларијата на албанскиот премиер.

Носејќи национални знамиња и транспаренти со антивладини пораки, демонстрантите најавија дека ќе продолжат со своите протести.

Протестите не се ограничени само на Тирана. Слични собири се организирани и во други градови низ земјата во последните денови, а протестираа и Албанци што живеат во неколку европски земји.

Серијата протести беше предизвикана од инцидент што се случи на 30 мај во областа Звернец.

Според снимките објавени на социјалните мрежи, обезбедувањето на приватна компанија влечело граѓанин, што предизвикало бунт и предизвикало бран протести во Тирана.

Тврдења дека контроверзниот проект е поврзан со Џаред Кушнер, зет на американски претседател Доналд Трамп, исто така се појавија во јавноста во последните денови.

Во оваа прилика, премиерот Еди Рама изјави дека проектот во Звернец се спроведува во согласност со сите законски и еколошки процедури.

Сепак, тој призна дека сè уште нема конечен проект, ниту пак е подготвена комплетна студија за влијанието врз животната средина.

Албанските медиуми објавија дека Специјалното обвинителство за борба против корупцијата и организираниот криминал (СПАК) започнало истрага за случајот Звернец, но од обвинителството сè уште нема официјално соопштение.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Со свечена воена церемонија во касарната „Страшо Пинџур“ во Петровец, воздухопловниот ВИНГ го одбележа 10 Јуни – Денот на единицата, ден кој симболично го одбележува првиот воен лет во историјата на Армијата во 1992 година и кој денес е институционален белег на военото воздухопловство на Армијата.

На свеченоста присуствуваа: началникот на Генералштабот на Армијата генерал-мајор Сашко Лафчиски, заменик-министерот за одбрана Адмир Шабани, заменикот на началникот на Генералштабот генерал-мајор Азим Нуредин, командантот на Командата за операции бригаден генерал Мирче Ѓоргоски, претставници на Министерството за одбрана, Генералштабот на Армијата и Командата за операции, поранешни команданти на воздухопловниот ВИНГ, претставници на дипломатскиот и воено-дипломатскиот кор, локалната самоуправа, како и бројни гости и соработници на единицата.

Командантот на Командата за операции бригаден генерал Мирче Ѓоргоски во своето обраќање им го честиташе денот на единицата на припадниците на Воздухопловниот ВИНГ истакнувајќи „ Благодарение на вашата посветеност, воздухопловниот ВИНГ денес претставува клучен капацитет на Армијата и исклучително значаен чинител во системот на националната и колективната безбедност“. При тоа додаде дека следува модернизација и опремување на воздухопловниот ВИНГ со најсофистицирани борбени системи и опрема, кои значително ќе придонесат за зголемување на оперативните способности, мобилноста и борбената готовност на единицата.

Во своето обраќање, командантот на воздухопловниот ВИНГ, полковник Драган Павловски се осврна на постигнатите резултати и развојот на единицата во изминатиот период, истакнувајќи дека воздухопловниот ВИНГ останува цврсто посветен на унапредувањето на своите способности, исполнувањето на националните и сојузничките обврски и развојот на персоналот како најважен ресурс на единицата. Тој нагласи дека за успешна реализација на досегашните и идните проекти и иницијативи очекува поддршка од секој офицер, подофицер, војник и цивилно лице, во насока на исполнување на преземените обврски и постигнување понатамошни успеси во развојот на военото воздухопловство на Армијата.

Во рамките на свеченоста беа врачени признанија и стимулативни мерки на припадниците кои со својата работа, резултати и професионален однос се издвоиле во извршувањето на задачите и дале значаен придонес во функционирањето и развојот на единицата.

Програмата беше дополнета со прелет на воздухопловите од составот на воздухопловниот ВИНГ, како и со прелет на воздухоплови Ф-16 од Военото воздухопловство на Република Грција и воздухоплови „Eurofighter Typhoon“ од Република Италија, реализиран во рамките на редовните активности за воздушно патролирање во регионот.

Во рамките на свеченоста беше реализирано и церемонијално предавање на првото борбено знаме на Баталјонот за воздушно набљудување и јавување, при што началникот на Генералштабот на Армијата, генерал-мајор Сашко Лафчиски, му го предаде военото знаме на командантот на баталјонот. Овој чин претставува симбол на довербата, одговорноста и посветеноста во извршувањето на мисијата, како и потврда за значењето на единицата во рамките на системот за командување, контрола и воздухопловна поддршка.

Дополнително, одбранбеното аташе на Соединетите Американски Држави, полковник Даниел Сквајерс, му врачи признание на командантот на воздухопловниот ВИНГ, полковник Драган Павловски, доделено од страна на Военото воздухопловство на САД. Признанието му е доделено за стекнување со највисоки воени лидерски позиции во военото воздухопловство.

Во деновите пред одбележувањето на Денот на единицата беа реализирани повеќе спортски, хуманитарни и комеморативни активности. Припадниците на воздухопловниот ВИНГ организираа крводарителска и хуманитарна акција, спортски натпревари и положија свежо цвеќе во чест на трагично загинатите припадници на единицата, оддавајќи почит кон нивната служба, пожртвуваност и придонес во развојот на военото воздухопловство.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Изградбата на втората делница од железничката пруга кон Бугарија, на потегот Бељаковце–Крива Паланка, напредува со засилена динамика, станува збор за еден од најкомплексните и најголеми инфраструктурни проекти што се реализирaaт во Македонија, истакна заменик претседателот на Владата и министер за транспорт Александар Николоски кој заедно со дитекторот на ЈП МЖ Инфраструктура и претставници од изведувачот Ѓулермак извршија увид на градежните работи на трасата.

Вицепремиерот Николоски при посетата истакна дека проектот претставува инженерско достигнување, пругата е дел од стратешкиот НАТО Коридор 8, кој ја поврзува Македонија со Бугарија и Црното Море.

-Се работи за исклучително предизвикувачки проект кој опфаќа изградба нови три станици, Кратово, Романовце и Гиновце, 29 мостови, 15 тунели, шест надвозници, три подвозници. Имајќи ја предвид конфигурацијата на теренот, ова ќе биде железница на која возовите ќе сообраќаат со брзина од 100 до 120 километри на час, што во вакви услови е навистина одлично решение, изјави Николоски.

Тој нагласи дека мостовите што се градат претставуваат инженерско чудо, со столбови високи до 61 метар, што е повеќе од двојно повисоко од просечна осумкатна станбена зграда.

-Највисокиот столб кој што се гради е цели 61 метар. Само за споредба, просечна зграда, некаде од 7-8 ката, е во висина од 24-25метри, што значи дека тука зборуваме за згради кои што би биле од 10-20 ката, кога овие столбови би ги преселиле во една урбана средина, потенцираше министерот Николоски.

Во рамки на проектот ќе бидат вградени десетици илјади тони арматура и вкупно 125.000 кубни метри бетон. Николоски информираше дека напредокот кај конструктивните работи достигнал 31 процент, додека вкупната реализација на проектот е 36 проценти.

-Очекувам до октомври 2028 година тука веќе да оперираат возови. Ова е дел од Коридорот 8 источно крило, по изградбата на втората делница секако ќе ја градиме и третата. За истата во соработка со Европската инвестициска банка, ЕБОР и ЕУ од каде што имаме грант, сакам да се заблагодарам. Веќе е објавен тендер за избор на Надзорен орган, а очекувам во следните неколку недели, во соработка со ЕБОР и ЕУ, да го објавиме и тендерот за изведба, како би можеле конечно Македонија со пруга да ја поврземе со Бугарија, односно Скопје да го поврземе со Софија, а оттаму и со Црното Море, додаде вицепремиерот Николоски.

Тој потсети дека Коридорот 8 е прогласен од НАТО за втор најзначаен безбедносен коридор и има големо геостратешко значење за регионот, на кој меѓународните партнери на земјава се особено посветени.

На крајот, Николоски упати благодарност до премиерот Мицкоски, Министерството за финансии, директорот на Јавното претпријатие за железничка инфраструктура Синиша Иваноски и неговиот тим, како и до сите работници ангажирани на терен, истакнувајќи дека токму нивната посветеност овозможува реализација на комплицирани инфраструктурни проекти во Македонија.

Директорот на ЈП МЖ инфраструктура Синиша Ивановски истакна дека во наредниот период очекува силна динамика на градежните работи, а претпријатието останува посветено на реализација на капиталните проекти.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.