Автомобилизам

Следната година Волво ќе престане со производство на модели на автомобили со дизел мотори

Шведскиот гигант „Volvo Cars“ ја објави својата одлука да го прекине производството на сите модели на автомобили со дизел мотори на почетокот на 2024 година.

Оваа одлука беше јавно објавена за време на Климатската недела во Њујорк. Така, компанијата е рангирана меѓу првите големи производители на автомобили што го направиле овој чекор со цел да ги намалат глобалните емисии.

Главните причини за оваа одлука се променливата побарувачка на автомобилскиот пазар, построгите регулаторни рамки поврзани со емисијата на штетни гасови, како и стратешкиот фокус на компанијата на електрификацијата на возилата.

„За неколку месеци ќе го изградиме последниот Волво автомобил со дизел мотор“, изјави Џим Роуан, извршен директор на Volvo Cars.

„Ова е уште еден клучен чекор во нашиот континуиран фокус на електрификацијата и борбата против климатските промени. Минатата година дизел возилата на Volvo учествуваа со само 8,9 отсто од вкупната глобална продажба на компанијата. Дополнително, вкупниот удел на автомобили со дизел мотори на европскиот пазар значително се намали. Во јули 2023 година, тој удел беше само 14,1 отсто, што е драстичен пад во споредба со повеќе од 50 отсто во 2015 година.

„Volvo“ веќе ја објави својата посветеност да стане бренд што ќе произведува само електрични возила до 2030 година. Компанијата, исто така, планира да постигне јаглеродна неутралност до 2040 година, потврдувајќи ги своите амбиции да стане лидер во одржливото производство на автомобили.

Фудбал

Голманот на Баер Леверкузен постави нов рекорд во Бундеслигата

Чуварот на мрежата на Баер Леверкузен, Лукас Храдецки, стана првиот странски голман во историјата на Бундеслигата кој одиграл 292 натпревари.

Триесетичетиригодишниот фински голман настапи изминатиот викенд во победата на Леверкузен од 5-1 против неговиот поранешен клуб Ајнтрахт Франкфурт, соборувајќи го рекордот што претходно беше во сопственост на голманот на Борусија Менхенгладбах и на Баерн Минхен, Швајцарецот Јан Сомер (291 настапи).

„Сакам да ги читам весниците и извештаите од натпреварите и таму ја прочитав информацијата. Ме исполнува со гордост и чест што можам да играм во таква прекрасна земја и лига и за два фантастични клубови“, изјави Храдецки за телевизискиот оператор ДАЗН.

Храдецки му се приклучи на Ајнтрахт во 2015 година и забележа 101 настапи за клубот од Франкфурт пред да се пресели во Леверкузен во 2018 година. Неделниот натпревар беше негов 191. лигашки настап за новиот германски шампион.

Баер Леверкузен е во рекордна серија од 48 натпревари без пораз во сите натпреварувања од почетокот на сезоната.

Забава

Фото:Убавата Дилета ја отвори сезоната на костими за капење

Најатрактивната спортската новинарка и водителка во Европа, Италијанката Дилета Леота, набрзо по раѓањето на своето прво дете, ќерката Арија, се врати на работа пред ТВ екраните и фудбалските стадиони.

Убавата Дилета е во брак со поранешниот голман на Ливерпул, Лорис Кариус.

Благодарение на редовните тренинзи и адекватната исхрана, убавата и згодна мама брзо ја врати линијата што ја имаше пред породувањето, а нејзините обожаватели ширум светот со нетрпение го очекуваа враќањето на Дилета во ритамот од пред бременоста и објавувањето на фотки во бикини.

Тоа на нивна радост и се случи, Дилета објави фотографии од базен, каде со ќерката ужива во приватноста на својот дом, а дека изгледа бомбастично докажа и во едноделен розов костим за капење кој одлично и стои.

Македонија

Од среда до викендот нестабилно со пороен дожд и грмежи

Во следните три дена, почнувајќи од среда, под влијание на влажни бранови во поголем дел од земјава ќе биде нестабилно со пороен дожд и грмежи.

Локално процесите ќе бидат поинтензивни во форма на невреме со пообилен дожд за кратко време и засилен ветер.

Дневните температури од четврток ќе бидат во опаѓање.

Во деновите од викендот условите за нестабилност ќе се намалат.

Времето утре ќе биде сончево и топло со мала до умерена облачност. Ќе дува слаб до умерен ветер претежно од југозападен правец. Попладне ќе има изолирана појава на краткотраен пороен дожд и услови за ретки грмежи. Минималната температура ќе биде во интервал од 4 до 10, а максималната ќе достигне од 20 до 27 степени.

Во Скопје слично време со минимална температура од 8, а максимална дневна до 27 степени.