Живот

Слаб интерес кај скопјани за вдомување куче

Од приближно шеесет кучиња што го поминале целокупниот медицински третман во стационарот „Вардариште“, во рамки на акцијата „Вдоми - не купувај“, беа вдомени десет.

Ваквиот слаб одѕив се должи на фактот дека чипирањето на домашните миленици се воведе како законска обврска за сопствениците и во моментов бесплатно се реализира преку Агенцијата за храна и ветеринарство.

На тој начин, како што изјави за МИА директорот на Јавното претпријатие „Комунална хигиена“-Скопје, Абдусамед Шабани, ќе се овозможи следење на одговорното сопствеништво врз овие животни, кои во голем број случаи се оставени на улиците токму од страна на нивните сопственици.

- ЈП „Комунална хигиена“ ќе продолжи со стандардните активности за заловување и третирање на бездомните кучиња во Скопје, во рамки на стационарот „Вардариште“. Апелираме и ги повикуваме вистинските љубители на животните да го посетат стационарот и да размислат за можноста во својот дом да му понудат љубов и грижа на некое од овие бездомни кучиња што им ги отстапуваме без никаков паричен надомест, изјави Шабани.

За акцијата „Вдоми - не купувај“

Акцијата за вдомување бездомни кучиња „Вдоми - не купувај“ се реализираше во рамки на одбележувањето на Светскиот ден посветен на заштитата на животните - 4 октомври. Од 4 до 10 октомври годинава стационарот за бездомни животни „Вардариште“ беше отворен од 9 до 19 часот за сите љубители на животните што сакаат да си одберат куче за вдомување. Кучињата се прегледани од ветеринар, не се агресивни и немаат никакви заболувања. Тие се стерилизирани, прочистени од внатрешни и надворешни паразити и вакцинирани од беснило. Доколку не бидат вдомени, тие ќе бидат вратени на скопските улици.

Од „Комунална хигиена“ ги повикуваат љубителите на животни што планираат да купат миленик да го посетат стационарот „Вардариште“ и да размислат за можноста во својот дом да му понудат љубов и грижа на некое од овие кучиња. На сите заинтересирани граѓани кучињата им се отстапуваат без паричен надомест.

Во соработка со Град Скопје, ЈП „Комунална хигиена“ од 2007 година го спроведува Проектот за третман на бездомните кучиња според принципите за хуман третман на животните - ЦНР-програма (catch, neuter, release - залови, стерилизирај, пушти), осмислена од Светската асоцијација за заштита на животни (WSPA) и Кралското здружение за заштита на животните на Велика Британија (RSPCA). Оваа програма е поддржана од Светската здравствена организација. (WHO), а одобрена од Советот на Град Скопје.

Кучињата се заловуваат од страна на специјализирана, обучена и опремена служба за хуман третман и контрола, по што се транспортираат во стационарот „Вардариште“, кој има капацитет за третман и сместување на околу сто животни во боксови изградени по европски стандарди.

Во стационарот во две смени работи ветеринарната служба што ја проценува здравствената состојба на бездомните кучиња. Во последните неколку години е воведена и постапка за испитување на евентуално присуство на болеста лајшманиоза, што се прави по пат на земање крвен примерок и десетина дена се чека на резултатите. По добивањето на резултатите, здравите единки се подложуваат на третман на стерилизација, се прочистуваат од внатрешни и надворешни паразити, се вакцинираат од беснило и се задржуваат десетина дена, а доколку за тоа време не бидат вдомени, овие единки се враќаат на изворната локација. Заболените кучиња што имаат видливи повреди при што трпат болка, премногу старите, како и прекумерно агресивните кучиња се евтаназираат.

Програмата се реализира под постојан мониторинг на стручни тимови на Британското кралско здружение. Во однос на реализацијата, односно спроведувањето на Програмата за хуман третман на животните и потребните хигиенско-технички стандарди, стационарот е под инспекциски надзор на Агенцијата за храна и ветеринарство.

ЈП „Комунална хигиена“ и Град Скопје постојано работат на подобрување на третманот на кучињата скитници, како и на подобрување на условите во стационарот „Вардариште“, во секој поглед.

- Во октомври 2012 година персоналот на стационарот заврши стручна обука за постапување при заловување, транспорт, евидентирање, сместување, држење и манипулација на бездомните кучиња во објектите. Обуката ја изведе експертски тим од Факултетот за ветеринарна медицина, а е во согласност со националната законска регулатива и основните правила за благосостојба кај животните, информираат од „Комунална хигиена“.

Во текот на минатата година, извршено е реновирање на стационарот. Направени се нови 50 бокса (наменети за по едно куче), спуштен е плафонот, сменета е електричната инсталација, изведени се вентилација и изолација. Спроведено е парно греење со посебна потстаница, објектот е варосан, инсталирано е внатрешно и надворешно осветлување, поставени се пет херметички врати и пет прозорци.

Од 2007 до 2017 година низ стационарот „Вардариште“ поминале приближно 20.000 кучиња

Сите заинтересирани граѓани од вторник до сабота, од 9 до 13 часот, можат да дојдат, да одберат и да вдомат куче. Кучињата од различни раси и големини што се определени за вдомување на граѓаните им се отстапуваат истретирани и вакцинирани и без паричен надомест. Секој граѓанин што вдомува куче, мора да пополни формулар со своите податоци и се обврзува да биде одговорен сопственик почитувајќи ги постојните закони./МИА.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Кој ќе биде следниот Џејмс Бонд- конкуренцијата е силна, се тркаат познати актери

Додека гласините за актер кој ќе биде избран за новиот Џејмс Бонд се загреваат, уште неколку ѕвезди од А-листата се вклучија во борбата: Роберт Патинсон и Николас Холт се меѓу оние кои се тестираа за улогата на новиот таен агент 007.

И двајцата британски актери сигурно имаат актерско педигре за да го играат учтивиот шпион и да ја преземат улогата по 15-годишниот престој на Даниел Крег, објави Варајети.

Тие се исто така добро свесни што е потребно за да се работи во голема франшиза: Патинсон го игра Бетмен за DC Studios и веќе беше дел од франшизите „Самрак“ и „Хари Потер“; Холт, во меѓувреме, го игра Лекс Лутор во филмовите за Супермен на DC и глумеше во трилогијата за приквелот на X-Men од 2010 година. Тој потоа глуми во филмот „Како да ограбиш банка“ на „Амазон МГМ Студиос“, кој ќе се појави во кината на 13 ноември. Патинсон го има и режисерот Денис Вилнев на своја страна, бидејќи глуми во неговиот претстоен епски филм „Дина: Дел 3“.

Минатата година, „Амазон МГМ“ го потпиша Вилнев како следен режисер на франшизата, додека креаторот на „Пики Блајндерс“, Стивен Најт, беше ангажиран да го напише сценариото. Започнувањето на „Бонд 26“ е врвен приоритет за новите шефови на франшизата, продуцентите Ејми Паскал и Дејвид Хејман.

Оттогаш, британскиот и американскиот печат зујат за името на речиси секој британски актер во триесеттите години, а се шпекулира дека Калум Тарнер, Џош О'Конор и Џек Лоуден се меѓу фаворитите. „Варајати“ дознава дека Хари Стајлс е исто така во преговори за да ја игра улогата, а Тео Џејмс, 41, сè уште не е исклучен од трката.

Пирс Броснан, кој го играше Бонд во 1990-тите, неодамна јавно го поддржа Тарнер, додека Гари Олдман го поддржа Лоуден, неговиот колега од „Бавни коњи“. (Олдман исто така рече дека следниот Џејмс Бонд веќе е избран, но официјалното соопштение за изборот сè уште не е објавено.)

Амазон одби да коментира за гласините.

Европа

Масакр во Краков: Деветмина загинати, три тела се пронајдени во куќата на напаѓачот, Полска прогласи дводневна жалост

По вчерашниот масакр во центарот на Краков, Полска, во кој беа убиени шест лица, а уште тројца беа пронајдени мртви во домот на напаѓачот, доаѓаат нови информации за повредените.

Меѓу жртвите се и возачите на кочии кои секојдневно превезуваат туристи на главниот градски плоштад. Двајца од нив се борат за живот, а неколку други се тешко повредени, објави нивното здружение, објавува „Полски Онет“.

Во пукотницата се повредени 15 лица, меѓу кои и двајца полицајци. Регионалниот гувернер Кшиштоф Јан Клечар изјави дека 12 лица се тешко повредени. Меѓу жртвите има и странски државјани.

Осомничениот бил совладан и префрлен во болница во Краков, каде што бил опериран поради повреди опасни по живот.

Според полициските информации, тој користел полуавтоматска пушка слична на АР-15. Со себе имал и пиштол, а во автомобилот е пронајдено дополнително оружје и муниција.

Полското Министерство за одбрана ги отфрли шпекулациите дека напаѓачот бил активен или поранешен член на армијата.

Потврдени се тројца пронајдени мртви во домот на напаѓачот

Полиш Факт објави дека обвинителот Томаш Вашчук, портпарол на Канцеларијата на окружниот обвинител во Краков, потврдил дека тројцата пронајдени мртви во домот на напаѓачот се неговите родители и сестра.

Нивните тела се пронајдени во Островјец Свјетокржиски, каде што живеел 24-годишниот напаѓач, Михал О.

🇵🇱 ❗️@PolskaPolicja weszła do mieszkania zamachowca. Materiał z działań funkcjonariuszy pojawił się na profilu FB Radia Ostrowiec. https://t.co/QpfMPmUH2m
— WarNewsPL (@WarNewsPL1) November 7, 2026

Поради стравувања дека можеби биле поставени експлозивни направи во зградата, полицијата прво употребила дрон за да ја провери зградата. Тие ги откриле телата на две жени и еден маж.

Околностите на нивната смрт сè уште се истражуваат.

Се истражува можен екстремистички мотив

Мотивот за масакрот сè уште е непознат. Министерот Киервински рече дека првичните наоди укажуваат дека напаѓачот имал „многу радикални ставови“. Исто така, постојат индикации дека бил фасциниран од крајно десничарските идеологии, но истражителите сè уште не утврдиле дали тие се поврзани со нападот.

Полицијата во моментов верува дека дејствувал сам и ги отфрли извештаите за можен соучесник.

Да ве потсетиме дека напаѓачот вчера влегол со автомобил на главниот плоштад во Краков малку по 15 часот и почнал да пука кон минувачите. Убиени се четири жени и двајца мажи. Меѓу загинатите е и еден британски државјанин.

Полскиот претседател Карол Навроцки прогласи дводневна национална жалост, која ќе трае денес и утре, додека жалоста во Краков ќе трае до среда.

Полициската истрага и собирањето докази продолжуваат, а истражителите ги повикуваат сведоците да се јават и да помогнат во расветлувањето на околностите на нападот.

Туск ги објави имињата на ранетите полицајци: „Тие се вистински херои“

Полскиот премиер Доналд Туск ги објави имињата на двајцата полицајци кои го запреа напаѓачот во Краков, каде што во пукањето беа убиени шест лица.

„Искусните полицајци Јакуб Кулик и Артур Морањски се вистински херои. Веројатно спасија животи на многу луѓе, без оглед на опасноста да ги изгубат своите. Нивната состојба е сериозна, но имаат многу добра медицинска нега. Цела Полска навива за вас“, рече Туск.

Еден од полицајците добил три прострелни рани и се бори за живот, додека другиот е исто така ранет.

Министерот за правда Валдемар Журек изјави дека полицајците го запреле напаѓачот со своите тела и спречиле уште поголема трагедија.

Полска официјално прогласи дводневна национална жалост

Полскиот претседател Карол Навроцки потпиша указ со кој прогласува национална жалост за масакрот во Краков.

Според соопштението за медиумите на портпаролот на претседателот Рафал Лешкевич, жалоста ќе трае на 8 и 9 ноември.

Македонија

Нема парно греење во Кисела вода- реагираат револтирани жители

Во нашата редакција се обрати Скендер Мехмет од Кисела вода, кој во име на станарите тврди дека во два влеза од нивната зграда нема парно греење.

Писмото ви го пренесуваме во целост:

„Ви се обраќаме како очајни, револтирани и крајно разочарани граѓани, кои повеќе од 24 часа се оставени без парно греење, без конкретно објаснување и без никаква информација кога проблемот ќе биде решен.

Од вчера, 07.11.2026 година, пред 09:00 часот, становите со броеви 17, 18, 19, 20 и 21 во влез 1 и истите станови во влез 2, на ул. Локов бр. 5 во Скопје, Кисела Вода, немаат парно греење.

Во зградата живеат мали деца, повозрасни и болни лица, семејства кои се принудени да престојуваат во студени станови. Дел од нас веќе се разболени, а ситуацијата станува сè понеподнослива.

ДАЛИ ВО 2026 ГОДИНА Е НОРМАЛНО СЕМЕЈСТВА ДА БИДАТ ОСТАВЕНИ БЕЗ ГРЕЕЊЕ СРЕДЕ ГРЕЈНА СЕЗОНА?!

Од вчера досега, станарите имаат направено повеќе од 20 телефонски пријави. На секоја пријава го добиваме истиот одговор:

„Ќе биде постапено во најбрз можен рок.“

Поминаа повеќе од 24 часа, а тој „најбрз можен рок“ очигледно нема крај!

Никој не ни кажува што е проблемот, дали воопшто некој работи на негово решавање и уште колку време треба да поминеме во студени домови.

Се чувствуваме целосно игнорирани и оставени сами на себе!

Токму затоа, во овој мејл ги вклучуваме и медиумите.

ПОЧИТУВАНИ ПРЕТСТАВНИЦИ НА МЕДИУМИТЕ, ВЕ МОЛИМЕ ЗА ПОМОШ!

Ве замолуваме да ја објавите нашата ситуација, да побарате одговори од надлежните и да ни помогнете нашиот глас конечно да биде слушнат.

Не бараме ништо повеќе од основни услови за нормален живот. Не бараме привилегии. Бараме греење во сопствените домови, услуга за која редовно плаќаме!

Жално е што сме доведени во ситуација да молиме медиуми за помош за нешто што треба да биде најнормална обврска на надлежните служби.

До надлежните: Колку пријави се потребни за конечно да реагирате? Колку часа треба да поминат? Дали треба нечија здравствена состојба сериозно да се влоши за да ја сфатите ситуацијата сериозно?

Бараме ИТНО воспоставување на греењето, јавно објаснување за прекинот и конкретен одговор кога проблемот ќе биде решен.

Апелираме до медиумите да не го игнорираат овој повик. Очајни сме, изморени од празни ветувања и немаме намера повеќе да молчиме!“

Загрижени станари од ул. Локов бр. 5, Скопје

Влез 1 и влез 2

Скендер Мехмет