Ова е нов удар за технолошкиот гигант Apple, кој користи сопствени полначи за своите уреди, пренесува Радио Слободна Европа.
Според денешниот предлог на Европската комисија, сите мобилни телефони и таблети треба да имаат USB влезен слот тип C, што е клучен чекор за конечното воведување на универзален полнач.
Европската комисија смета дека стандардниот полнач за сите мобилни телефони ќе го намали количеството електронски отпад, додека Apple тврди дека полнач погоден за сите видови мобилни телефони би ја запрел иновацијата и дополнително ќе го влоши проблемот со загадувањето со електронски отпад.
Комисијата претставила предлог за измена на директивата дека USB Type C треба да стане стандарден слот за полнење на паметни телефони, таблети, камери, слушалки, преносни звучници и рачни конзоли за видео игри.
Единствениот USB-C слот ќе им овозможи на потрошувачите да ги полнат уредите со ист USB-C полнач, без оглед на брендот на уредот.
Исто така, се предлага да се оддели продажбата на полначи од продажбата на самите уреди. Ова значи дека потрошувачите ќе можат да го купат уредот без полнач, но производителите сепак ќе можат да ги нудат во пакет.
ЕУ е огромен пазар со околу 450 милиони луѓе, а воведувањето универзален полнач со USB-C конектор може да има одлучувачко влијание на глобалниот пазар на мобилни телефони, пишува RFI.
„Европските клиенти беа фрустрирани предолго кога некомпатибилните полначи се трупаа во фиоките“, вели во соопштението Маргрет Вестагер, потпретседателка на Европската комисија за дигитална ера.
„И дадовме доволно време на индустријата да изнајде сопствени решенија, и сега е време за правни потези што ќе не доведат до универзални полначи“, додаде таа.
"Со се` повеќе уреди што ги купуваме, добиваме се` повеќе полначи кои не се нужно компатибилни едни со други. Ќе го завршиме ова сега. Со овој предлог, европските потрошувачи ќе можат да користат еден полнач за сите нивни преносни електронски уреди,“, изјави комесарот за внатрешен пазар Тиери Бретон.
Предлогот за директива е проследен до Советот и Европскиот парламент за усвојување. Комисијата им предлага на земјите -членки да им се додели период од две години од датумот на донесување во кој треба да ја транспонираат Директивата.
Сопствениците на мобилни телефони моментално можат да избираат помеѓу три водечки полначи или конектори: Apple, микро-USB и USB-C.
Трите главни типа на полначи се чекор напред од периодот до 2009 година, кога се користеа десетици различни видови полначи за различни мобилни телефони, што резултира со голема количина електронски отпад.
Сепак, ЕУ не е задоволна од трите главни типа на полначи и вели дека таквата ситуација е „непријатна“. Европската комисија вели дека потрошувачите од ЕУ трошат околу 2,4 милијарди евра годишно за одделни полначи кои не доаѓаат во комплет со мобилните уреди. Новата регулатива, велат во ЕК, треба да ја намали и количината на електронски отпад за околу илјада тони годишно.
Apple, кој веќе користи USB-C конектори за некои типови на своите iPad и лаптопи, тврди дека принудувањето на производителите да се префрлат на универзални полначи нема оправдување.
„Ние и понатаму сме загрижени дека строгата регулатива која бара еден тип конектори ќе ја задуши иновацијата наместо да ја поттикнува, што пак ќе им наштети на потрошувачите во Европа и низ целиот свет“, рече Apple.
Во најновиот предлог на Европската комисија, кој би можел суштински да се измени пред да стапи во сила, на производителите ќе им се даде рок од 24 месеци да се прилагодат на новите одредби.
Епл соопштил дека рокот од две години може да биде голем проблем за индустријата и да ја запре продажбата на постоечката опрема.