Синдикатот повика на протести по отвореното писмо на Макрон: Да се потсети дека изгуби

Железничкиот огранок на Генералната конфедерација на трудот (CGT), најголемиот синдикат во Франција, повика на протести на 18 јули.

Железничкиот огранок на Генералната конфедерација на трудот (CGT), најголемиот синдикат во Франција, повика на протести на 18 јули, денот кога треба да се состане новоизбраниот парламент, по вчерашното отворено писмо од францускиот претседател Емануел Макрон, во кое побара од „републиканските сили“ да формираат „цврсто мнозинство“.

Протести треба да се одржат пред седиштето на државните органи низ земјата и пред Националното собрание во Париз со барање левичарската коалиција Нов народен фронт да формира влада.

„Да не дозволиме да ни ја украдат победата!“

Претседателката на CGT, Софи Бине, ги повика сите да учествуваат на протестните собири за да се „држи Националното собрание под лупа“ и да се обезбеди „да се почитуваат гласовите на граѓаните“.

Таа навести дека протестите би можеле да продолжат и за време на Олимпијадата.

Бине го повика Емануел Макрон да „излезе од фазата на негирање“ бидејќи ги „изгубил изборите“.

„Имаме впечаток дека Луј XVI е затворен во Версај. Ако (Макрон) не ги почитува резултатите од анкетите, ризикува повторно да ја втурне земјата во хаос“, рече таа.

Бине предупреди дека Макрон како претседател мора да гарантира почитување на институциите.

„Емануел Макрон мора да го земе предвид фактот дека загуби, мора да назначи премиер што ќе го предложи Новиот народен фронт и да го остави Новиот народен фронт да формира мнозинство во Собранието“, посочи таа.

Во отвореното писмо, Макрон ги повика „политичките сили со републикански вредности“ да формираат владина коалиција и рече дека се надева дека ќе избере премиер од таква група.

„Се надеваме на способноста на нашите политички лидери да покажат разум, хармонија и смиреност во вашиот интерес и интересот на земјата. Во светлината на овие принципи, јас ќе одлучам за назначувањето на премиерот“, рече Макрон.

Почна комисиската расправа за ребалансот, ќе трае најмногу 10 дена

Скратениот буџет на обвинителствата ќе влијае на нивната независност и функционалност – државниот јавен обвинител Љупчо Коцевски незадоволен од ребалансот со кој се минусира повеќе од еден милион евра во овој сектор за годинава.

На почетокот од 10 дневната дебата во собраниската комисија за финансирање и буџет рече дека загрижува тоа што се крати на се, за истраги, вештачења, одржување на системите и обуки на вработените, а во меѓувреме и Европската Комисија укажува дека ограничените ресурси може да влијаат на независноста на обвинителствата.

Штедиме на се и немаме ненаменски давачки, а сега немаме пари ниту за режиски трошоци и за исплата на склучените договори за опрема, порача Коцевски.

Незадоволни се и судските органи- од судскиот буџетски совет потенцираат дека дел од судовите немале ниту основни услови за работа за што години наназад алармира и Државниот завод за ревизија. Се жалат дека со ребалансот на буџетот нема да има за додатоци на плати за вработените, ниту за пополнување на празните работни места кои сметаат дека се потребни за нормално функционирање.

Претходно ребалансот во 40 минутно експозе пред пратениците го образложи министерката за финансии Димитриеска Кочоска. Рече дека се обезбедуваат пари кои претходно не биле испланирани- за плати, пензии, долгови, заеми.

Аргументите ги вкрстија и пратениците.

На предлог измените на буџетот за 2024 година пратениците поднесоа 58 амандмани кои треба да се разгледаат за најмногу 10 дена. Прекројувањето на државната каса денеска го искоментира и лидерот на СДСМ Венко Филипче, кој на брифинг со новинарите оцени дека е огромен процентот на јавниот долг. Заемот од Унгарија од пола милијарда наменет за бизнисот и општините според него ќе биде непродуктивен, а со тој чекор, како што рече, државата се турка кон должничко ропство.

Нетанјаху се обрати во Американскиот конгрес: нашата борба е и ваша борба

Израелскиот премиер Бенјамин Нетанјаху одржа жесток говор во Американскиот конгрес во кој апелираше САД и Израел да застанат рамо до рамо за да се спротивстават на Иран.

Нетанјаху доби овации кога излезе на говорницата за да се обрати на заедничката седница на конгресот, а пратениците постојано стануваа за да му аплаудираат во текот на речиси едночасовниот говор. Тој ги опиша САД и Израел дека се на „раскрсницата на историјата“ и оти во ова време на глобален „пресврт“ си требаат еден на друг повеќе од кога било. - нашите непријатели се ваши непријатели. Нашата борба е и ваша борба. И нашата победа ќе биде ваша победа, рече израелскиот премиер.

Највисоките хрватски функционери си ги зголемија платите за 83%

Хрватската влада денеска ја усвои одлуката за зголемување на платите на највисоките државни функционери.

Со оваа одлука, месечните примања на претседателот Зоран Милановиќ, премиерот Андреј Пленковиќ и на претседателот на парламентот Гордан Јандроковиќ од август ќе пораснат за 2.500 евра..

Основицата на платата на околу 270 функционери ќе се зголеми за 83,45 посто, па место досегашните 516 евра бруто, ќе изнесува 947 евра.

Според новите пресметки, Пленковиќ ќе има плата од 5.535 евра, а Милановиќ од 6.074 евра.

притисни ентер