Македонија и земјите од Западен Балкан не се товар за капацитет на ЕУ да прими нови членки– вели претседателката Сиљановска Давкова прашана за истражувањето на шведскиот институт за европски и политички истражувања „Сиепс“ според кое приемот на нови членки би го променил соодносот на силите во Унијата. Македонија како што кажа таа има поминато многу на евроинтегративниот пат, а како доказ за тоа ги наведе позитивните извештаи на Европската Комиисија низ годините. Според неа, логично е земјите кои имаат долг стаж на преговори со Унијата да бидат најподготвени за членство и оцени дека суверено право на земјава е биде таму каде што секогаш политички, историски и културолошки припаѓала.

„Ние не сме товар за апсопрциониот капацитет на ЕУ. Дури и сите заедно. Држава како Украина, а на неа ако ја додадеме ЕУ, е. Тогаш односот на силите, говориме за процесот на одлучување бидејќи во ЕУ се водат од бројот на државите, може да го смени. / Многу логично е најблиските и оние со најдолг стаж на преговори да бидат најподготвени. Да ги потсетам од ЕУ колку позитивни извештаи дадоа за Македонија, и тоа зборува не за нас, туку за нив.“

Анализата на шведскиот институт прави проценка на ефектите од три можни сценарија за проширување на ЕУ врз рамнотежата на моќта меѓу земјите членки. Првото се однесува на прием на Украина, Модлавија и Грузија, второто на земјите од Западен Балкан, вклучително и Македонија, а третото кога сите заедно би станале членки. Според документот, сите три сценарија ја зголемуваат важноста на помалите земји во процесот на носење на одлуки и во соодносот на силите со поголемите држави. Во таква Унија, како што се наведува, трите најнаселени земји, Германија, Франција и Италија би ја загубиле својата моќ во советот, а пост-комунистички земји би биле мнозинство во блокот.

„Идните проширувања ќе го зголемат притисокот да се напушти едногласноста во Европскиот Совет, особено во делот на надворешни и безбедносни прашања. Сепак, значајни реформи за носење на одлуки во Советот ќе зависат од понудата кон помалите земји, како прилагодување на условите за да се постигне квалификувано мнозинство, вклучување на услови за супермнозинство или овозможување на поинаква интеграција.“

Токму за темата за проширувањето ќе се разговара на средината на месецов кога во земјава доаѓаат претседателот на ЕС Антонио Кошта и високата претставничка за надворешна политика на Унијата Каја Калас. Сепак, последните пораки од Брисел кои ги испрати еврокомесарката Марта Кос е дека иако фрустрациите се разбирливи, сепак никој не може да и даде гаранции на Македонија дека по евентуални уставни измени нема да следат нови блокади поради билатерални прашања.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.