Ситуацијата е ужасна и сведоци сме на целосен колапс на системот – вели за Канал 5 индискиот новинар Даниш Раза. За прв пат како што вели тој од независноста на Индија земјата е преплавена со мртви тела, а илјадници ги губат животите поради недостиг на кислород. Крематориумите се преполни, па за таа цел се користат и градските паркови, а стравувам дека најлошото допрва доаѓа – вели Раза.
-Ужасна е ситуацијата, крематориумите, гробиштата во Индија во моментов се преплавени со мртви тела. За прв пат во историјата на независна Индија, граѓаните добиваат жетони и им е кажано кој е нивниот број за чекање за да го кремираат мртвото тело. Замислете, таква е гужвата во крематориумите. Во последната недела за прв пат видовме дека најдобрите болници во Индија испратија СОС повици дека имаат залихи на кислород за неколку часови.-Даниш Раза – Новинар од Индија.
Вината за ваквата ситуација ја наоѓа во државните органи за кои вели дека целосно потфрлиле во справувањето со пандемијата. Според него, се работи за целосен системски неуспех, а високите бројки на новозаболени и починати се должат на изборите во неколку индиски сојузни држави, но и на големиот број на предизборни митинзи.
-Причината за ова е во целосната неподготвеност на индиската Влада. Владата имаше повеќе од 6 месеци да се подготви за ова катастрофа и имаше бројни извештаи и истражувања кои покажуваа дека ќе има втор бран, и треба да бидеме подготвени, но ништо не беше направено. И токму во овој втор бран ние имавме избори во двете најголеми држави во Индија, што исто така значеше масовни изборни митинзи, илјадници луѓе на улиците. И Владата сметаше дека не е пристојно да се спречат тие собири.-Даниш Раза – Новинар од Индија.
Индија изминатиот период забележува нови црни рекорди. Вчера повторно имаше над 300 илјади новозаболени, со што бројот на заразени во оваа држава достигна речиси 18 милиони и над 200 илјади починати. Пред неколку недели земјата го престигна и Бразил на неславната листа жаришта во светот, а единствена држава која има поголем број заразени е САД. Индискиот сој на вирусот кој излезе од потконтинентот се смета и за позаразен од останатите, а неговата варијанта е откриена во 17 земји ширум светот.