Свет

Шефот на кинеската дипломатија оствари стратешки дијалог со секретарот на Советот за безбедност на Русија

Шефот на кинеската дипломатија, Ванг Ји, вчера во Пекинг се сретна со Сергеј Шојгу, секретар на Советот за безбедност на Руската Федерација.

Ванг укажа дека светот сè повеќе поминува низ промени и турбуленции, при што повоениот меѓународен поредок и нормите кои ги регулираат меѓународните односи се сериозно погодени, и рече дека светот се соочува со вистински ризик од враќање на „законот на џунглата“.

- Како главни земји и постојани членки на Советот за безбедност на Обединетите нации (ОН), Кина и Русија имаат одговорност и обврска да практикуваат вистински мултилатерализам, да го штитат меѓународниот систем со ОН во неговиот центар, да се залагаат за рамноправен и уреден мултиполарен свет и универзално корисна и инклузивна економска глобализација, но и да работат на изградба на поправеден и поразумен систем на глобално управување, рече Ванг.

Истакнувајќи дека Кина и Русија се меѓусебно најголеми соседи и сеопфатни стратешки партнери за новата ера, Ванг порача дека двете земји треба да одржуваат блиска комуникација за главните прашања кои се однесуваат на билатералните односи, да ја засилат меѓусебната поддршка во прашањата што ги засегаат нивните основни интереси и да ги штитат своите заеднички интереси.

Ванг наведе дека Кина е подготвена да соработува со Русија за во целост да го спроведе важниот консензус постигнат од двајцата шефови на држави, да ја унапреди стратешката комуникација, да ја продлабочи стратешката координација и да отвори нови перспективи за односите меѓу Кина и Русија во новата година.

Шојгу, од друга страна, рече дека оваа година се навршуваат 25 години од потпишувањето на Договорот за добрососедство и пријателска соработка меѓу Русија и Кина, и дека односите се темелат на меѓусебно почитување, доверба, еднаквост и заемна корист.

- Русија секогаш го поддржувала принципот на една Кина, внимателно ги следела потезите на непријателските сили кои ја поткопувале стабилноста преку морето и цврсто се противела на обидите на Јапонија да ја забрза ремилитаризацијата. Руската страна е подготвена да продолжи цврсто да се поддржува со Кина, да ја унапредува билатералната соработка и да ја зајакнува координацијата во рамките на мултилатералните механизми како што се ОН, Шангајската организација за соработка и БРИКС, рече Шојгу.

Тој ги повика двете страни заедно да работат на развојот на односите меѓу Русија и Кина на високо ниво, изградбата на поправеден и поразумен мултиполарен свет, како и да формираат неделива безбедносна архитектура на евроазискиот континент.

Тагови: Кина и Русија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Битола денес беше град на трчањето

Над 1.500 тркачи од 18 земји денес беа дел од 8-мото издание на ТРЧАЈ БЕ 2026, спортска манифестација која од година во година расте и ја зацврстува позицијата на Битола како значајна дестинација за спортски туризам во регионот.

Свежото утро создаде одлични услови за трчање, а годинешното издание донесе и исклучителни спортски резултати. На битолската патека беа постигнати најбрзите времиња досега и соборени рекордите на ТРЧАЈ БЕ. Низ улиците на Битола денес трчаа натпреварувачи од различни земји, бодрени од бројна публика, волонтери и сите оние кои беа дел од организацијата и реализацијата на трката.

ТРЧАЈ БЕ е спортски настан, но и приказна за Битола како отворен и активен град кој преку спортот привлекува гости, создава дополнителна вредност за локалната економија и се промовира надвор од границите на државата.

Општина Битола упатува честитки до организаторите на ТРЧАЈ БЕ, до сите институции, партнери, волонтери и служби вклучени во реализацијата, како и до граѓаните кои со својата поддршка придонесоа за атмосферата долж патеката.

Посебни честитки до победниците и до сите над 1.500 учесници кои денес ја истрчаа Битола.

Уште едно успешно издание на ТРЧАЈ БЕ, уште еден голем спортски ден за Битола.

Општина Битола

Тагови: битола

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре сончево со мала до умерена облачност

Времето утре ќе биде сончево со мала до умерена локална облачност. Ќе дува слаб до умерен ветер од северен правец.

Минималната температура ќе биде во интервал од 7 до 16, а максималната ќе достигне од 23 до 30 степени.

Во Скопје, претежно сончево. Ќе дува слаб до умерен ветер од северен правец. Минималната температура ќе се спушти до 11, а максималната ќе достигне до 28 степени.

До крајот на новата работна седмица ќе се задржи посвежо и претежно сончево време со мала до умерена облачност во текот на денот. Во вторник наместа во северните делови ќе има услови за повремен дожд. До среда ќе дува слаб до умерен ветер од северозападен правец, а потоа ветерот ќе го смени правецот во југоисточен.

Тагови: сончево

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Пожарот на Брач сè уште активен: Евакуирани речиси 700 луѓе

Пожарот е сè уште активен на хрватскиот остров Брач, две лица се повредени, а речиси 700 луѓе се евакуирани, додека населбата Милна е спасена од пожарот, изјави денес началникот на противпожарната служба Славко Туцаковиќ.

Тој рече дека постара жена, која паднала од чамец за време на евакуација и речиси се удавила, е во критична состојба, додека другото повредено лице е млад човек кој вдишал чад.

Туцаковиќ истакна дека ситуацијата на местото на пожарот на Брач утрово била помирна, иако сè уште дува ветер, по тешката ноќ во која пожарникарите ги бранеле куќите од пожарот, и дека, и покрај нивните напори, неколку згради биле оштетени, објави Индекс.

Milna. Bračani dragi, držite se! pic.twitter.com/UCbF18cH9f
— JurMag (@jur_magud) September 12, 2026

Туцаковиќ рече дека четворица канадери учествуваат во гаснењето на пожарот од воздух.

Хрватската противпожарна служба претходно објави дека пожарот се приближил до Милна поради ветер и дека сите расположиви противпожарни сили се ангажирани во гаснењето на пожарот и спречувањето на ширењето на пожарот кон самото населено место. Ветерот влијаел врз ширењето на пожарот кон јужната страна на Брач на тешко пристапен терен покриен со густа вегетација, се вели во соопштението.

Тагови: пожар Брач

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.