Семинарот го организира Секретаријатот за европски прашања во соработка и со поддршка на Канцеларијата на УНДП во Македонија.

- Сметам дека овој семинар се одржува во еден многу важен момент за европската интеграција кога нашата земја доби позитивни оценки во пролетниот Извештај на Европската комисија по однос на реализацијата на обврските од Пристапниот дијалог на високо ниво. Со ова покажуваме дека остануваме посветени на процесот и имаме капацитет да се справиме со предизвиците кои произлегуваат од реформските процеси, оцени вицепремиерот Бесими.

Според него, споделувањето на хрватските искуства во процесот на преговори со ЕУ, особено во делот на правосудството и фундаменталните права, ќе придонесе за понатамошно зајакнување на административните капацитети, особено ако се има предвид дека се очекува Европскиот совет да определи датум за почеток на пристапните преговори на јунскиот самит.

Вршителот на должноста постојан претставник на УНДП нагласи дека Хрватска е единствената земја којашто го има завршено процесот на преговори со ЕУ според новиот формат кој од неодамна важи за сите земји кандидати за членство.

- Со пренесувањето на свежите искуства од хрватскиот преговарачки тим, во можност сме да обезбедиме експертиза од прва рака. Ова е дел од долгорочната поддршка на УНДП за земјата во нејзиниот процес за подготовка за преговорите и постигнување на нејзината цел – членство во ЕУ, рече Фракасети.

На семинарот учествуваат претставници од државните институции кои работат на ова поглавје, а искуствата ќе ги пренесат експерти од Хрватска кои биле директно вклучени во преговарачкиот тим.

Семинарот е продолжение на низата активности што се реализираат во рамки на соработката со УНДП вклучително и семинарот за пристапување во ЕУ кој се одржа во септември минатата година и семинарот за поглавјето Правда, слобода и безбедност кој се одржа во декември лани.