Нова студија сугерира дека популарниот „витамин на сонцето“ би можел да игра важна улога во одржување на доброто здравје додека старееме. Научниците откриле дека дневното земање витамин Д помага во зачувувањето на теломерите, ситните заштитни завршетоци на нашата ДНК кои ги штитат клетките при нивната делба, објавува “The Independent”.

Теломерите се наоѓаат на краевите на секој од 46-те хромозоми. Нивната улога е да ја штитат ДНК за време на секоја клеточна делба. Како што старееме, теломерите природно се кратат, а кога стануваат премногу кратки, клетките повеќе не можат да се делат и постепено умираат. Скратените теломери се поврзани со различни болести на стареењето, вклучувајќи и рак, срцеви заболувања и остеоартритис.

На нив негативно влијаат фактори како што се пушењето, хроничниот стрес и депресијата, а дополнително се оштетуваат од воспалителни процеси во телото.

Новата студија нуди надеж

Во студија спроведена на Универзитетот Аугуста во САД, научниците следеле 1.031 луѓе со просечна возраст од 65 години во текот на пет години. Половина од учесниците земале 2.000 меѓународни единици (IU) витамин Д дневно, додека другата половина земала плацебо. Должината на нивните теломери била мерена на почетокот на студијата, по две години и по четири години.

Резултатите покажале дека теломерите во групата што земала витамин Д биле зачувани во просек за 140 базни парови повеќе во споредба со плацебо групата. Бидејќи теломерите за време од десет години со природното стареење се скратуваат за околу 460 базни парови, овој резултат се смета за значаен.

Ова не е прва студија што укажува на придобивките од витаминот Д за теломерите. Слични ефекти покажала медитеранската исхрана, позната по своите антиинфламаторни својства.

Повеќе од здрави коски

Витаминот Д е најпознат по својата улога во здравјето на коските бидејќи помага во апсорпцијата на калциум. Сепак, тој исто така го поддржува имунолошкиот систем. Претходните истражувања покажаа дека витаминот Д може да ја намали зачестеноста на респираторни инфекции, особено кај луѓе кои имаат недостаток од него. Постојат и индикации дека тој може да помогне во спречувањето на некои автоимуни заболувања, како што се ревматоиден артритис, лупус и мултиплекс склероза, иако се потребни повеќе истражувања.

Постојат ограничувања

Иако резултатите делуваат како надежни, експертите предупредуваат дека постојат непознати фактори. На пример, екстремно долгите теломери понекогаш можат да го зголемат ризикот од одредени болести, што укажува дека постои идеална должина на теломерите која науката допрва треба да ја разбере подобро.

Исто така, сè уште не е јасно која е оптималната доза на витамин Д. Во студијата биле користени 2.000 IU дневно, што е повеќе од моментално препорачаните 600 IU за лица под 70 години и 800 IU за постари лица. Од друга страна, некои истражувања покажуваат дека дури и 400 IU дневно можат да помогнат во спречувањето на настинки.

Стручните лица веруваат дека идеалната количина зависи од нивото на витамин Д во телото и навиките во исхраната на поединецот.

Иако резултатите од студијата се оптимистички, прерано е да се заклучи дека земањето високи дози на витамин Д може да го забави стареењето. Засега, она што го знаеме е: здравиот начин на живот е најсигурниот пат кон долговечноста. Урамнотежената исхрана, редовното вежбање, добриот сон, непушењето и справувањето со стресот се клучни фактори за здраво стареење.

Сепак, ако имате недостаток од витамин Д или сте во ризична група на заболувања на коските, земањето додатоци во исхраната и понатаму е разумен избор, поткрепен со долгогодишни истражувања.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.