Американците знаат да направат шоу од било каков настан, но кога се работи за „Супер боулот“ тогаш ќе се погрижат тоа да биде спортско шоу за кое ќе се зборува цела година. За претставата да биде уште подобра се погрижија и Њу Ингланд Пејтриотс и Сиетел Сихоукс, кои го одиграа еден од најдобрите и највозбудливите финални натпревари во историјата на овој спорт.
Њу Ингланд победи со 28-24 иако во последната четвртина имаше негатива од десет поени. Квотербекот Том Брејди ги предводеше Пејтриотс до триумфот со четири успешни додавања за тач даун, но вистински херој на тимот е Малком Батлер. Младиот фудбалер во својата дебитантска сезона успеа да пресретне додавање тач даун на противникот во енд-зоната на 20 секунди до крајот и така го одбрани последниот атак на Сиетел, кој доколку го коплетираше додавањето ќе го осовеше престижниот пехар. Тренерот на Сиетел Пит Керол веднаш по натпреварот ја превзема одговорноста за поразот, бидејќи во последната акција се одлучи за тач-даун додавање, наместо потребните два јарди да ги освои ранинг бекот и ѕвездата на тимот Маршон Линч.
Том Брејди заслужено го доби своето трето МВП признание и дојде до четвриот шампионски пехар прв по цели десет години, а сите ги освои со истиот тим, Њу Ингланд. Секој фудбалер на Њу Ингланд за победата ќе инкасира по 97.000 долари, додека поразените ќе добијат по 49.000 долари.
„Супер боулот“ е познат и по своите популарни и екстремногу скапи реклами, а оваа година носителот на ТВ-правата за натпреварот наплаќаше 4,5 милиони долари за спотови од 30 секунди. „Супер боулот“ уриваше рекорди и на социјалните мрежи, бидејќи на твитер биле напишани дури 28,4 милиони „твитови“, додека на „фејсбук“ за натпреварот зборувале дури 65 милиони луѓе, од кои 55 во САД.