Врзано со ланец и катанец за кревет било седумгодишното дете кое вчера почина во пожар во Гостивар. Гостиварското обвинителство отвори истрага за случајот по овие застрашувачки сознанија за што ја осомничи мајката дека сторила кривично дело – Повреда на семејни обврски, по член 203 став 2 од Кривичниот законик. Бидејќи било утврдено дека детето подолго време било малтретирано, обвинителството за неа побара и притвор.
Осомничената, во текот на 2021 година, со груба повреда на своите законски семејни обврски го малтретирала своето дете на возраст од 7 години, кое го врзувала со ланец и катанец за креветот. На 16 март, во станот во кој престојувало семејството избувнал пожар, a затоа што било врзано за креветот детето не успеало да го напушти домот и го загубило животот.
Таа од вчера беше спроведена во полициска станица а кривичното дело за кое се сомничи предвидува дека оној што со груба повреда на законските семејни обврски ќе предизвика смрт на член на семејството кој не е во состојба да се грижи за себе, ќе се казни со затворска казна од 3 месеци до 5 години.
Од МТСП велат дека останатите три деца се соодветно сместени во интернат во Гостивар и кај нив не се утврдени траги на насилство.
Од разговорите на стручните лица кои што се постојано со децата, утврдено е дека врз децата нема траги од било каков вид на насилство и истите се во добра психо - физичка состојба.Констатирано е дека едно од децата редовно посетувало училиште, а останатите се во предучилишна возраст.
Случајот го следи и Хелсиншкиот комитет за човекова права од каде очекуваат детална истрага но и евентуално одземање на родителското право на мајката над другите деца.
Од Гостиварскиот Центар за социјални работи претходно соопштија дека мајката и четирите деца во станот на улица Кеј Вардар се вселила пред десетина дена, а три години претходно од Ресен се преселиле во Гостивар. Досега не користеле никакви услуги од Центарот а не постојат официјални дојави од соседи ниту пак се евидентирани од МВР за какви било проблеми или родителска негрижа.