Претседателот на СДСМ, Венко Филипче денеска се очекува на прес-конференција да ги соопшти деталите за лидерската средба што ја побара минатата недела. Партиите ја чекаат поканата од Филипче и да ги слушнат деталите за лидерската средба по што ќе се знае каков став ќе заземат по ова прашање.

Лидерот на СДСМ на Донаторската вечер за помош на семејствата на настраданите и повредените во пожарот во Кочани минатата недела најави дека во Собранието ќе ги повика лидерите на најголемите политички партии на средба на која ќе им го презентира планот, односно што треба да се направи за државата бидејќи, како што рече, „очигледно е дека конвенционалните начини на водење на политика, на политичка борба, не даваат доволно брзо резултати“.

- Не се доволни само зборовите дека ни е потребно единство, дека ни е потребно некакво обединување. Тоа треба да го претвориме во вистински дела и вистински чекори зашто тоа е нешто што најмалку може да го направиме за 60-те семејства, 59 кои останаа без деца, другите кои имаат стотина деца на лекување и, секако, целото општество кое гледаме сега како бара некакви промени. Младите излегуваат на улица и бараат промена, а младите се категорија граѓани кои не ги интересира ниту минатото, ниту сегашноста, туку ги интересира иднината. И ние треба добро да размислиме како политичари што треба да направиме, рече Филипче.

Премиерот Христијан Мицкоски викендов кажа дека предлогот на претседателот на СДСМ Венко Филипче за лидерска средба е пресериозна тема за да се разговара преку медиуми. Тој рече дека е подготвен да го прими и да поразговараат на оваа тема.

- Од тоа што можев да разберам во јавноста е дека Филипче има некаков Предлог план. Тој може да го соопшти тој план преку прес-конференција, но, доколку цени дека и мене претходно треба да ме информира и запознае, јас сум секогаш тука. Сериозните теми бараат сериозен пристап, рече Мицкоски.

[Administrata publike nuk është vetëm mekanizëm për zbatimin e ligjeve dhe politikave, ajo është fytyra e shtetit, pasqyrë e efikasitetit dhe përkushtimit të tij ndaj qytetarëve. Sa më mirë të]

Од владината коалиција „Вреди“, пак, сметаат дека претседателот на СДСМ нема кредибилитет да повикува на лидерска средба.

- После најавите од СДСМ дека ќе бараат Анкетна комисија за Кочани, кое очигледно е во координација со нивните пулени ДУИ, кои наивно веруваат дека можат да се претстават како лажни жртви на политички прогон, господинот Венко Филипче потврди дека има намера да ја политизира колективната трагедија и со тоа нема кредибилитет да повикува на лидерска средба. Доволна им е координацијата со ДУИ, се наведува во коалицискиот став на „Вреди“ испратен до медиумите.

Партијата ЗНАМ најави дека откако ќе ја добие иницијативата, ќе се изјасни дали ќе учествува на лидерската средба. - Да ја добиеме иницијативата и да ја видиме, па ќе се изјасмиме, изјавија од партијата.

Партијата „Левица“ не се изјаснува дали претседателот на партијата и нивни претставници би присуствувале на лидерската средба посочувајќи дека ќе го кажат својот став откако ќе го дознаат форматот и планот за таа лидерска средба.

- Откако ќе дознаеме за форматот и планот за таа лидерска средба ќе дадеме и став за наше потенцијално присуство. Но, наместо политичарите да се среќаваат на средби, треба Собранието да работи транспарентно и одговорно кога тоа е најмногу потребно - за да се отворат прашањата за трагедијата во Кочани преку легитимни и ефективни демократски методи, и да се создаде политички амбиент за отворање на прашањата поврзани и со претходните немили настани за кои граѓаните бараат одговорност - како модуларната во Тетово, Дурмо турс и тн, посочуваат од Левица.

Од Демократската унија за интеграција (ДУИ), пак, бараат прво да се формира парламентарна комисија со меѓународен надзор, а потоа да се размислува за други чекори.

Иницијативата за формирање на ваква комисија од страна на Европскиот фронт предводен од ДУИ, како што вчера информираа за МИА од Кабинетот на претседателот на Собранието, е поднесена, но, како што појаснуваат, предлог за основање на ваква комисија може да поднесат најмалку 20 пратеници.

- Собранието на Република Северна Македонија не може да започне процедура бидејќи според член 76 став 3 од Уставот е утврдено дека предлог за основање на анкетна комисија можат да поднесат најмалку 20 пратеници, посочуваат од Кабинетот на претседателот на Собранието.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.