Ние сме конструктивна опозиција, но не сме контролирана опозиција - СДСМ нема да ги поддржи измените на Законот за прекршоци со кои системот „Сејф Сити“ треба да стартува од 1 февруари, соопшти партискиот лидер Филипче. СДСМ не се против безбедноста во сообраќајот, туку кој ќе ја контролира огромната база на податоци од граѓаните, кажа тој, пред собраниската која според најавите ќе се одржи во петок, а на која од ДУИ по неколку дневно тактизирање соопштија дека ќе дадат зелено светло за законските измени.

-Во однос на системот „Сејф сити“ и Законот за прекршоци ние тој закон нема да го поддржиме. Ние не сме против безбедноста во сообраќајот, доказ за тоа е што сме го почнале. Меѓутоа, не можеме да дозволиме системот парцијално да се имплементира. Освен што сме за безбедност во сообраќајот, ние сме и за безбедност на податоците којшто власта ниту го коментира ниту се обидува да го регулира. Седнаа на маса се договорија видовме, ќе видиме што е резултат друг договор од тој пазар, изјави Филипче.

Филипче на денешната прес-конференција ја обвини власта за дефокус со измислени и лажни афери за опозицијата, додека според него течат криминални тендери, државата е изолирана, а економската состојба, како што вели, катастрофална. Тој за следните денови најави нови бомби од антикорупцискиот тим на СДСМ за коишто тврди, доаѓаат од членови на ВМРО-ДПМНЕ, а доколку надлежните институции не реагираат, вели тие ќе поднесат соодветни пријави.

-Премиерот Мицкоски политиката во земјата ја сведе на ниво на таблоид. Наместо решенија и одговори за проблемите со кои граѓаните се соочуваат, сведоци сме на празни изјави на премиерот на ниво на жолт печат, без суштина, без реална политика. Ова не е политика, туку дефокус. Додека течат криминални тендери зад грбот на народот му се сервираат измислени афери, црни кампањи, јавен линч врз опозицијата. Ќе објават една лажна вест за зграда во Дубаи, а во позадина ќе протуркаат Декрет во Собранието. Целото внимание намерно се насочува кон нешто измислено, изјави Филипче.

Со поддршката од ДУИ за Законот за прекршоци, која произлезе од лидерската средба со Мицкоски, владејачкото мнозинство ќе го обезбеди потребното двотретинско мнозинство од 80 пратеници, за тој да биде донесен. Ахмети и ДУИ одлучија сега да дадат шанса на проектот, а доколку нивните барања не бидат исполнети најавија дека ќе иницираат нови законски измени. Едно од главните нивни барања се известувањата од „Сејф Сити“ да бидат и на албански јазик, кој велат, е службен во државата, а имаат забелешки и за висината на казните

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.