- Дефинитивно сум задоволен од постигнатиот резултат. Работевме доста на управните постапки кои се важни за граѓаните, на замена на старите пасоши со нови, издавање на државјанства, го зголемивме бројот на училишта во кои се изучува македонскиот јазик за нашите најмлади и потпишавме многу договори и со САД и со Канада во областа на образованието, транспортот, медицината, договори кои и понатаму ја продлабочуваат соработката меѓу Македонија со САД и Канада во многу области. Општо земено, ги поддржувам сите наши македонски организации за сите нивни потреби. Достапен сум за сите иселеници 24/7. Има многу институции кои се одговорни за различна област, и изборот на пратеник од оваа единица дефинитивно помогна што поголем број наши иселеници да се информираат за многу работи кои Македонија ги нуди, вели Саздов.

Додава дека на неговите средби со македонските државјани во САД и Канада, најмногу прашања добива за зачувувањето на македонскиот јазик во иселеништво, за програмите за зачувување на македонската култура и национален идентитет, за спорот за името, и за можностите за инвестирање и водење бизнис во Македонија.

- Гледаме дека голем број американски компании се решија да инвестираат во Република Македонија. Воедно многу наши иселеници се решија дел од својот капитал да го вложат во Македонија. И понатаму ќе работиме на привлекување на странски инвестиции, за отворање што е можно повеќе работни места во Македонија. Знаеме за Џонсон контролс, кој изгради и втора фабрика во Штип, тука е Амфенол, Кемет електроникс, потоа имаме и наши иселеници од Њу Џерси кои инвестираат во хотелската индустрија, а голем број мали и средни претпријатија во битолската индустриска зона Жабени се изградени од иселеници од битолскиот крај. Од канадски инвестиции имаме една посериозна инвестиција во информатичките услуги, како и фирма која се занимава со геолошки истражувања на повеќе локации и веруваме тие секако ќе се претворат во концесии за минерални суровини. Работиме со многу други компании во Канада и во САД, да ги искористат поволните услови во Македонија, со цел да ја намалиме нашата стапка на невработеност, за која мора да признаеме дека со напорите на Владата на ВМРО-ДПМНЕ е намалена за цели 10 проценти, вели Саздов.

Пратеникот на ВМРО-ДПМНЕ додава дека е задоволен што бројот на македонски граѓани кои се пријавија за гласање во 8 изборна единица, двојно се зголеми во споредба со изборите во 2011 година, на 2.000 лица, и покрај тоа што на овие избори не важат старите патни исправи.

- Идејата нашите иселеници да учествуваат во изборите е вкоренета во ВМРО-ДПМНЕ од самите почетоци на партијата. Малкумина се сеќаваат дека и на референдумот за осамостојување на Македонија учествуваа иселениците, кои гласаа во црквите. За жал, таа пракса не продолжи во следните години, кога немаше политичка волја во Република Македонија за гласање на дијаспората. Меѓутоа, таа определба беше вкоренета во ВМРО-ДПМНЕ и ние правиме се што можеме да го вратиме тоа право на нашите граѓани да бираат и да бидат избрани, кое е уставно загарантирано. Имаме малку конзулати, има многу повеќе места каде што живеат Македонци, а имаме само 4 конзулати и 2 амбасади во Северна Америка. Во иднина, мораме да мислиме за пристапноста на гласачките места и за олеснување на самата постапка за пријавување на гласачите, вели Саздов. /Извор: МИА/

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.