Полицијата поднесе кривична пријава против татко од струмичко, по вознемирувачкото видео на социјалните мрежи на кое се гледа дете врзано со јаже за рацете и вратот, наводно казнето од таткото поради тоа што украло пари од локална продавница.

Од МВР додаваат дека сторителот бил веднаш идентификуван и ќе одговара за сторено кривично дело „насилство врз дете“. За целиот случај бил запознаен и Центарот за социјални работи Струмица, по чии насоки детето било предадено на мајката.

На снимката која ја згрози јавноста се слуша комуникацијата меѓу таткото и очајното детето, кое моли да биде пуштено. Тоа кажува дека крадело пари за да си купи јадење и ветува дека тоа повеќе нема да го повтори, но таткото одбива да го одврзе.

Ваквото малтретирање врз децата несомено ќе остави сериозна траума во иднина, велат психолозите, според кои, најважно е дететото да добие соодветна психолошка помош, а сторителот сериозна санкција.

Ова е втор случај на насилство врз дете за непол месец, кое беше документирано со видео запис. Тогаш 28-годишен маж заврши во притвор затоа што ја истепал својата четиригодишна ќерка.

Комитетот на УНЕСКО во Париз одлучи на една година да го одложи впишувањето на Охридскиот регион на листата на загрозени светски богатства, под услов да се исполнат низата обврски за зачувување на статусот и за тоа, до 1 февруари 2026 година да се достави извештај. Ова се случи откако Владата ги задолжи сите членови на македонската делегација во Париз заеднички да поднесат амандман за повлекување на Нацрт-одлуката. За владата одлуката да не се стави веднаш охридскиот регион на листата на „загрозени богатства“ е успех, но и обврска да се направат неопходните чекори.

-Ситуацијата што ја наследивме беше резултат на години запоставување, неодговорно управување и недостаток на суштински мерки од страна на претходната влада. Наместо превенција и одговорност, оставија проблем што бараше итно решавање. Нашиот пристап беше поинаков. Не декларативен, туку посветен и фокусиран на резултати. Иако денес зборуваме за зачувување на статусот, свесни сме дека ова е прв чекор. Пред нас стои обврската да обезбедиме долгорочна заштита, одржливо управување, изјави Министерот за надворешни работи Тимчо Муцунски.

-Одлуката на Комитетот за нас е поттик и мотивација, најсериозно да продолжиме со конкретните мерки кои ќе овозможат итна имплементација на предвидените корективни мерки базирани на препораките на реактивните мисии и од 2020 и од 2024 година. За потсетување, два пати ни се има случувано ова, два пати се има ветувано, и два пати во време на владата на СДСМ и ДУИ ништо не е направено во однос на овие прашања, изјави Министерот за култура и туризам Зоран Љутков.

И Кирил Пецаков, градоначалникот на Охрид, е задоволен од одлуката. Според него, таа е потврда дека се препознаени напорите на заштита и унапредување на Охридскиот регион.

Незадоволни од, како што ја нарекуваат, политичката одлука на УНЕСКО, се невладините организации. Од граѓанската иницијатива Охрид ЅОЅ потенцираат дека носењето на политичка одлука третпат по ред е преседан, и пораз не само за Македонија туку и за светот. Слушањето лобисти наместо експерти само охрабрува нови деструктивни активности, а со носење политички наместо експертски одлуки се праќа порака до владите дека немаат одговорност веднаш да ги запрат деструктивните проекти, велат од граѓанската иницијатива Охрид SOS.

Ден по гласањето во Европскиот Парламент за извештајот за Македонија, Георгиев во интервју за БТВ не штедеше зборови да ги истакне напорите на официјална Софија да ги отстрани македонскиот јазик идентитет од финалниот текст. На тој начин според него, бугарските евопратеници спречиле европската институција да биде искористена за домашна политичка пропаганда. Од позиција на земја-членка се обиде да појасни кој е кој во моментов во Европската Унија.

-Бугарија е силна земја, Бугарија е фактор и во Европската Унија и во овој регион, со што Македонија треба да се соочи. Бугарија е земја-членка на ЕУ, а Македонија е едвај кандидат за сега. / Европратениците знаат што прават и зошто се таму, за да не дозволат за негова внатрешно-политичка употреба на Северномакедонскиот премиер да се злоупотребува таа институција. Северномакедонскиот премиер создава теми за да може да го прилагодува дополнително општеството, но јас мислам дека граѓаните на Македонија кои го заслужуваат своето членство во ЕУ и во таа смисла заслужуваат лидери кои ќе го водат кон него,- - Георг Георгиев – Министер за надворешни работи на Бугарија.

На тоа момче не треба да му се придава значење – порача премиерот Мицкоски прашан за коментар за наводите на Георгиев и ословувањето како „Северномакедонски премиер“

-Тоа момче е пратено да привлече мое внимание, мислам дека не треба да му дадеме можност, оставете го тоа момче, тоа е влада која ја раководи друг, која треба да одработи таму нешто. Оставете го. Тоа е исто како кога глушецот го задева лавот,- - Христијан Мицкоски .

Изјавите на бугарскиот министер Георгиев ги осуди и лидерот на СДСМ Венко Филипче кој оцени дека тоа не е во духот на демократијата и добрососедството. Вчера речиси сите бугарски политичари го поздравија исходот од Стразбур. Лидерот на ГЕРБ Бојко Борисов изјави дека гласањето е резултат на обединувањето на буагрските европратеници и воедно и порача дека им подава рака на пријателите во земјава да продолжат напред врз основа на почитување на договорот за добрососедство.