Премиерот на Холандија, Марк Руте, кој заедно со неговиот луксембуршки колега, Ксавиер Бетел, престојува денеска во Косово, изјави дека неговата држава ги поддржува Косово и Србија на патот на дијалогот со цел нормализирање на односите меѓу двете држави, јави дописникот на МИА од Приштина.

Обраќајќи им се на новинарите по средбата со косовскиот премиер, Албин Курти, Руте рече дека намалувањето на тензиите во областите во северно Косово, населени со мнозинско српско население, е значајно не само за мирот во регионот, туку и за просперитетот на Косово и Србија кон интеграциите во Европската унија.

- Денеска ја изразивме нашата загриженост поради растот на тензиите меѓу Косово и Србија. Холандија и Луксембург настојуваат да ја нормализираат и да ја деескализираат ситуацијата во правец на водење дијалог, да ги нормализираат односите меѓу двете држави. Верувам дека ова е значајно не само за мирот во регионот, туку и за просперитетот кон интеграциите во ЕУ, рече Руте.

Според холандскиот, вперувањето со прст од страна на Брисел кон „виновникот“ во актуелниот спор меѓу Приштина и Белград нема да помогне за смирување на состојбите.

- Не знам дали треба да го вперуваме прстот кон виновникот, кон Косово или на Србија, затоа што тоа не помага во ситуацијава. Ние сакаме да бидеме од помош. Во моментот кога ЕУ поаѓа да го бара виновникот и да го вперува прстот, додека обете страни велат дека се во право, ја губиме позицијата, рече Руте.

Премиерот на Луксембург, Ксавиер Бетел, кој заедно со неговиот холандски колега, Марк Руте, престојува денеска во Косово, изјави дека неговата земја и Европската унија го поддржуваат дијалогот меѓу Косово и Србија и порача дека никој нема да биде победник доколку дојде до конфликт меѓу двете држави, јави дописникот на МИА од Приштина.

На прес-конференција по средбата со косовскиот премиер, Албин Курти, Бетел рече дека оваа посета била планирано пред доста време и дека со Руте не дошле во регионот за да судат, туку за да ги слушнат страните и да помогнат во наоѓањето решение.

- Кога се планираше ова патување не знаевме дека ќе има тензии. Ние се трудиме да градиме мостови. Вчера бевме во Белград, денеска сме во Приштина. Значајно е за нас што знаеме дека има патоказ (од ЕУ) за дијалогот. Треба да ја елиминираме секоја можност од евентуални кризи, од кои најмногу страда народот. Ние како политичари носиме одлуки, но народот ги трпи последиците, рече Бетел.

Премиерите на Холандија и Луксембург допатуваа во Приштина од Белград, каде што вчера се сретнаа со претседателот на Србија, Александар Вучиќ.

Нивната посета на двете земји, како што изјавија синоќа по средбата со Вучиќ, е со цел да придонесат за смирување на тензиите и нормализирање на односите меѓу Приштина и Белград.

Пред да се сретнат со Курти, Руте и Ксавиер беа примени од претседатгелката на Косово, Вјоса Османи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.