Зборувајќи на состанокот на тинк-тенкот „Чатам Хаус“ во Лондон, Руте ја повика Алијансата итно да го зголеми производството на оружје, објавува „Бизнис инсајдер“.

„Кога станува збор за муниција, Русија произведува за три месеци колку што НАТО произведува за една година“, рече Марк Руте, генерален секретар на Алијансата и поранешен холандски премиер.

„Русија ги обновува своите сили користејќи кинеска технологија и произведува повеќе оружје, побрзо отколку што очекувавме“, додаде тој.

Руте повика на „квантен скок“ во начинот на кој Европа се брани:

„Мора да имаме повеќе сили и капацитети за целосно да ги спроведеме нашите одбранбени планови“.

Руте рече дека се очекува Русија да произведе 1.500 тенкови, 3.000 оклопни возила и 200 ракети „Искандер“ до 2025 година. Русија значително го зголеми производството на оружје и муниција за да ја продолжи војната против Украина, ставајќи ја својата економија во воен режим.

Таа доби помош од сојузници како Кина, Иран и Северна Кореја.

Според извештајот на Меѓународниот институт за стратешки студии, Русија минатата година потрошила 13,1 трилиони рубљи (околу 145,9 милијарди долари) за својата војска. Тоа е еквивалентно на 6,7 проценти од БДП на земјата и претставува годишно зголемување од 41 процент во реални услови.

Европските воени трошоци изнесуваа 457 милијарди долари минатата година, речиси 12 проценти повеќе во реални услови отколку претходната година и 50 проценти повеќе отколку во 2014 година. Ако се земе предвид паритетот на куповната моќ, руските воени трошоци достигнуваат еквивалент од околу 461,6 милијарди долари, се вели во извештајот.

Соединетите Американски Држави се најголемата воена сила во рамките на НАТО, а претседателот Доналд Трамп изврши притисок врз европските членки да ги зголемат своите воени буџети. Руте ги поддржа барањата на САД за зголемување на минималното ниво на воени трошоци од страна на членките на НАТО од 2 на 5 проценти од БДП.

Војната во Украина ескалираше во војна на исцрпување, при што двете страни испукуваат илјадници артилериски гранати секој ден.

Но, сојузниците на Украина во НАТО се борат да го зголемат производството и за снабдување на Украина и за надополнување на сопствените резерви, поради предупредувањата дека Русија би можела да се подготвува да го нападне НАТО во наредните години.

„Сите сме сега на источното крило. Нова генерација руски ракети патува со брзина на звукот. Растојанијата меѓу европските престолнини сега се прашање на минути. Повеќе нема Исток и Запад, постои само НАТО“, рече Руте.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.