Руските сили заедно со сепаратистите пред неколку месеци презедоа целосна контрола врз целиот Луганск, еден од двата источни региони што го сочинуваат Донбас. Прокламираната цел на Русија беше да го преземе целиот Донбас.

Но, минатонеделната молскавична украинска контраофанзива ги турна руските сили кон исток и го донесе фронтот во близина на границата на самопрогласената ЛНР, призна денеска сепаратистичкиот командант Андреј Марочко.

Еден ден по повлекувањето на украинските сили од Лисичанск, рускиот претседател Владимир Путин прогласи победа во тој регион. Во текот на јуни и јули се водеа жестоки битки за двата важни града во Луганск, Северодонецк и Лисичанск.

Во последните денови се појавија непотврдени информации за борби во Кремина, едно од селата што Русија ги зазеде во првите денови од битката за Донбас.

Серхи Хаидаи, украинскиот гувернер на регионот Луганск, рече дека Русите сè уште го контролираат Кремина: „Окупаторите се вратија во Кремина и ги симнаа украинските знамиња што ги поставија нашите партизани. Русите се обидуваат да остават впечаток дека имаат цврсто упориште на населбата“.

„Го исклучија интернетот во сите окупирани области за луѓето да не можат да ни достават информации. Во Луганск нема да има фактор на изненадување, луѓето мора да бидат трпеливи. За жал, утре нема да бидеме во Луганск, но наскоро ќе бидеме“. - изјави Хајдај.

„Во регионот Луганск веќе формиравме регионален штаб за деокупација на нашите територии. Подготвуваме сè за враќање дома (судски органи и агенции, служби за итни случаи, пошта, здравство...) со цел брзо да се врати животот во заедниците“, изјави украинскиот гувернер на Луганск.

„Нема да има вакуум што се однесува до администрацијата. Прво, повторно ќе ги воспоставиме мобилните комуникации и интернетот, а потоа и останатата клучна инфраструктура, во зависност од тоа колку е оштетена. Само чекаме на нашата армија“, заклучил Хајдај.