Ова прашање моментално регулирано на начин што тие се пријавени на определено време, а секоја година се јавуваат на јавните повици од ресорните центри зависно од потребите низ училиштата . Проблемот кој го нагласуваат дел од родителите е што децата секоја година добиваат нов асистент, што значително го уназадува нивниот напредок. Според нив потребно е да се изнајде решение за асистентите да добијат постојани работни места. Родителите се жалат и на долгите административни процедури кои ги минуваат секоја година, докажувајки дека на нивните деца им е потребен образовен асистент.

-Нашите деца се навикнуваат на тој човек. Некогаш и проблем е да се најде вистински асистент за одредено дете, затоа што детето не прифаќа секој да му биде асистент. И сега ако се најде и ако тој асистент му биде сменет тоа е огромен проблем за тоа дете. Асистентите треба да бидат со трајно решение и да си бидат од 1во до завршување на средното образование истот асистент со истото дете,- Зоран Мијалков.

Министерката Весна Јаневска пак во интервју за РСЕ изјави дека дека трајното вработување на образовни асистенти не е можно, поради тоа што бројката која е потребна низ училиштата се менува секоја година.

-Не е можно трајно вработување на образовните асистенти затоа што бројката е променлива и потребите се променливи. И нема како во минатото да давам лажна надеж дека да тоа утре ќе го решиме. Доколку во иднина се појави можност да одреден број од нив бидат трајно вработени јас со задоволство тоа ќе го прифатам,- Весна Јаневска – министерка за образование и наука .

Откако дел од ресорните центри низ општините веќе ги објавија јавните повици за вработување на образовните асистенти, од опозициската СДСМ бараат нивна итна ревизија, обвинувајки за партиски вработувања наместо искусни кадри.

-Ги избрка искусните и обучени образовни асистенти и ги замени со партиски кадри. Наместо децата да го добијат лицето на кое му веруваат, добија непознати луѓе без искуство, но со членска книшка од ВМРО-ДПМНЕ. Јаневска го руши инклузивното образование за да вдоми партиски војници,- Јованче Манасков – СДСМ.

Од ВМРО-ДПМНЕ пак нагласуваат дека годинава за прв пат образовни асистенти ќе има и во средните училишта, а обвинувањата од СДСМ ги оценуваат како лажни вести кои предизвикуваат вознемиреност.

Министерката Јаневска информираше дека бројот на асистенти во основното образование е 1.876, додека во средното образование се планирани околу 150.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.