Барем така е запишано во повеќето современи патеписи за малата азиска земја. И нашиот впечаток беше безмалку идентитечен, привлечени од мистеријата и убавината што ја крие Далечниот Исток. Порано митска земја, денес земја на можности. Ќе ве пречекаат вредни, љубезни, исклучително гостопримливи лица. Во тоа се уверивме и ние.

Како главен град на островот со 24 милиони жители, Тајпеј е срцето и душата на Тајван. Влегува во 20-те најубави градови на светот. Колоритни пазари со различни продавници за храна, облека, сувенири и ресторани се уникатните места за откривање на културата на градот.

-Тајпеј е исклучително модерен град, но истовремено ја зачувува својата традиција. Токму спојот на овие две култури го прави една од најпривлечните дестинации за патување. Специфичните продавнички со улична храна кадешто може да ја пробате онаа најтрадиционална тајванска храна се неизоставен дел од културата на Тајван. Градот има високо ниво на безбедност и добра инфраструктура што дополнително го прави привлечен за посета.

Вниманието во центарот на градот веднаш ќе ви го привлече грандиозната убавица „Кулата 101“, еден од заштитните знаци на Тајпеј. Со своите 101 кат и висина од повеќе од 500 метри, делува повеќе од импресивно, особено навечер. Погледот од врвот ви го сервира Тајпеј на дланка.

Палатата на Националниот музеј не помалку ве остава рамнодушни поради епитетот богатство скриено во планина.

-Националниот музеј на Палатата е еден навистина импресивен објект, основан во минатиот век и еден од заштитните знаци на Тајпеј. Во него се изложени повеќе од 700.000 кинески древни уметнички парчиња. Според информациите, тие во најголем дел се собрани од кинеските императори.

И само што ќе помислите дека импресиите не можат да ви бидат поголеми, ќе стигнете во Меморијалната сала на Чанг Каи-Шек кој се смета за татко основач на Тајван. По граѓанската војна во Кина, која ја губи од комунистичката партија, Каи-Шек и неговата влада, заедно со војската и дел од населението се префрлаат на островот. Станува претседател на државата до својата смрт во 1975 година. За некои е брутален диктатор, а за многумина, посебно на островот, реформатор што го зачнал денешниот модерен Тајван.

Време е за патување од Тајпеј во Каошунг, вториот град по големина на Тајван. Со ултра модерните брзи возови кои се движат со 300 км на час ќе стигнете за час и половина и нема да имате чувство дека воопшто сте патувале. Сместен во јужниот дел на Тајван, Каошунг важи за најголемиот индустриски центар на островот.

Тука се наоѓаат главните фабрики на тајванскиот гигант во електрониката „Јагео“. Компанијата која одлучи да инвестира 205 милиони евра во Македонија и да отвори 4.000 работни места. Не криејќи го своето задоволство од потпишувањето на договорот за најголемата „гринфилд“ инвестиција од осамостојувањето на земјава, директорот на ТИРЗ, Јован Деспотовски кажа дека Македонија со ова станува дел од мапата како важна алка во снабдувањето на светски брендови како „Епл“ и „Тесла“.

-Може да очекуваме дека просечната бруто плата во компанијата би достигнала и до 1.200 евра, откри Деспотовски за Канал 5.

„Јагео” има 40 илјади вработени во Азија, Европа и Америка. Со електронските компоненти што ги произведува тие се еден од светските најдобри производители за микро чипови, а се користат за авионската и автомобилска индустрија, 5G и телекомуникациите, за медицината, зелена енергија.

-Тука каде што сте во моментов се фабрики за производство на микро чипови. Нашиот пазар за отпорници за чипови е околу 30 проценти на светско ниво. Наши база на клиенти се глобални компании. Многу значајни, како „Епл“, „Самсунг“, некои од автомобилската индустрија и „Бош“...вели Тери Цвеј, вработен во „Јагео“.

Иако е мал остров, Тајван е голема економска приказна, особено во областа на електрониката. Сепак, освен срдечноста и благосостојбата во која живеат Тајванците, на плеќи им тежи неизвесноста во односите со Пекинг. Не сакаат јавно да зборуваат за политика, но зад камера дел од нив признаваат дека постои страв од можна интервениција на Кина.

Но, тоа денеска не е единствениот страв на Тајванците, каде очигледно пандемијата оставила голема трага. Шетајќи по улиците на Тајпеј, речиси и да не видовме човек без заштитна маска. Дури и на отворен простор. А ние заминавме со полни гради и убави спомени, носејќи ја магијата на Далечниот исток и на една, за нас Балканците, интригантна цивилизација.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.