Советниците од ВМРО-ДПМНЕ и ЗНАМ на денешната 11. седница на Советот на Општина Центар не ја поддржаа Предлог-одлуката за суспензија на дел од ДУП „Буњаковец 1“, со која требаше да се спречи реализацијата на спорната градба кај студентскиот дом „Кузман Јосифовски-Питу“, сè додека не се обезбедат безбедни и правно сигурни услови за пристап и реализација на објектот.

За суспензијата гласаа 10 советници, што не беше доволно за донесување на одлуката. Советниците од ВМРО-ДПМНЕ и ЗНАМ не дадоа поддршка.

Станува збор за градежна парцела на аголот на булеварите „Климент Охридски“ и „Митрополит Теодосиј Гологанов“, за која Општина Центар уште минатата година укажа на сериозни безбедносни и правни проблеми.

Единствениот пристап до парцелата минува покрај студентскиот дом „Кузман Јосифовски-Питу“, каде што се наоѓа резервоар со запаллива материја што се користи за греење, што претставува потенцијален ризик од пожар.

Дополнително, пристапот до парцелата минува преку подземни инсталации што ја снабдуваат околната населба и студентскиот дом, како и преку објекти легализирани во минатото, за чие отстранување се потребни дополнителни постапки кои можат да предизвикаат сложени правни последици.

Градоначалникот на Општина Центар, Горан Герасимовски, оцени дека советниците од ВМРО-ДПМНЕ и ЗНАМ, со тоа што не дадоа поддршка за суспензијата, наместо да го заштитат јавниот интерес, го отворија патот за реализација на спорната градба.

„Минатата година Советот со 19 гласа ЗА ја поддржа суспензијата затоа што сите бевме свесни за ризиците што ги носи оваа градба. Денес, проблемите се исти – нема соодветен и безбеден пристап, трасата минува покрај резервоар со запаллива материја, преку подземни инсталации и преку легализирани објекти. И покрај тоа, советниците од ВМРО-ДПМНЕ и ЗНАМ останаа воздржани и не дозволија суспензијата да биде изгласана. Кога знаете дека постојат вакви ризици, а сепак не гласате за суспензија, тогаш оправдано се поставува прашањето чиј интерес штитите – на граѓаните или на инвеститорот? За мене безбедноста и интересот на граѓаните мора да бидат пред секој друг интерес“, изјави Герасимовски.

Ставот на градоначалникот останува непроменет – на оваа локација не треба да се дозволи реализација на објект додека не се обезбедат целосно безбедни и законски услови за пристап, без загрозување на жителите, студентите и постојната инфраструктура.

Општина Центар - Скопје

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

– Повеќе капитални инвестиции, поголема поддршка за граѓаните и историско намалување на обврските – тоа се резултатите од одговорното и домаќинско управување со Град Скопје.

Со ребалансот го зголемуваме Буџетот за дополнителни 61,76 милиони денари, со што основниот Буџет на Град Скопје достигнува рекордни 5.324.649.755 денари.

Ова е резултат на остварените заштеди, финансиската дисциплина и кратењето на непродуктивните трошоци.

Во минатото ребалансите значеа кратење на инвестициите и создавање нови долгови.

Ние покажавме дека може поинаку – нашиот ребаланс носи нови проекти и поголема поддршка за граѓаните.

Обезбедуваме:

– Нови 61 милион денари за Европската престолнина на културата – Скопје 2028.

– Нов капитален проект за изградба на мост и улица што ќе ги поврзат Ѓорче Петров и Сарај и ќе создадат нов влез во Скопје, за што во Развојната програма се предвидени 420 милиони денари.

– Дополнителни средства за онколошките пациенти.

До почетокот на август пристигнаа 1.265 уредни барања и сите беа исплатени.

Средства ќе има и за секој пациент што ќе поднесе барање до крајот на годината. Никој нема да биде изоставен!

– Нови клупи и столчиња, ИТ-опрема, училишни кабинети, игралишта и фитнес-зони, како и средства за ски-викенд за средношколците по успешната реализација на бесплатниот летен камп.

– Нови 25 милиони денари за реконструкција на помалите улици во скопските општини и 10 милиони денари за чистење на депониите.

Истовремено, додека ги зголемуваме Буџетот и инвестициите, ги намалуваме наследените обврски.

За само девет месеци, вкупните обврски на Град Скопје, јавните претпријатија, културните установи и средните училишта ги намаливме за 60,2 милиони евра!

Заклучно со 27 август 2026 година, Град Скопје ги намали тековните обврски за 322,1 милион денари и за дополнителни 743 милиони денари по основ на кредити, неисплатени експропријации, изгубени судски постапки со камати и судски трошоци, неисплатени субвенции и преземени програмски активности.

Обврските се значително намалени во сите јавни претпријатија:

– „Водовод и канализација“ – за 1,66 милијарди денари – ЈСП „Скопје“ – за 634,9 милиони денари – „Комунална хигиена“ – за 122 милиони денари

– „Паркови и зеленило“ – за 113,9 милиони денари – „Градски паркинг“ – за 52,9 милиони денари – „Улици и патишта“ – за 31,9 милиони денари

Половина од културните установи се целосно раздолжени, а кај останатите обврските се значително намалени.

Музејот на Град Скопје, кој минатата година имаше сериозни долгови и исклучена струја под раководство на кадри предложени од Левица, денес има нула денари обврски.

КИЦ, кој беше препознатлив по долгови, репрезентации и конгреси на ДУИ и Левица, до крајот на септември ќе има нула обврски, додека ДКЦ и Културниот дом „Кочо Рацин“ веќе се целосно раздолжени.

МКЦ ги намали обврските за 7,6 милиони денари, а обезбедени се средства за Планетариумот, киното „Милениум“ и е-спорт центарот. Зоолошката градина ги намали обврските за околу пет милиони денари, а Градската библиотека за 2,5 милиони, со дополнително намалување од 2,5 милиони денари до крајот на годината.

Заклучно со вториот квартал, обврските беа намалени за речиси 55 милиони евра, а до 27 август намалувањето достигна 60,2 милиони евра.

И додека ги враќаме старите долгови, инвестираме повеќе од кога било!

По најдобриот прв квартал во историјата на Град Скопје, зад нас е и најдобриот втор квартал според реализацијата на капиталните проекти.

Тоа го постигнавме и покрај наследената задолженост од речиси 300 милиони евра и девастираните јавни претпријатија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Полицијата се сомнева дека на стрелиштето „Чешка зброевка“ во Даниловград е извршено тројно убиство, а засега непознатиот сторител, кој го напуштил местото на настанот вооружен, интензивно се бара, соопшти Управата на црногорската полиција.

Како што неофицијално дознава РТЦГ од Управата на полицијата, жртвите се Немања Капор (20) и Петар Глобаревиќ (24) од Подгорица и Момир Радоњиќ (67) од Даниловград.

Неофицијално, последното лице видено е странски државјанин и потрагата е насочена кон него.

Од клубот „Чешка зброевка“ неофицијално му соопштија на РТЦГ дека нивните вработени, кои биле на работа без оружје и не можеле да се одбранат, биле убиени.

На местото на настанот пристигнал и директорот на Управата на полицијата на Црна Гора, Лаза Шќепановиќ.

Сторителот, како што се сомнева полицијата, убил три лица со огнено оружје, по што го напуштил местото на настанот вооружен.

„Со оглед на тоа што вооружениот сторител го напуштил местото на настанот и претставува опасност, ги повикуваме граѓаните да останат во своите домови додека полицијата не го стави сторителот под контрола, како и да бидат претпазливи во комуникацијата со непознати лица и да пријават какво било сомнително однесување во најблиската полициска станица“, соопшти полицијата.

Управата на полицијата наведува дека, по собирањето на потребните информации, фотографија и опис на бараното лице ќе бидат објавени за јавноста.

„Силни полициски сили - Специјалната полициска единица и Специјалните полициски единици - се распоредени за да го пронајдат сторителот. Во неколку градови е воспоставена блокада на потесното и поширокото подрачје“, објави УП.

Полицијата, во координација со надлежното обвинителство, презема сите потребни мерки и дејствија за идентификување и пронаоѓање на сторителот, како и за целосно расветлување на инцидентот.

Полицијата запира и контролира секое возило од правец на Даниловград до Подгорица.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.