Информациите што се покажаа корисни за оваа операција, во која беа вклучени 8 хеликоптери, беа обезбедени од Курдите , а Русија го отвори сирискиот воздушен простор, рече Трамп и им се заблагодари на Сирија, Турција и Ирак за нивната поддршка.
Турскиот претседател Реџеп Таип Ердоган беше меѓу првите што рече: „Турција е горда што им помогна на САД, сојузник во НАТО, да го убијат озлогласениот терорист“.
„Денес се сеќаваме на сите жртви на Ал-Багдади, цивили и војници - нашите херои, кои ги загубија своите животи во одбрана на светот од терористите на Исламската држава. Турција ќе продолжи да соработува со САД и другите во борбата против тероризмот во сите нејзини форми. Да ги здружиме силите без одложување и да ги победиме сите терористички групи кои работат во регионот “, рече Ердоган.
Израелскиот премиер Бенјамин Нетанјаху му честиташе на Трамп за „импресивното достигнување што доведе до смрт на лидерот на ИД“.
„Тоа е одраз на нашата заедничка решеност, САД и сите слободни земји, да се борат со терористичките групи и терористичките држави. Ова е важна пресвртница, но пред нас останува уште многу работа“, рече Нетанјаху.
Британскиот премиер Борис Џонсон изјави дека смртта на Ал-Багдади е „важен момент во борбата против теророт, но дека битката против чудовиштето Даеш (арапскиот акроним за ИД) не е завршена“.
„Ќе работиме со нашите коалициони партнери за да ставиме крај на криминалните и варварски практики на Даеш еднаш засекогаш“, истакна Џонсон.
Францускиот министер за одбрана Флоренс Пали им честиташе на САД за операцијата, но исто така предупреди дека тоа не значи крај на терористичката група Исламска држава.
„Багдади се повлече како терорист, но ИД не. Ние продолжуваме да се бориме со ИД и со партнерите и ќе се прилагодиме на новите регионални околности“, напиша Пали на Твитер.
Сириските демократски сили (СДФ), главно составени од курдски борци, објавија дека американската акција е успешно спроведена благодарение на нивните информации и дека Ал-Багдади бил точно лоциран.
Висок официјален претставник на СДФ, Редур Халил, рече дека ќе ги засили разузнавачките напори и операциите ќе се фокусираат на „заспаните ќелии“. Тој исто така ја обвини Турција дека поради нејзината офанзива во северо-источна Сирија, ловот по Багдади требало да се одложи еден месец.
Министерството за одбрана на Русија соопшти дека нема „сигурни информации“ за американската операција во областа Идлиб, под турска контрола и „втората елиминација на Ал-Багдади“.
Поточно, во јуни 2017 година Русија објави дека „најверојатно“ го убиле лидерот на ИД во воздушен напад врз градот Рака.
Иран, меѓутоа, верува дека смртта на лидерот на ИС Ал-Багдади не е „голема работа“.
„Не е голема работа. Вие го убивте сопственото суштество“, напиша на Твитер ,Азари-Јахром, ирански министер за информации.