Свет

Разузнавачка служба на Естонија: Русија се подготвува за воен конфликт со Западот

Русија се подготвува за воен конфликт со Западот во следната деценија и може да биде одвратена со контраактивно зголемување на вооружените сили, соопшти денеска естонската Надворешно разузнавачка служба.

Шефот на разузнавањето рече дека проценката се заснова на руските планови да го удвои бројот на сили стационирани долж нејзината граница со членките на НАТО - Финска и балтичките држави Естонија, Литванија и Летонија.

„Русија го избра патот на долгорочна конфронтација... и Кремљ веројатно предвидува можен конфликт со НАТО во следните десет години“, изјави Каупо Росин при објавувањето на извештајот за заканите по националната безбедност на Естонија.

Воен напад од страна на Русија е „многу малку веројатен“ на краток рок, рече тој.

„Ако не сме подготвени, веројатноста (за руски воен напад) би била многу поголема отколку без никакви подготовки“, додаде Росин.

Естонија и другите балтички земји ги зголемија своите воени трошоци на повеќе од 2 отсто од вредноста на нивните економии откако Русија го анектираше Крим во 2014 година, а сојузниците на НАТО го зголемија своето присуство во тие земји.

Германија планира да има 4.800 борбено подготвени војници во регионот до 2027 година, во своето прво постојано странско распоредување по Втората светска војна, а Росин рече дека НАТО и неговите сојузници се движат во вистинската насока за да се спротивстават на руската закана.

Росин не очекува руски пробив во Украина пред претседателските избори во март, бидејќи за да се постигне таа цел би требало да се мобилизираат значително повеќе војници.

Осврнувајќи се на коментарите на американскиот претседателски кандидат Доналд Трамп дека нема да ги брани сојузниците кои не трошат доволно на одбраната, Росин рече дека „таквите изјави никогаш не се од помош“.

„Способноста на Русија да ги снабдува своите војници со муниција сè уште ја надминува онаа на Украина и доколку западната поддршка не биде задржана или зголемена, Украина веројатно нема да може да ја промени ситуацијата на бојното поле“, додаде тој.

Македонија

Претседателката Гордана Силјановска- Давкова од Охрид: Да ги отвориме нашите срца за вербата

На овој возвишен ден, присуствував на свечената манифестација по повод христијанскиот празник Богојавление - Водици во Охрид.

На овој возвишен ден, присуствував на свечената манифестација по повод христијанскиот празник Богојавление - Водици во Охрид, каде поглаварот на Македонската православна црква – Охридска архиепископија г.г. Стефан ги освети водите на Охридското Езеро, положувајќи го светиот крст во нив.

Стотици верници, поттикнати од длабоката вера во божествениот благослов на осветените води, од вековната традиција која го симболизира крштевањето на Исус Христос и од желбата за духовна обнова, учествуваа во овој свет чин. Најсреќниот, Мартин Гоџо, кој го фати крстот, го дарував со рачно изработена резба посакувајќи му добро здравје, лична среќа и духовна исполнетост.

Да ги отвориме нашите срца за вербата, да ги насочиме мислите кон чистотата и мирот и да чекориме по патеката на духовното просветление!, објави претседатеката на ФБ.

Македонија

Бојан Јовевски го извлече крстот од осветените води на Крива Река

Бојан Јовевски од Крива Паланка е среќникот што годинава го извлече крстот од осветените води на Крива Река.

Чествувањето на денешниот голем христијански празник, Водици, Богојавление, започна со свечена Богојавленска литургија, верниците од осум часот утрово присуствуваа на светата литургија во соборниот храм Св. Великомаченик Димитриј, по што се упатија кон мостот и кејот на Крива Река, каде свештенослужителите од Кумановско - Осоговската епархија, Кривопаланечко архиерејско намесништво ги осветија водите на реката.

По овој чин, чесниот крст беше положен во водите на реката, а најсреќен меѓу пријавените што успеа да го извлече богојавленскиот крст беше Бојан Јовевски, кој традиционално, доби вредносен ваучер од Зегин, 15.000 денари.

Градоначалникот на Општина Крива Паланка ги поздрави присутните, посакувајќи им здравје, мир и благосостојба, честитајќи му на среќникот што го извлече крстот од водите на Крива Река.

По завршување на овој чин, на градскиот плоштад во Крива Паланка се одржа манифестацијата "Пивтијада 2025" во организација на Општина Крива Паланка, со приготвени 3.000 пивтии од општината, по традиционален рецепт од страна на угостителската струка во средното општинско училиште "Ѓорче Петров", останати закуски, храна и топли пијалаци за сите граѓани.

Настанот го организираше Општина Крива Паланка со институциите од областа на културата, со поддршка од Црвен Крст и Совет на млади.

На плоштадот беа поставени и кутии за донации,со хумана мисија за поддршка на полуматурантите од градот.

За богатата културно- уметничка програма задолжени беа Андријана Алачки со бендот и Гоце Димовски "Синтезис".

Македонија

Јован Илиевски го извади светиот крст од базенот во црквата „Свети Никола“ во Куманово

Дваесет и деветгодишниот Јован Илиески од Куманово го извади светиот крст, положен во водата на базенот што се наоѓа во дворот на Соборниот храм „Свети Никола“. 

Педесетина кумановци се обидоа да го извадат светиот крст во старата градска црква.

-Оваа година имав среќа, им посакувам на сите здравје, среќа и успех. Догодина да нè има повеќе на број, кажа Илиевски.

Илиевски доби подароци од црквата, бизнис заедницата, општината и граѓани.

На повеќе локации во кумановско продолжи вековната традиција на положување на крстот во осветените води.

Претходно во Соборниот храм „Свети Никола“ се одржа и литургија по повод празникот Богојавление Водици. Верниците присуствуваа на литургија, дел од нив пресекоа славски колач, си зедоа осветена вода, се помолија за здравје, мир и благосостојба. Водици се празнува уште од вториот век. Поврзан е со крштевањето на Исус Христос во водите на реката Јордан од страна на свети Јован, кој од тогаш се нарекува Крстител. Празникот се нарекува уште и Водици поради големиот водосвет што го извршува црквата на овој ден.

притисни ентер