Уште едно тензично попладне во Град Скопје, овој пат во салата на Советот ечеа препукувања откако советниците не изгласаа да се одржи вонредната седница во која тема на дискусија требаше да бидат дивоградбите во О. Чаир... Состојбата кулминираше кога градоначалничката Арсовска излезе на говорница да презентира документи кои вели дека се фалсификати и доказ за незаконското легализирање на дивоградби во Чаир, по што започна и кавгата со советниците од ВМРО-ДПМНЕ и Вреди.. Набргу седницата мораше да биде прекината, па не се разговараше ниту за дивоградбите во Сарај.
„Госпоѓо дали може да не урлате? Многу сте невоспитани. На увид на целокупната македонска јавност, Вакво флагрантно бранење на Висар Ганиу не сум видела, луѓе дали се срамите, образ имате ли?“
Во меѓувреме, обвинителството отвори истрага за шест катница во Чаир, а за осомничениот кој се товари за безправно градење, определи мерки на претпазливост. Од ОЈО Скопје посочија дека објектот почнал да се гради во 2024 година без одобрение и на државно земјиште на улицата „Кемал Сејфула“, а осомничениот инвеститор изградил станбена зграда со деловни простории, со катност од подруми + приземје + шест ката + поткровје..
Состојбата со дивоградбите и заканите кон градоначалничката ги следи и полицијата, кажа денеска министерот за внатрешни работи, Панче Тошковски. Сепак, она што се случува изминатиов период на релација Арсовска – Ганиу, го нарече предизборен циркус.
Од МВР пак посочија дека е извршен разговор со возачот на Мерцедесот кој и се заканувал на Арсовска во неделата на „Словенечка“, каде таа, како што кажа, фатила диво приклучување на атмосферската канализација. Станува збор за 39 годишник, кој негирал дека се заканувал, а за кој Арсовска вели дека приведено е друго лице, а не вистинскиот заканувач.